السلام عليكم هذه بوقالات كل وحدة تخير لي عجبتها وتكتب رقمها إن شاء الله تعجبكم البوقالة رقم 01
نطلب ربي الفتاح يعطيني نحل البيبان و نشوف الهناء
و نرتاح
*البوقالة رقم 02
يا شمس واش بيك ذابلة ، إذا بيك الزين راني نفكر فيك
وإذا بيك الزهر ربي ما يتخلي عليك
*البوقالة رقم 03
خرجت نهار الجمعة ، في يدى شمعة ، قالولي أمسحى ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة
*البوقالة رقم 04
قطّعت اللحم بيدى و عملت بذور ، و سمعت الكلام بوذنى و عرفت من قالو ، يا قايلين الكلام القبيح واش تربحوا ، أنا طاوس في القصر و انتم خفاش النهار ما يضوالو
*البوقالة رقم 05
سمعت قر الحمام في قاع السّجنة ، لا من سقاه الما ولا من طاه
شعير ، يا قمر ..الحمام يعي و يحن وتتعمّر النافورة ، ونعودوا لزمانا كيما كنا
*البوقالة رقم 06
خرجت في الليل ...نطلب في الله ...صبت النجوم دايرين ...
وقالولي صلي على رسول الله...*صل الله عليه وسلم *...
ولي تستناهم راهم راجعين
*البوقالة رقم 07
الاسمر يا لسمر ...يا شباب الحومة ....وشبيك غضبان وزعلان علينا.... احنا
ما نسوى بلا بيك... لوجه ربي... راضينا وراضى علينا
*البوقالة رقم 08
انت سبيبط.... وانا خويط فيك.... انت سنيسلة.... وانا خمسة تحميك... انت خويتم
وانا حجرة تبهيك ...وين تروح تلقاني وغير انا لي نديك
*البوقالة رقم 09
رشّيت عتبة الباب بالزهر و الطّيب ، وسقيت كل الأحباب بالعسل و الزبيب ،
و كى نسيت جاني جواب كنت نستناه من عند البعيد
*البوقالة رقم 10
الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوبـ
*البوقالة رقم 11
شربت من ذاك الواد و تعلقت في الزيتونة
انا وحبيبي متفاهمين و الناس يحسدونا
خمسة في عينيكم يالي تكرهونا
*البوقالة رقم 12
التمر و الحليب في طبق وسط الخيمة نهديهم للحبيب باه يوالف ديمة ما يعزش
اللي في الجيب هذاك زوجي يالميمة
*البوقالة رقم13
قلبي على جمرة وقلب حبيبي على تمرة بعثتلو وردة حمراء قلتلو الخديعة مرة قالي والله ما نخدعك حتى نروح نعيا في المقبرة
*البوقالة رقم 14
خيوط الليل ذابت ..و شعاع الصبح بان
و الشمس فوق لاحت..ذهب عليا اللي كان
و اللي زمان غابت..جات اليوم تبان
تسقم السعد ثابت ...اتهنيت و الحظ زيان
*البوقالة رقم 15
إذا طاح الليل النهار راهو يطلع و إذا كثر النحاس
الذهب هو اللي يسطع و سيرتك كي العطر بين الناس
العقدة زينة و كي السلطان متربعة
*البوقالة رقم 16
شدني شدني...شدني من يدي ..من غيرك انا ما ندي...كلامك زين
و حسنك يملا العين
*البوقالة رقم17
السمرة يا سمرة يلي عايروني بيك نسمح في بلادي ونجي ليك
*البوقالة رقم 18
قولو للي ضاق صبرو يشد في حبال الرجا و علاش يتنكد ..يتكل على
الله ياك ربي العالي ما يضيع حد
*البوقالة رقم 19
فال يا فلفال يا فاتح سبع قفال اجبرلي سعدي مهما كان ما الشرق
و لا من الغرب ولا من الشمال
*البوقالة رقم 20
أصلك أصلك و ما ينفع غير الصح مولاة النية الصافية عليها
ربي يفتح أطول و لا تقصر يجيها السعد و الربح
( تقرير عن مشاركة سيئة )، و الموجودة أسفل كل مشاركة .
2015-10-01, 19:52
بوقالات أتمنى تعجبكم
العرض العادي
