![]() |
|
في حال وجود أي مواضيع أو ردود
مُخالفة من قبل الأعضاء، يُرجى الإبلاغ عنها فورًا باستخدام أيقونة
( تقرير عن مشاركة سيئة )، و الموجودة أسفل كل مشاركة .
آخر المواضيع |
|
![]() |
|
أدوات الموضوع | انواع عرض الموضوع |
![]() |
رقم المشاركة : 121 | ||||
|
![]() يعطيك الف صحة وعافية إن شاء والله والله يا ولادي كل يوم يا ماما أحكيلي حكاية منلقا ما نحكي هنيتيني حكياية دينية هادفة وبطريقة مشوقة شكرا لكي حبيبتي
|
||||
![]() |
![]() |
رقم المشاركة : 122 | |||
|
![]() يعطيك الصحة اختي وااله فكرة رائعة من عند اخت اروع راني بديت نحكيها لولادي الطفل 5سنوات لاحلي قصي وابنتي رهف4سنوات والله يا ابني فرح بيها وكل يوم كمليلي يا ماما والبنت قاتلي يا ماما هذي ميش حكاية هذه قراية براءة اطفال ربي يحميها ويحمي كل ولادنا راني في الحلقة الثالثة بارك الله فيك وجزاك الله كل خير هنتيني وحكاية هادفة ولازم يعرفوها ولادنا شكرا |
|||
![]() |
![]() |
رقم المشاركة : 123 | |||
|
![]() السلام عليكم |
|||
![]() |
![]() |
رقم المشاركة : 124 | |||
|
![]() مساء الخبر و البركة في هدا اليوم المبارك و اغتنم الفرصة لاقول صح مولودكم و كل عام و انتم بالف خير |
|||
![]() |
![]() |
رقم المشاركة : 125 | |||||
|
![]() اقتباس:
اقتباس:
ماشاء الله ربي يحفظهم ويقر عينك بصلاحهم
يسلّمك حبيبتي والله ماتتصوّروا فرحتي بكل ردودكم الجميييييلة ربي يحفظ ولادكم وولادي ويهديهم للخير ويقدّرنا نربّوهم كما يحب ويرضى العفو حبيبة ربي يبارك فيك انتي على كلامك الطيب |
|||||
![]() |
![]() |
رقم المشاركة : 126 | ||||
|
![]() اقتباس:
وعليكم السلام ورحمة الله وبركاته
ربي يحفظك ابني محمّد ...من حسن ذوقك ووعيك ماشاء الله عليك العفو ابني ربي يوفقكم يااارب ويبصّركم للخير شفت قبيل زميلك انيس ..في المسابقة ؟ بالتوفيق ليكم كااامل انيس جاوه اولاد عمه فاضطر للانسحاب اليوم حظ موفق لكم كااامل |
||||
![]() |
![]() |
رقم المشاركة : 127 | ||||
|
![]() اقتباس:
وفيك حبيبتي ربي يحفظك ويحفظ صبرين واخوها
ويباركلكم في الحاجّة سلامي ليها فرحتيني اختي العزيزة ربي يفرحك اللهم امييييين اجمعين جزاك الله خيرا على المشاركة الطيبة اعتز بها والله ... |
||||
![]() |
![]() |
رقم المشاركة : 128 | |||
|
![]() الله يبارك اخت ابداع المبدعة اله يجزيك ويسكنك الجنة يارب اولادى استمتعو مليح من سنة 15 الى3 سنين رانا نستنو فيك الله يبارك رانى غى ندعيلك اختى مبدعة |
|||
![]() |
![]() |
رقم المشاركة : 129 | ||||
|
![]() اقتباس:
يبارك فيك اختي الحبيبة مرحبا بيك وبيهم
ربي يفرحك بصلاحهم ونجاحهم ياااارب اللهم اميييين اجمعين ياااارب ويجازيك خير حبيبتي على دعائك وكلامك الطيب من القلب وصل للقلب ربي يهنّيك |
||||
![]() |
![]() |
رقم المشاركة : 130 | |||
|
![]() الحلقة 21 كان ياما كان ![]() و ما يحلا الكلام ...إلا بذكر النبي عليه الصلاة والسلام ![]() ![]() ![]() عليه الصلاة و السلام ..... رجع جيش الكفار الكبير لمكة .... رجع مهزوم و خايف ![]() الكفار و اليهود كانوا متأكدين أنهم كي يديروا جيش ضخم و كبير ...راح يقدروا يهزموا المؤمنين اللي يعبدوا ربي سبحانه و ربي سبحانه شاف المؤمنين يدعيوه و يعبدوه و يخطّطو ويجتهدوا... و يوجّدوا بكل قوتهم و يتعبوا و يجوعوا ... وهوما ثابتين و مصممين يربحوا جيش الكفار فربي سبحانه نصرهم وبعث رياح قوية ![]() طيرت وكسرت كل حاجة تاع جيش الكفار و ربي سبحانه خلا قلوبهم تتعمّر بالخوف والرعب و هربوا بسرعة خسرانين و رجع المسلمين لمدينتهم فرحانين بالنصر و رجعوا لديارهم ... و حطوا أسلحتهم ... و رجعوا لشغالهم لكن.... اليهود اللي كانوا في المدينة ...و خانوا و كذبوا على المسلمين و تمصخروا بيهم ... وقالولهم بلّي راهم اصحاب ..و بلّي راح يعيشوا مع بعض في أمان وسلام راحوا في السر... ...يتفقوا مع الكفار باه يخدعوا المسلمين ويقتلوهم لازم يتعاقبوا على خيانتهم.... ![]() سيدنا محمد عليه الصلاة و السلام رجع داره... وحط سلاحه ![]() وجاه سيدنا جبريل عليه السلام و سأله يا رسول الله .. انت حطيت سلاحك خلاص؟ فسيدنا محمد قاله نعم فسيدنا جبريل قاله: ربي سبحانه يخلي الملايكة تحارب و تعاون المؤمنين والملايكة اللي ربي سبحانه بعثها تحارب معاك في الخندق مازال مارجعتش .. لأنه ربي سبحانه أمرها تكمل تحارب .....تكمل تحارب اليهود اليهود اللي خدعوا المسلمين ... ![]() .. يهود بني قريظة سيدنا محمد عليه الصلاة و السلام عاود وجّد روحه للحرب ![]() و هز سلاحه مرة اخرى ... و قال لكل المؤمنين كل من يسمع كلام محمد ويطيعه يروح عند يهود بني قريظة ضرك ويصلي العصر لثمّة.. المسلمين الصالحين الشجعان نفذوا كلام سيدنا محمد و سمعوا كلامه ... و هزّوا أسلحتهم و راحوا عند يهود بني قريظة اليهود كانوا يعيشوا داخل حصون علابالكم وش معناها حصون ؟ ![]() ... يعني بناية كبيييرة و مقفول ... و عندها بوّابات واحد لا يقدر يدخلها حتى كي يفتحولوا اليهود البوابات.. المسلمين الشجعان اتجمعوا حول الحصن نتاع اليهود الخاينين و قالولهم ماناش راح نمشيوا من هنا حتى كي نحاربوكم و تتعاقبوا على خيانتكم وخداعكم... ![]() اليهود كان عندهم أسلحة بزاااااف بزاف داخل الحصن لكن ربي سبحانه خلاّهم ميتين بالخوف والرعب.... و خلاهم مش قادرين يحاربوا المسلمين ولا قادرين يهزوا حتى سلاح بقاو المسلمين قاعدين حول الحصن 25 يوم و اليهود متخبيين في الحصن و علابالهم بلّي خانوا وكذبوا و يستنّاو في عقوبتهم و مش قادرين حتى يحاربوا من كترة خوفهم و رعبهم رئيس اليهود (كعب بن أسد ) جمع اليهود في الحصن و قالهم : أنا عندي 3 أفكار ... أختاروا منها وحدة أول فكرة ... ... اننا نتبعوا كلام محمد رسول الله ؟ .. و نطيعوه و نطيعوا ربي سبحانه ... و نعودوا مسلمين ؟؟ اليهود قلوبهم مليانة عِناد و متكبرين... ردوا عليه و قالوله : لا..لا احنا حانبقاوا يهود .. علابالنا بلّي هو النبي بصّح ماناش راح نتبّعوه قلوبهم كما الحجر و مليانه عناد و تكبر ...حتى وهوما عارفين الصح.. مش باغيين يتبّعوه... ![]() ![]() ![]() رئيس اليهود ( كعب بن أسد ) قالهم : مّالا نقولكم فكرة اخرى .. نقتلوا اولادنا وزوجاتنا ونروحوا نحاربوا المسلمين مادام ماعندناش اهل نخافوا عليهم .... فنحارب بكل قوتنا و واحنا ماناش خايفين على حتى واحد من أهلنا بعد ما قتلناهم برواحنا؟؟ رئيس اليهود(كعب ابن أسد ) من كتر الرعب هبل وعاد يقول أفكار مجنونة اليهود ردوا عليه : وش داروا اهلنا نقتلوهم؟ و لو ربحنا المسلمين يعود معندناش أهل ؟ ![]() ![]() ![]() رئيس اليهود(كعب ابن أسد ) قالهم خلاص نقولكوا الفكرة اللخرة ... غدوة يوم السبت يوم السبت عندنا احنا اليهود عطلة و مانحاربوش فيه و المسلمين علابالهم بلّي احنا اليهود مانحاربوش يوم السبت وش رايكم نخدعوهم ونفاجؤوهم و نهجموا عليهم يوم السبت ؟؟؟ اليهود ...اللي ملا ربي سبحانه قلوبهم رعب قالوله : لاااالا... لالا ما نحاربوهمش بالسبت ![]() ![]() ![]() ![]() اليهود كان عندهم كل حاجة ...أسلحة بزاف ... و طعام بزّاف ... و كان ممكن يحاربوا المسلمين بكل سهولة بصح ربي سبحانه خلاهم ميتين بالخوف و قالوا خلاص ماناش حانحاربوا وبقاو يستنّاو في عقاب المسلمين ليهم و علابالهم راح يكون عقاب الخيانة أشد عقاب ................................................. واحد الناس من المسلمين قالوا لسيدنا محمد : خلينا نحكموا احنا عليهم سيدنا محمد قالهم : اللي راح يحكم على اليهود واحد منكم واحد مسلم اتجرح في المعركة ...اتّجرح في جرّة خيانة اليهود و غدرهم اللي راح يحكم عليهم هو .... سعد ابن معاذ المسلمين قالوا احنا موافقين جا سعد ابن معاذ .... و هو مش قادر يمشي لأنه رجله كان فيها جرح كبيييير بسبّة سهم ضربوه بيه الكفار في المعركة واحد المسلمين قالوله : احكم عليهم حكم خفيف يا سعد لكن سعد ابن معاذ رد عليهم و قالهم : أنا راح نحكم عليهم بالحق و العدل ... راح نحكم بالحكم اللي يرضي ربي سبحانه فالمسلمين قالوا :احنا موافقين سيدنا سعد ابن معاذ قال : كل يهودي خان وكذب وساعد على قتل المسلمين لازم يتقتل ... لكن النساء و الأطفال تاع اليهود مانقيسوهمش .. ونجيبوهم يخدموا ويعاونوا المسلمين سيدنا محمد عليه الصلاة والسلام قال لسعد ابن معاذ : انت حكمت بالحق و العدل وهاذا العقاب اللي ربي سبحانه أمرنا نعاقبوهم بيه ... هذا العقاب اللي يستاهله كل خاين و قاتل اليهود فتحوا بنفسهم باب الحصن ![]() المسلمين دخلوا الحصن نتاع اليهود وش لقاو؟؟؟ لقاو اليهود مجمعين كل أنواع الأسلحة أسلحة بزااااف سيووووووف ...ودروووووع .... و سهاااام و حاجات بزاف موجدينها ... موجدينها باه يهجموا على أمهات و أطفال المسلمين كي كانوا الرجالة المسلمين مشغولين في الحرب مع الجيش الضخم عند الخندق المسلمين جمعوا اليهود الخاينين و قتلوهم جزاء للشر و المكر و الخيانة و الكذب نتاعهم و الحمد لله اللي نجّا المسلمين من شر اليهود و غدرهم و رجع المسلمين يعيشوا في مدينتهم في سلاااام ![]() حبيباتي اليهود اتفقوا مع المسلمين على الأمان .. و أنهم يعيشوا مع بعض في سلام ... والمسلمين عمرهم ما أذوا اليهود ... لكن اليهود الخاينين ...تمصخروا بالمسلمين و بقاو يجمعوا في أنواع الأسلحة في السر واتفاهموا مع الكفار على قتل المسلمين لكن الحمد لله خطتهم فشلت ....و المسلمين عاقبوهم العقاب اللي يستاهلوه و هذا جزاء خيانتهم و غدرهم بالمسلمين ![]() وضركا أمّي ....اليهود المجرمين رجعوا مرّة اخرى بالشر نتاعهم ... في فلسطين .... ![]() ياذيوا في المسلمين و يقتلوهم ![]() ... و يدّيوا في ديارهم و أراضيهم ... ![]() و حتى مساجدهم ![]() لكن بربي ان شاء الله احنا المسلمين نرجعوا كما كنّا أقوياء ... وراح نديروا كل جهدنا وقوتنا ...وندعيوا ربّي سبحانه يوفقنا و باه يوفقنا... لازم نعودوا صالحين و مؤمنين و أقوياء و نخدّموا عقولنا .. باه نطردوهم من أرضنا ... و يرجع الأمن و الأمان للمسلمين بإذن الله ![]() اللهم صل على سيدنا وحبيبنا وقائدنا محمد |
|||
![]() |
![]() |
رقم المشاركة : 131 | |||
|
![]() السلام عليكم ورحمة الله وبركاته |
|||
![]() |
![]() |
رقم المشاركة : 132 | |||
|
![]() موضوع رااااائع انا و عجبتني هههه ماعلاباليش اذا بنتي ثلاث سنين و شهرين تفهم هاذ القصص لكن انا عندي تجربة مع بابا ربي يرحمو كان يشريلي قصص الانبياء في كل مرة و الله الى اليوم نشفى عليهم و متذكرة قصص كل الانبياء لي قراتهم ..ربي يجازيك اختي بصلاح اولادك |
|||
![]() |
![]() |
رقم المشاركة : 133 | |||
|
![]() الحلقة 22 (صلح الحديبية) كان يا ما كان..... ![]() وما يحلا الكلام إلا بذكر النبي عليه الصلاة و السلام وطبعا صغاري الممتازييين راح يقولوا ... بأعلى صوت ... ![]() و عليه الصلاة و السلام ... ![]() سيدنا محمد عليه الصلاة و السلام و المسلمين الشجعان عايشين في المدينة في سلام و امان يعبدوا ربي سبحانه و يصلّيوا و يصوموا و يتعلموا القرآن ... و يشكروا ربي على النعم نتاعه... و كل الكفار الأشرار عرفوا بلي المسلمين أقوياء بزاف و شجعان و مايخافوا من حتى واحد ولا حتى حاجة ...و يحبوا ربي سبحانه ويدعيوه على هاذي كانوا المسلمين دايما يربحوا فالأشرار عادوا يخافوا يقلّقوا المسلمين كي حسّوا بقوتهم و شجاعتهم في يوم من الأيام سيدنا محمد عليه الصلاة و السلام كان راقد و هو راقد شاف حلم (رؤية)... وأي حلم (رؤية ) كان سيدنا محمد يحلم بيه كان لازم يصرا في الحقيقة و كل الأنبياء اللي ربي سبحانه اختارهم كما هو ... كل أحلامهم اللي كانوا يناموها تولّي حقيقية و تصرا في الحقيقة وش حلم (رآى) سيدنا محمد ؟؟ سيدنا محمد حلم بلّي راح لمكّة عند الكعبة ... و هزّ مفتاح الكعبة و كان معاه المسلمين الصالحين وداروا عمرة و طافوا حول الكعبة ... بلا واحد من الكفار الأشرار اللي في مكة ما يقيسهم و بعدها مسلمين حلقوا شعرهم و اخرين قصّروا برك شعورهم سيدنا محمد قال لأصحابه على الرؤية اللي شافها... فالمسلمين فرحوا بزّاااااف ![]() ![]() ![]() لأنهم علابالهم بلي الرؤية نتاعه صلى الله عليه وسلم دايما تتحقّق وبلّي راح يدخلوا مكّة اللي فيها الكفّار و راح يديروا عمرة و بلا مايخافوا من حتى واحد... سيدنا محمد و أصحابه المسلمين وجّدوا رواحهم باه يسافروا مكة ... باه يديروا العمرة .... و ادّاو معاهم "الهَدْي" وش معناها "الهَدْي" ؟ معناها يدّيوا معاهم حيوان من اللي ممكن يذبحوه ويتكل.. كما البقرة او الخروف أو الجمل باه بعد العمرة يذبحوه و ياكلوا منه و يوزعوا لحم بزاف على الناس الفقراء و كانوا يحطوا في رقبة الحيوان هذا طوق ( قلادة) الطوق هذا كانوا يديروهولهم باه كل الناس تكون عارفة بلّي الحيوان هذا لحمه راح يتوزع علي المساكين و المحتاجين بعد العمرة باه واحد مايقيسه لأنه نتاع الفقراء... المسلمين ادّاو الهَدْي ..(يعني الحيوانات اللي راح يوزعوا لحمها على الفقراء كي يديروا عمرة) و بقاو يمشيوا يمشيييوا طريق طوييييلة من مدينتهم الجميلة حتى لمكة وهوما فرحانين انهم راح يشوفوا الكعبة و يديروا عمرة و يوزعوا أكل على الفقراء الكفار الأشرار عرفوا بلّي المسلمين جايين مكة .... وش راحوا داروا ؟؟؟ قالوا احنا راح نخرجوا نحاربوا المسلمين ... وراحوا وجّدوا رواحهم ...و هزّوا أسلحتهم و خرجوا من مكة بسرعة باه يلحقوا المسلمين قبل ما يوصلوا سيدنا محمد عرف بلّي الكفار جاييين يحاربوهم لكن سيدنا محمد والمسلمين حابّين يديروا عمرة ... و مش جايين يحاربوا ... فسيدنا محمد ادّا المسلمين و مشاوا من طريق واحد آخر طريق صعيييب معمّر حجر ... حتى كي وصلوا لواحد البلاصة اسمها "الحديبية" وش اسمها؟؟؟ ..........الحديــــبيــة و قعدوا يرتاحوا لثمّة لكن المسلمين كانوا تعبوا بزاااف من كثرة المشي وبقاوا عطشانين و ماكانش الماء حتي البير لقاوه فارغ فراحوا قالوا لسيدنا محمد ... عطشنا ومالقيناش ماء نشربوا ...فسيدنا محمد خرّج واحد السهم كان معاه و قال لواحد من المسلمين هزّ السهم هذا و حُطّه في البير فسمع كلام سيدنا محمد عليه الصلاة و السلام و غرس السهم داخل البير .... فخرج الما بزاااف وعمّر البير وشربوا المسلمين كامل وشرّبوا الحيوانات اللي معاهم "الهدي" هذاك اللي جابوه... الكفار بعثوا واحد كافر منهم ... عند المسلمين في الحديبية بغاو يعرفوا علاواه جاو المسلمين؟؟؟؟ راح الراجل هذاك فلقى المسلمين معاهم "الهدي " ...حيواناتهم اللي راح يوزعوها بعد العمرة علي الفقراء فعرف بلّي المسلمين مش جايين يحاربوا وماهمش هازّين أسلحة .... مادّيين معاهم غير الحيوانات وزاد سيدنا محمد قاله:احنا ماجيناش نحاربوا ... جينا نديروا عمرة و اذا راكم مصممين على الشر و الحرب ...راح تخلّيونا نحاربوكم رجع هذاك الراجل عند الكفار و قالهم المسلمين ماهمش جايين للحرب ...راهم باغيين يدخلوا مكة باه يديروا عمرة لكن الكفار الأشرار ماهمش راضيين يصدّقوا و باغيين ياذيوا المسلمين راحوا زادوا بعثوا خمسين شاب من الكفار باه يدّرقوا و يتجسسوا على المسلمين عند الحديبية ... لكن المسلمين حكموهم وادّاوهم عند سيدنا محمد ....و سيدنا محمد سامحهم و عفا عليهم و بقاوا الكفار مصممين يحاربوا المسلمين وفرات و مش حابّين يدخلوهم مكة ... وقاعدين يقولوا لو ندخّلوا المسلمين مكة كل الناس راح يحسبونا ضعفاء و ماناش قادرين نحاربوا المسلمين فسيدنا محمد بعثلهم سيدنا "عثمان ابن عفان" باه يقنّع الكفار و يفّهمهم بلّي المسلمين مش جايين للحرب إنما جايين لمكة باه يعبدوا ربي سبحانه و يديروا عمرة ... وثاني باه يزيد يفهمهم في الإسلام سيدنا عثمان ابن عفان راح للكفار في مكة ... و قالهم كل شيء الكفار قالوله خلاص رانا موافقين ... بصّح موافقين تروح انت برك ادّير العمرة وتطوف بالكعبة هوما لالا... سيدنا عثمان ابن عفان قالهم : طبعا لا ..طبعا لا ..أنا مانروحش للكعبة إلا مع سيدنا محمد و مع خاوتي المسلمين المومنين فالكفار غضبوا وادّاو سيدنا عثمان ابن عفان ... وحبسوه عندهم .... و ماخلاّوهش يرجع عند المسلمين المسلمين حسّوا بلّي سيدنا عثمان ابن عفان طوّل... حسبوا بلّي الكفار قتلوه فسيدنا محمد عليه الصلاة و السلام قال ماناش راح نمشيو من هنا غير لا جبنا حقّنا وقعد صلى الله عليه وسلّم تحت واحد الشجرة و قال شكون يبايعني و يتفق معايا : نواجهوا الكفار حتى لو متنا... المسلمين مش راح يخلّيوا حق أخوهم عثمان ابن عفان ابدا... كل المسلمين الصالحين الشجعان اتجمعوا حول سيدنا محمد و كل واحد منهم حط يدّه في يدّ سيدنا محمد و عاهدوه بلّي راح يواجهوا الكفار و يحاربوهم بكل شجاعة حتى لو راح يموتوا... الكفار حسوا بلّي اتسرعوا و بلّي غلطوا لما حبسوا سيدنا عثمان بن عفان ... وراحوا خرّجوه بسرعة و بعثوا واحد كافر منهم ... باه يتصالح مع المسلمين و يتفق معاهم على واحد الاتفاق ..... اتفاق على الصلح بين المسلمين و الكفار .... و سمّاوه صلح الحديبية على اسم المكان اللي قعد فيه سيدنا محمد و المسلمين الراجل اللي من الكفار قال لسيدنا محمد و المسلمين انا جيت نتّفق معاكم باه ادّيروا عمرة ... بصّح مش هاذ المرّة.... لأنّه لوكان تدخلوا مكّة هاذ المرّة وتديروا العمرة الناس كامل راح تضحك علينا احنا الكفار و وراح يقولوا بلّي احنا ضعفاء و خلّيناكم تدخلوا لأننا ماقدرناش نحاربوكم انا راح نتفق معاكم انكم تجيوا العام الجاي تدّيروا عمرة و تدخلوا مكة في سلام وأمان و واحد مننا احنا الكفار مايقيسكم ولا يقلقكم... سيدنا محمد وافق على الشرط وزادوا تفاهموا بلّي الكفار و المسلمين مايحاربوش بعضاهم لمدة 10 سنين الناس تعيش في أمان... لكن هذاك الراجل من الكفار قال أنا ثاني عندي شرط ... لو أيّ واحد مننا احنا الكفار رجع مسلم ... و راح عندكم المدينة من غير مايقوللنا... ماتوافقوش يعيش معاكم...وترجعوهولنا... شرط صعيييييييييييييب بزااااف ... لكن المسلمين وافقوا... و قالوا مش مشكل ..ممكن أي واحد يبقى مسلم في السر بلا مايجي عندنا المدينة و يبقا في مكة ... لكن بقاو غايضهم الحال و قلوبهم فيها حزن لأنهم كانوا يتمنّاو يروحوا للكعبة و يطوفوا و يديروا عمرة ويصلّيوا و يذكروا ربي سبحانه سيدنا محمد قالهم نرجعوا للمدينة و المسلمين داروا كما سيدنا محمد... ناض صلى الله عليه وسلّم و ذبح "الهدي"نتاعه ... و حلق شعره حتى هوما حلقوا شعورهم و ذبحوا "الهدي" نتاعهم ووزعو لحمه` ....ورجع المسلمين مع سيدنا محمد و معاهم عثمان ابن عفان للمدينة ... البلد الطيب الجميل.... و بعدما فات العام... رجعوا المسلمين و سيّدنا محمد لمكة كما كان الاتفاق و دخلوا مكة في سلام و أمان .... باه يديروا العمرة و كانوا فرحانيييييييييييييييين وسعداء و هما يصلّيو و يطوفوا بالكعبة.... و واحد من الكفار ماقاسهم في مكة... لأنّه هذاك هو الاتفاق اللي داروه عند الحديبية ....صلح الحديبية )و كما شاف سيدنا محمد عليه الصلاة والسلام في الحلم (الرؤية داروا المسلمين عمرتهم و عبدوا ربي سبحانه و صلّاوا في سلام و أمان و رجعوا المدينة فرحانيييييييين بنعمة ربي سبحانه اللهم صلّ وسلّم وبارك على سيدنا وحبيبنا محمد ![]() وين رايحين لولاد؟؟؟؟ ![]() ![]() ![]() حبيت نطلب منكم حاجة.... ![]() ادعو لخالتو ابداع بصددددق بالاكو تنساو ![]() |
|||
![]() |
![]() |
رقم المشاركة : 134 | |||
|
![]() حبيبتي ابداع يرزقنا ربي واياك زيارة بيته الحرام......بارك الله فيك مضوع أكثر من رائع.....انا كنت نحكي لأبنائي بنفس الطريقة واليوم هما كبرو وراهم في الجامعة والثانوي....ما شاء الله عليهم ...بصح ذكرتينيي....وقلت كي نروح لبيت أهلي لازم نجمع احفاد العائلة ونحكيلهم لما لا....خير ما يجتمعو على القباحة والمناوشة.....ياك راكم تشوفو كي نتلاقاو في العطل مع اهالينا كيفاه اصبحا نعانيو ونشتكيو من سوء المعاملة ...والعاقل يعل الشرادة ن الاخرين.....رانا شوفو في جيل....الله يلطف....لهذا حبيبتي ابداع فكرتك قلت نطبقها مع ابناء العائلة الكبرى....ونولي انا الحكواتي نتاعهم......هههه....يعطيك صحيحتك......وما تمناي..... |
|||
![]() |
![]() |
رقم المشاركة : 135 | |||
|
![]() السلام عليكم ورحمة الله وبركاته |
|||
![]() |
![]() |
الكلمات الدلالية (Tags) |
السيرة للأطفال |
أدوات الموضوع | |
انواع عرض الموضوع | |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc