وصفة بطاطا كوشة نتاع الطباخ نتاعنا ( مسروقة )

إلهام07 · 2013-09-17, 10:09

صباح الخير عليكم

في المطعم نتاع العمل نتاعي الطباخ يديرلنا بطاطا كوشة ممممممممممممم روعة
كل مانسقسي الطباخ على الوصفة يبدى يتهرب وهو أصلا يحشم يعطيني الوصفة غير بالشوية وأنا الحق كل مانروح للمطعم نجسس شوية عليه كيفاش يديرها .
البارح طلعلي الدخان للراس عام وانا نسرق في الوصفة بالشوية وكل مرة نجرب ماجيش كيما نتاعو
حكمتو عصرتو حتى اعترف بكل تفاصيل الوصفة من التوابل حتى التقديم نتاع الطبق هههههههه

المهم هاكو الوصفة والله تعبت في السرقة نتاعها هههههههههههههه :

المقادير :
* 1كغ بطاطا
* 1حبة طماطم
* 1حبة بصل صغيرة
* دبشة ( يعني قصبر )
* 1ورقة رند
* 1 راس فلفل حار او حلو حسب الرغبة
* كمية مليحة نتاع ثوم
* لحم مفروم
* جبن أحمر من الأفضل ( fromage rouge ) وإذا ماعندكمش ديرو أي نوع جبن آخر
* ملح
* فلفل أسود
* فلفل أحمر
* كمون
* هريسة ( اختياري )
* حبات زيتون أخضر ماشي طايب ( اختياري )

الطريقة :
1- نقشر البطاطا ونقطعها شرائح رقيقة ونقليها حتى تصبح ذهبية ماتحمروهاش ونرشها خفيف برك بالملح .
شوفو الشرائح كيفاش مقطعين رقاق

شوفو كي قليتها ماحمرتهاش .

2- نقطع البصل شرائح رقيقة وأيضا نقطع الفلفل شرائح رقيقة ونذبلهم في مقلاة بشوية زيت مع ثوم شرائح ودبشة مقطعة رقيقة أنا ماعنديش هنا الدبشة خلاصتلي ونسيت نشري .
شوفو البصل كيفاش مقطع رقيق .

هنا ذبلو :

3- كي يذبلو نزيد حبة طماطم مرحية او مرابية في الجهة الرقيقة نتاع لاراب ( هو يقطعها برك ما يرحيهاش ) + ورقة الرند + ملح خفيف وكي تقرب طيب نزيد فيها ملعقة كبيرة معمرة مليح نتاع هريسة بريق الأمل تعطي بنة هايلة .

4- نزيد التوابل اللي هوما ملح فلفل أسود كمون وفلفل احمر ونخليها طيب ماتنشفوهاش من الماء خليوها شوية جارية.

5- في مقلاة أخرى ندير لحم مفروم مع كمية مليحة نتاع ثوم مرابي + ملح خفيف ونقلي ( إذا اللحم المفروم نتاعكم راهو بيفتاك مرحي كيما نتاعي زيدو شوية زيت باش يتحمر لأنو خالي من الشحم اما إذا ماهوش بيفتاك ماكلاه تزيدو الزيت يتحمر منو فيه بالشحم نتاعو ). كي يكون نص طياب نزيدو الفلفل الأسود ونكملو كي يتحمر نطفي عليه النار .
أنا درت توابل المرقاز المخادع زدت فيه كمية مليحة كمون وفلفل أحمر .

6- هنا عندكم 2 طرق إما ديروها في كوكوط أو في الفرن ، أنا ردت في لاكوكوط أسهل وأسرع
ندهن قاع الكوكوط بشوية زبدة حاجة قليلة خلاص باش البطاطا ماتلصقش

7- نحط نصف كمية البطاطا ونحط فوقها طبقة رقيقة من الحشو الطماطم ( ادهنو برك ماتكثروش الصلصة بنتها في اللحم المفروم والجبن وليس الطماطم ، الطماطم الهدف منها باش الطبق يجي رطب ماشي ناشف )

8- نحط نصف كمية اللحم المفروم ثم نرابي جبن أحمر واللي يحب ممكن يحط حبات نتاع زيتون أخضر .

9- نحط الكمية الباقية من البطاطا ثم صلصة الطماطم ( ماتكثروش أدهنو فقط ) ثم اللحم المفروم ثم الجبن الأحمر المبشور.

10- نغطيي الكوكوط بالغطاء نتاعها ماشي شرط نغلق ونحط الصفارة نغطيها فقط .
نحطها على نار هادئة على الكانون الصغير ونخليها حوالي 10د باش البطاطا تتشرب الصلصة والجبن يذوب .
هاهي بعد مافتحت عليها

إذا حبيتو ديروها في الفرن نفس الشيء تدهنو المول نتاع الفرن وتحطو فيه البطاطا بنفس الطريقة وتغطيوها بورق ألمنيوم أو كيس شواء تحلوه بمقص على زوج ودخلوها للفرن حوالي 15د غير يذوب الجبن والبطاطا تطرى وتتشرب الصلصة خلاص خرجوها .

11- نقدمها مع رشة خفيفة نتاع دبشة مقطعة رائعة ولذيذة ممممممممممم خاصة للضياف تحمر الوجه
هذا صحني كثرت فيها الدبشة نحبها

* ملاحظة ماتكثروش الملح لأن الجبن الأحمر والزيتون مالحين .

رحت نتغدى لقيت الطباخ دارنا للغداء بطاطا كوشة هههههههههههههه شوفو الصدف
هاهي نتاع الطباخ نتاعنا :

بعد مالبيتلكم طلبكم وحطيت الوصفة ، دعواتكم لعمتي بالشفاء العاجل .

قبلاتي للجميع .

فايزة1207 · 2013-09-17, 10:16

ربي يحفظ هاذوك اليدين ويشفي الوالد والعمة ويرزقك بابن الحلال

fyfy_top216 · 2013-09-17, 10:19

واوووووووو هايلة راني من متتبعاتك الهام كل مرة تجبينا جديد
استمري في السرقة ...
يعطيك الصحة

*سماح 94* · 2013-09-17, 10:22

امممممممممممممممممممممممم يا الهام تهبللللللل ان شاء الله نديرها للعشا راهي قتلتني وانا نموت على هاذ العفايس
ربي يشي والدك وعمتك عاجلا غير اجل

oum ibrahim · 2013-09-17, 10:29

اممممممممممم سرقة حلوة هههههه تشهيييييي يعطيك الصحة

dalila setif · 2013-09-17, 10:29

يعطيك الصحة يا لهومة سخفتيني

oum malouka · 2013-09-17, 10:31

mmmmm tsakhaf ya jarti yeatik saha

ام ندى 87 · 2013-09-17, 10:35

الله الله اكتر مكلة نحبها خلطت هاد المكزنات مع بعض عدة مرات بصح ماكنتش راضية على النتيجة بصح هادي تحفة
اكيد نجربها

ام ساجد · 2013-09-17, 10:36

يعطيك الصحة الهام طبق بسيط لكن باين وكان طبق فخم والبنة اكيد
امممممممممممممممممممممممم دايما الهام 4444444444444444444444
اللهم اشفي مرضاك عاجلا غير اجلا

أم ياسين الزهراء · 2013-09-17, 10:43

ربي يخليك تسرق وتزيدي طبعا في الوصفات ههههههههههههه

ربي يجيب الشفاء

ام الاء وسدن · 2013-09-17, 10:45

هايلة اختي الهام 07 جاري التطبيق

ام ساجد · 2013-09-17, 10:46

الهااااااااااااااااااااااااااااااااااااااااااااااا ااااااام خبر سار جدا جدا

هنا

https://www.djelfa.info/vb/showthread.php?t=1419370

heaven's road · 2013-09-17, 10:51

ماشاءالله يعطيك الصحة

انتصار فاطنة · 2013-09-17, 10:53

شكرا لهومة على الوصفة والله عندي زمان وانا نحوس عليها وربي يشفي الوالد والعمة وجميع مرضى المسلمين

YAKMISSOU · 2013-09-17, 10:54

يعطيك الصحة الهام راهي تشهي تشهي ربي يعطيك ما تتمناي وربي يخليك ويحفظلك الوالدين ويرزقك بولد الحلال
لازم نجربها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري