كوني له امة يكن لك ...............

[مشكلتي]

كوني له امة يكن لك عبدا
كيف تتصرف زوجة مع زوجها التي دامت العشرة بينهم 20سنة وكل همها ارضاؤه لكن كل مرة يضغط عليها اكثر ويخنقها بالنواهي ولا يرى الا ما يناسبه ويناسب عائلته
مع العلم انه يحاسبنا على كل قرش يصرفه علينا يعني ما نشريو حاجة الا بطلوع الروح
دايما يدخر ويقولي لمستقبل اطفالنا
انا الف فرنك مانديهاش من دراهموا ما نقدرش لكن منظر ابنائ وهوما متشهيين حلوة ويطلبوا مني نمدلهم والله يؤلمني كثيرا
موسع عليه ربي وانا منذ تزوجته وهو يقولي ندبروا مستقبل لاولادنا لكن طولت عليا لمدةوكرهت وتعبت من الوضع العمر يجري تعدينا الاربعين وكتاش نعيشوا حياتنا الله اعلم
عمره ما سلك وقالي هاكي 50الف اشري كا ما سخفتي ولا نمدها لامي اللي تبعد عليا مسافة 30كلم ونشوفها 4مرات في العام
ارجوا منكم النصيحة
ربي سخر لي زوجي في الخير

[زبدة ذايبة]

حتى وصلتي لهذ الحد كنت انت السبب في هذا.

مع الأسف الشديد أكثر الزيجات التي تشعر بالألم والأسى هي الزواجات تاع بنات الفاميلية.

تبقى المرأة تضحي بنفسها من أجل الرجل.

باش ماتتخلطلناش المفاهيم مارانيش ندير دعوة لتحرر المرأة او دعوة لخراب البيوت معاذ الله.

لكن من خلال الأشياء اللي راني نلاحظها أن المرأة الصالحة عندها مغالطات في ذهنها.

أن تكوني زوجة صالحة مايعنيش نهائيا أنك ماتلبسيش وما تاكليش مليح.

ومايعنيش أنك ماديريش الواجبات الحياتية:تزوري أهلك، تروحي للعرس، تروحي تهني لصديقة أو قريبة تروحي للفسح و........

انت اللي خليتي راجلك يقتنع بأنك ماتحتاجيش لأي شيء.

وأهل زوجك يقنعوه أنهم محتاجين لكل شيء.

على هذا كفة المصاريف رجحت لأهل زوجك. لأنك انت قادرة تصبري وعندك الطاقة تاع التحمل ، ومدام راكي متحملة راكي رايحة تزيدي ترفدي هذا العبء لمدة أطول.

لذا ياعزيزتي تحاوري مع زوجك وديري موقف واضح تكوني فيه صارمة معاه وواضحة. على الأقل يتوقف الاستزاف تاعك ويحس بيك كزوجة وأم لأولاده.
الزواج السعيد أساسه المودة والرحمة. وإذا غابت الرحمة بين الزوجين أصبح الزواج بلاطعم.

ساعدي زوجك حتى ماينساش أنك موجودة في حياته وأن لك كيان وأن لك متطلبات.

وخلي مستقبل الأطفال بيد الله.

ماتحتاجيش تكوني أمة لزوجك.

عمر الزواج ماكان يجعل من المرأة أمة.

الفتاة بعد زواجها تسمى سيدة.

ماتحطيش نفسك في مواضع تسببلك الإهانة

وتكسرك داخليا ونفسيا.

طاقة التحمل محدودة.

ماتضحيش بحياتك لأجل اللاشيء.

النفقة حقك وحق أولادك.

كل ينفق من سعته.

يخلص 10ملاين ماتعيشيش معيشة تاع 2ملاين

قال نأمنوا مستقبل الأولاد!!!!!!!!!

الحاضر ضيعهم فيه حتى راح يعيشهم مليح في المستقبل!!!!

سقسيه:

قبل سنتين كان هذ الوقت اللي راكي فيه الآن مستقبل

وش هو الجديد اللي كاين في هذ السنة؟؟؟؟؟؟

ماكاين حتى جديد. وإلا ماكنتيش تكتبي على معاناتك ومعاناة أولادك.

طالبي بحقوقك وبحقوق أولادك.

وماتزيديش تصدقي الكلام اللي يقول كوني له أمة يكون لك......

لأنها كلمات كانت صالحة في زمان ، ونحن في زمن مختلف.

ماشي صعيب تعوديه على النفقة.

كوني ذكية فقط.

حتى لايتم فهمي خطئا فأنا لا أدعوك لاستزاف جيب زوجك، ولكنني أريدك أن تعيشي حياة كريمة. هذا فقط مااقصده

رب يصلح حالك.

[Hanan salim]

الله يكون في عونك اختي .. لا أستطيع قول اكثر من ذلك

[nihal159]

صراحة بعد 20 سنة من نفس الروتين و حياتكم ماشية بنفس الوتيرة سيكون التغيير صعيب بزآآآف؛ ربي يكون معاك .

[basyouni]

شوفي اختي اذا كان راجلك يسلك مليح فالمشكل فيه وعليك مناقشته ،

اما اذا كان سلاكو 5 ملاين او اقل فمع الكراء و مصاريف البيت فالامر صعيب والمشكل يصبح فيك لانك تعرفين حاله من اول يوم بلي قدو قد حالو ،
ربي يفرج عليكم

[dede2000]

أولا أتأسف على هذه المعاملة السيئة
من زوجك ربي يهديه...من المفروض الزوج والزوجة
شركاء في كل شيىء لا يوجد مصطلح بينهم يسمى
أعطيني أو هذا لي وهذا لك أو أنا من يقرر وفقط...
لكن للاسف يوجد أزواج يستفردون بالرأي ،وهذا الامر
من المفروض يتفاهمو عليه الازواج من النهار الاول
أو يجي بعفوية عن كيفية تسيير الميزانية العائلية
و رسم المشاريع المستقبليةمع بعض حتى ولو كانت
الزوجةما كثة في البيت لانهم ببساطة كيان واحد
المهم التغير بعد عشرين سنة واعر بزاف لأنو
يضهرلي بلي شخصيتك مع زوجك ضعيفة لكن
حاولي أن تغيري الوضع بإرسال رسائل غير مباشرة عبر
إيحائات مثلا....كأن تحكي له حكايةأو تشوفو فيلم
عن أطفال أو فتياة إنحرفو بسبب الفقر والحرمان
ليعلم أن الشح قد أهلك أقوام ولكي يفهم معني
كلام الرحمن الرحيم (ولا تغلل يدك إلى عنقك)
وقولي له كما قالو أجدادنا شيء المشحاح راه
يديه المرتاح

[amel ramis]

الله يكون في عونك اختي ..