الرفيس من مطبخ ليزابال

[lyzzabel]

البسملة1



مرحبا بكن حبيباتي في اول موضوع ليا في ركن الحلويات
اليوم جبت لكم وصفتي و لمستي في تحضير الرفيس و كاين لي يقولوله الرفيس الهندي رغم انه ما عنده حتى علاقة مع الهند ههههه
هاذ الرفيس نديروه فالنفاس للضيوف و للنافس و لي يبغي يديره فالايام العادية تاني علاش لا
أولا نحتاج الى
كيلو سميد متوسط يعني لي نستعملوه للمقروظ
قرصة ملح
نص كأس سكر
نص كأس زيت عادي
شوية ماء الزهر تقريبا كأس تاع الشاي نقدرو نستغنو عليه ولكن انا تعجبني نكهة المازهر مممممم
و نحتاج أيضاً الى
400 غ مارغرين
كأس و نصف ماء
و طبعا فالنفاس نديروه بكمية كبيرة


الطريقة
نحط السميد مغربل في قصعة و نضيفله قرصة ملح و السكر و نخلط بيدي و نزيد الزيت و نحك ملييييح بين الكفين
نبدأ نرش بالما زهور نخلط بصباعي بلا ما نعجن و نزيد نرش بالحليب بالشوية مشي مرة وحدة مع الخلط بالأصابع داءما
نسيت ما صورتهش بعد ما شمخته بالحليب


نجيب صينية الفرن ندهنها بشوييييية زيت و نحط فيها خليط السميد و نقرصه على شكل خبزة نضغط عليها مليح و ندخلها للفرن يكون ساخن من قبل على 220 درجة مدة عشر دقائق الى ربع ساعة و ما لازمش تحمار بزاف باش ما تيبسش
هنا قبل ما تطيب


هنا مين خرجتها مالفرن

تنحيها مالصينية و نحطها فالقصعة لي حضرنا فيها طبعا باش ما نكثرش الماعن و نبدأ نفتت فيها و هي عاد سخونة باش تجئني ساهلة
من بعد نجيب غربال لي هو البوسيار تاع البركوكس و ما يكونش محلول بزاف باش الرفيس ما يجيش غليظ



و نبدأ ننفوت فيه الخبزة لي فتتها و هذاك لي يبقى فالسيار نطحنه فالروبو و نعاود نفوته فالسيار و كل مرة لي يبقى نطحنه و نسيره حتى نكمله قاع و إذا بقاتلك شوية ماعليش خليها بجهة من بعد نقولك واش تديري بيها








نتحصل على هذا


نحمص هذاك الرفيس لي تحصلنا عليه في طاجين ولا مقلة واسعة مع التقليب المستمر حتى يأخذ اللون الذهبي الجميل ما لازمش ينحرق
من جهة نكون موجدة طاجين كبير و نذوب فيه ألمارغرين مع الماء و نفرغ عليهم الرفيس و نحرك بالملعقة الخشبية مليييييح حتى يتجانس الخليط
و كاين لي يفوروه فالكسكاس و من بعد يزيدوله الزبدة أو المارغرين و في زوج يجيبو نفس النتيجة



و نسقيه بالعسل و نخلطه ممممممم و العسل يكون حسب الذوق خاطرش راه فيه السكر من قبل



هذا هو الرفيس تاعنا وكاين لي يديروه مع تغييرات طفييييفة و لكن المبدأ في الوصفة نفسه
قدميه في صحن و زينيه من فوق باللوز ايفيلي ولا الجوز و لا حلوة الترك ولا الكوكاو أو البيستاش ههههه انا كان عندي كاوكاو ايفيلي


و تقدري تقدميه ساااامبل بدون تزيين ممممممم مع حليب ولا لاتاي


نتمنى تعجبكم الوصفة و تجربوها راه لذيييييذ و نتناولوه مع القهوة أو الشاي و نديروه فالنفاس لاااااازم ههههه

و هذاك لي بقالك غلييييظ طبخيه مللللليح فالحليب على نار هادية غادي يطرى و قدميه للأطفال كوجبة فالصباح أو المساء راه مغذي جدااااا و لذييييييذ في نفس الوقت ممممم مام انا ناكله




ملاحظة
من الأحسن تحضريه بليلة من قبل لا تستهلكيه خاطرش راح يزيد يطرى و يشرب البسوس و العسل ممممم و مين تبغي تقدميه سخني الكمية لي غادي تقدميها في كاسرول و إذا تحبي تزيدي عليها شوية مارغرين و عسل زيدي حسب الذوق
مع تحياتي العطرة حبيباتي و طبعا دعوة خير بزاااااف عليا

[lilouchaf]

ليزا يسلمو ايديك يا حلوة واني اديت حقي قبل ما يفوتوني او ما يبقى والو عمري لا دوقتو ويبانلي هايل نجربو بادن الله لاخاطرش راهو شهاني

[ام ندى 87]

اممممممممممم يسخف يعطيك الصحة ليزابال اول مرة نشوف او نسمع بهاد النوع تاع الرفيس ولقيتو ساهل ومن مكوناتو يبان بنين

[أم ياسين الزهراء]

واوووووووووووووووووووو هايل فيه شبه شوي تاع رفيس قسنطينة سخفتيني يعطيك الصحة

[لينا11]

يشبه شوية لتاع قسنطينة هو يتفور ويترش بماء زهر وبالحليب
على عموم جاك تحفة ممممممممممم
تاكلوه بالصحة والهناء يارب

[أم ياسين الزهراء]

نسيت نقلك عجبتني فكرة تحمصيه راح يطلق بنة رهيبةةةةةةةةةةةةةةةةةةةةةةةةةةةةةةةةةةةةة اممممممممممممممممممممممممممممم

[ام محمد78]

يعطيك الصحة

[راجية غفران ربها]

ممممممممممممممممممممم سخفتيني حرة الحراير و الله

[zahra30]

ماشاء الله ليزابال شرح كاف وواف ربي يحفظك الصراحة شفت بزاف انواع بصح انتاعك مغرييييي هههههه ما علباليش اعلاه ان شاء الله راح في القريب العاجل نجربو ونردلك بالخبر بارك الله فيك ويعطييييك الصحة موااااح

[future maman]

طليتي على قلببببي

[أم ريمة*]

ممممممممم ياين بنين يعطيك الصحة يا الحرة

[أم محمد تاج]

ممممم ياعسلاية نفس طريقتنا حنا نقولولو الرفيس لمبسس يااااي وناكلوه مع اللبن بنة رهيييبة الله يعطيك الصحة ومواحتيييييييييين

[nina13]

بارك الله فيك شكرا

[أم شروفة]

شكراااااااااااااااااااااااااااااا

[lyzzabel]

مشكوراااااات حبيباتي والله فرحت مين عجبتكم الوصفة
يالله الى التطبيقااااات هههههههه
نورتوووووني بزيارتكن يا غاليات