موضوع مميز صور لبعض حلوياتي

ladymillion · 2013-04-30, 13:04

بسم lلله الرحمن الرحيم

حبيت نقدملكم اليوم بعض من حلوياتي ويا خسارة ماكنتش مسجلة في المنتدى ولكن اذا عجبوكم حلوياتي أنشاء الله نعملكم الحلويات لي حبيتو ومع الوصفات وصور الخطوات طبعا ونتمنى تعجبكم منها لي عملتو في الاعياد ومنها لي عملتو في أعياد ميلاد أولاد خواتاتي حفظهم الله

1/ كب كيك الشوكولا بأكواب الشوكولا

2/ كيكة المنزل

3/ تشيز كيك الشوكولا

4/كيكة الباربي

5/ كعكة الامريكية المزينة بالحذاء هاذي حطيتها البارح

6/ كيكة البالون

7/ تشيز كيك الفراولة

8/ كيكة الهرم

9/LES TRUFFES أو قاطو بشكل الترفاس

10/ حلوى بلح الشام هذه الوصة حطيتها كي سجلت جديدة في المنتدى

11/ ماكارون بنكهة الفستق

12/ جينواز العسل والجوز

13/ مخبز الوز والبندق

14/ مخبز الجوز

15/ غريبة الفستق ويمكنك الاسغناء عنه

16/ بنيون

17/ مخبز خفيف وهو نوع كيما مخبز لكن ايجي خفيف عليه وروعة

18/ موس الشوكولا في أكواب الشوكولا

19/ تارتة الوان الطيف وهذه ثاني حطيت وصفتها مع الصور

وهده كل حلوياتي من مطبخي وانشاء الله تكون عجبتكم ولي عندها استفسار ألف مرحبا

ام عصام · 2013-04-30, 13:15

هايلين الله يبارك مشاء الله عليك اختي ممكن طريقة لمخبز لقلتي يجي خفففففففففففف والتشيز كيك نتاع الشيكو وبلك جزيل الشكر

oumjiji · 2013-04-30, 13:22

ما شاء اله راكي فحلة ياريت تحطي ليروسات تاع القاطو راه يهبل

oumjiji · 2013-04-30, 13:28

راني نستنى تبعثيلي شوية من لي تارت راهم يسخفو راني جارتك

ladymillion · 2013-04-30, 13:29

هاذي وصفة المخبز الخفيف

كأس ونصف لوز مرحي رطب
نصف كأس سكر ناعم
3 بيضات كاملة
نصف باكي خميرة كيميائية
قرصة ملح
نصف كأس زبدة
2 ملاعق كبيرة فرينة
الطريقة : خلطي المقادير كيما كي ديري جينواز وحتى الخليط يجي قوامو كيما الجينواز ودهني الصينية وطيبيه واذا عندك قوالب السيليكون صغيرة يكون أحسن أنا هنا طبعتو دوائر
بعد ما تخلصي عسليه وخليه يشرب شوي وحضري الكلاصاج نتاعك عادي وزينيه بعد ما يشيه الكلاصاج

هذي هي الوصفة يا أختي وشكرا بارك الله فيك
ودرك نزيدلك تشيز كيك الشوكولا

oumjiji · 2013-04-30, 13:33

ما كانش حتى رد وينكم يالبنات

فلوسة نصرو · 2013-04-30, 13:33

أولا: تبارك الرحمان ما شاء الله
ثانيا: يعطيك الصحة على هادوك اليدين
ثالثا: تقدري تتحنني علينا شوية وتعطيلنا لي غوسات خصوصا رقم 01، ورقم 12، 13، 14، 15، 18
وربي يعطيك ما تتمناي

oumjiji · 2013-04-30, 13:38

وصفة موس الشيكولاء و الجنواز بالجوز وشكرا

ladymillion · 2013-04-30, 13:49

تشيز كيك الشوكولا

الطبقة الاولي : ديري أي بسكوي فيه الشوكولا أنا درت بسكوي برينو وبالنسبة للمول نتاعي خصيصا للتشيز كيك واذا معندكش المول جيبي صينية وحطي فيها ورق الالمنيوم ويجي طويل على الجوانب باش كي تجي تخرجي قالب الكيك يجيك أسهل المهم نحتاج الى 100 غ بسكوي بالشوكولا أرحيه مع اصبع زبدة حتان يرطاب ورصيه في المول بمساعدة قاعدة الكأس باش يدخا مايح في بعضاه وحطيه في الفرن 180° لمدة 15 د متزيديش كثر ومبعد خرجيه وخليه على جنب

الطبقة الثانية :

Petits suisse 6
6 ملاعق كبيرة سكر
في كأس حليب ذوبي 200 غ شوكولا سوداء + ورقة ونصف جيالتين تكوني غمستيه في الماء البارد قبل ما تبداي عمل الكيك ذوبيهم على نار هادئة
وبعد ما يذوبو برديهم شوي لكن ماشي في الثلاجة برديهم بالتحريك
الان تجيبي أناء حطي فية الماء البارد والثلج وحطي فوقو أناء فية الحليب مع الشوكولا والجيلاتين لي برتيهم وزيدي عليهم 7 ملاعق كبيرة من الكريم شانتي و 6 ملاعق نتاع السكر واخفقي الخلاط الكهربائي

ومبعد خلطيهم مع 6 علب نتاع petit suisse وخفقي مليح حتي يتجانس الخليط وأضيفي الجوز مكسراذا حبيتي ماديريهش

وحطيه فوق البسكوي واعدليه وحطيه في الثلاجة لمدة 5 ساعات ويجي هايل
وانشاء الله نكون أفدتك وادعيلي برحمة الوالدين

ladymillion · 2013-04-30, 13:53

فلوسة نصرو و oumjiji
سامحوني وامهلوني شوي دورك نكتبلكم الوصفات وراني فرحانة كي عجبوكم بارك الله فيكم

دعاء القلوب · 2013-04-30, 14:00

هايلين يعطيك الصحة ممكن الوصفة رقم12

ladymillion · 2013-04-30, 14:02

طبعا أختي دورك نكتب للأخوات وليك تاني

ladymillion · 2013-04-30, 14:21

الوصف 1 : كب كيك الشوكولا بأكواب الشوكولا

أولا نبدا بمقادير الكعكة الاسفنجية اي الجينواز شعلي الفرن 180° وابداي

3 بيضات + -ملاعق كبيرة سكر+ 6 ملاعق كبيرة زيت + 4 ملاعق كبيرة فرينة + 2 ملاعق كبيرة كاكاو أسود + نصف باكي خميرة القاطو
اخفقيهم في الخلاط وحطي في قوالب السيليكون الكبيرة نتاع كب كيك ودخليهم الفرن حتان تشوفيهم حومن ومتحليش عليهم حتان يطيبو وخرجيهم حطيهم على جنب

ذوبي الشوكولا أنا نحب نستعمل شوكولا منى هايلة لكلش ونديرها في قاطواتي كلها دوبيها في حمام مائي
وانزعي لكيسات برفق وباستعمال ملعقة صغيرة ادهني كب كيك بالحبة من تحت وعلى الجوانب وحطيها في قوالب السيليكون الكبيرة لي طيبتي فيهم وحطيهم في الكولجيلاتوغ تحمد وكي تجمد خرجيها ونحي القالب يجيك ساهل كس تنحيه وتجي الشوكولا حاكمة قالب السيليكون كما في الصورة
بالنسبة للكريمة ديري كأس حليب مع 6 ملاعق كبيرة من كريمة الشانتيي والكاكاو واخفقي مليح
وحطيها في كيس حلواني وزينيها كيما تحبي

واذا مفهمتوش الطريقة انشاء الله نزيد نديرها ونصورلكم

souhaalgérie · 2013-04-30, 14:32

يعطيك الصحة هايلين بارك الله فيك تعيشي حطينا الوصفة رقم 16 و رقم 12

oumjiji · 2013-04-30, 14:33

راهوليدى يبكي قالي ديريلي لتارت تاع الصباط ولا مانروحش نقرا دبري راسك انقذيني يالادي