الجزء 180 من الكوزينة (رمضانكم كريم )

[أم يوسف2]

سلام كوكا وشراكي اختي والله ماعلابالي حابة نذير القاطو وقادرة ندير مي وخفت ينوض يبكيلي بصح كي نصحتيني نحاول
زخرفة مليح تديري الحلوى في بلاصتي وتبعتيلي خخخخ شوفي شدي عجينة الصابلي وديري منها اشكال عديدة خخخخ
والجماعة ان شاء الله تكونوا كامل بخير
الاخت لي قالت بلي راهي مزيضة السكري الحمدلله على كل حال هكدا ولا اكثر حاولي تتأقلمي معاه برك ولازم تشزبي الدوا. ماتخليش روحك انا عجوزتي وشيخي في زوج مراض بالسكري والضغط بصح يشربوا دواهم فالوقت ووالفوه ودايمن يقولوا هادي حلجة تاع ربي بالشفا عليك اختي

[cilia]

صباح الخير عليكم يا وجوه الخير
نهاركم مبروك ، اسمحمولي مرانيش ندخل بزاف الانترنت راهي مقطوعة في الدار و في الخدمة معنديش كامل الوقت و تانيك الكونكسيون عيانة هبلتني المنتدى ميحبش ينحل مرانيش عارفة الا كامل عندكم هذا المشكل او غي أنا
المهم شفت كامل طيابكم ما شاء الله يهبل بصحتكم و ربي يزيدكم الموائد تحفة
حيوتة مبروك على اختك التوأم يترباو في عزها ان شاء الله و تشوفهم من الصالحين

[cilia]

ام يوسف واش ؤاكي حبيبة و واش راه البيبي يادرا كاش قباحة و لا عاقل

[رزيقة16]

صحة رمضانكم يا الغاليات ا صحة فطوركم نشالله متكونوش نسيتوني رني دخلت باش نقولكم راني زيدت و الحمد لله عندي بنوتة سميتها سيليا
عندي 20 يوم حتي لليوم باش قدرت تدخل عيت شوية غلي خاطر زيدت با العملية

[zokhrofa]

صح فطوركم كاااامل

و صحيتو بزاف على المساعدة نرجعهالكم ان شاء الله

هاوليك تطبيقي لخبز ماري



و درت الجواز تاع اللفت اخيرا هههه تاع ماري برك زدت فيه راس الحانوت و الباطاطا و درتو بالداند ماشي باللحم ماصورتش هههه كنت مزروبة لكن ذوق شبااااااب

[RIMA.87]

السلام عليكم ،
أختي ام وسيم مبارك عليك السكن و ان شاء الله يكون عتبة خير و العاقبة للخت حياة و كل محتاج للسكن و مبارك التوأم عند اختك حيوتة ربي يحفظهم و يجعلهم من الصالحين ،
و الاخت رزيقة16 الحمد لله على سلامتك،بارك الله لك في الموهوب لك و شكرت الواهب و بلغت اشدها و رزقت برها ان شاء الله و ربي يحفظلك الحلوة سيليا ،
اخواتي في الله رمضان مبارك و ان شاء الله تكونوا بخير و عافية ،
ما شاء الله على الاطايب لي حطيتوها كل اخت باسمها ،
اسال الله ان يبارك لكم و لنا في الرزق ،اللهم ارزقنا شكر نعمك،
اللهم تقبل منا الصيام و القيام و صالح الاعمال ،و اشف مرضى المسلمين و ارحم موتى المسلمين و ارزق الأحياء منهم يا ذا الجلال و الاكرام .
راني مرة على مرة نصور يعني بالنفحات هههه و احيانا خياتي يبعتولي كي يصورو.
أولا و آخرا نحمد الله و نشكره على نعمه .
تفضلوا بسم الله ،الحلو تاع اختي لي اصغر مني و هي آخر العنقود ربي يحفظها و يسترها و يوفقها في حياتها الخاصة و المهنية و جميع بنات المسلمين .


و هذا طبق دجاج في الفرن مع صلصة حمرا و بطاطا مقلية من عند اختي ام مريم.


و البارح جربت مطلوع الكوشة للاخت فريال جزاها الله خيرا جا ما شاء الله لكن للامانة اضفت كمية تاع سميد و جا ما شاء الله .


و هذي كوكا درتها بالشكشوكة طرشي و بصل و طماطم وطبقت العجينة البرونزية للاخت امنية غفران نقولك اختي امنية جزاك الله خيرا و ربي يرزقك من فضله ،جات احسن من العجينة المورقة و عجبت العايلة و مع زدت حمرتها زيادة جات تقرمش ما شاء الله و بعثت منها ذواقة و طلبو وصفة العجينة


و هذا بوراك بالسلق و الجبن و البيض بالديول صنع منزلي بوصفة ام وليد ناجحين ما شاء الله ،و جربت وصفة الاخت الصوامعية من المنتدى كذلك نجحتلي جزاهن الله خيرا .


و اخيرا تورت من اروع ما يكون بالسلق و الجبن و الزيتون ،ما شاء الله عجبتهم ،درتها اكثر من مرة .




نقوللكم في امان الله

سبحانك اللهم و بحمدك اشهد ان لا اله الا انت استغفرك و اتوب اليك

[x ام رحاب x]

السلام عليكم ورحمة الله وبركاته

دعاء اليوم الثامن عشر من شهر رمضان
" اَللّهُمَّ نَبِّهني فيهِ لِبَرَكاتِ أسحارِهِ ، وَ نوِّرْ قَلْبي بِضِياءِ أنوارِهِ ، وَ خُذْ بِكُلِّ أعْضائِي إلى اتِّباعِ آثارِهِ ، بِنُورِكَ يا مُنَوِّرَ قُلُوبِ العارفينَ

[x ام رحاب x]

اريج نورتي حبيبت قلبي اهلا وسهلا بيك كوزينة نورت

[أمنية غفران]

السلام عليكم و رحمة الله تعالى و بركاته

أخواتي الكريمات نهاركم مبروك

أختي مرضية ان شاء الله ما يكون غي الخير قاتي راكي مازال مع التحاليل ما تقلقيش روحك بلاك راهو طلعلك شوية برك سكر و ان شاء الله ما يكون غي الخير و ارمي حمولك على ربي سبحانه

اختي ريمة اطايبك تبارك الله يعطيك الصحة انتي وخياتك ربي يحفظهم و فرحت بزاف كي جربتي كوكة بالعجينة البرونزية و عجبتكم ربي يحفظك

زخرفة عجبوني خبيزاتك و اخيرا طيبتي اللفت ههههههههه شفتي الروابط الي حطيتهم لك على مقروظ ام اماني و حلويات اسمهان

أختي رزيقة مبروك ما زاد عندك ربي يكبره في طاعته ما جبتيلناش الطمينة اممممممممممممم

ام يوسف سيليا اريج و حبيبتنا ام رحاب نورتو الكوزينة

حيوتة راهي غايبة عسى المانع خير

أخواتي راني شاركت في مسابقة طي المناديل هيا اضربو طلة باش تتستفادو ان شاء الله

https://www.djelfa.info/vb/forumdisplay.php?f=518

و ان شاء الله رايحة نحط ليكم طيات بسيطة و جميلة انتظروني

[zokhrofa]

هههههههههههههههه امينة اخيرا ايه الحمد لله لي جا بنين

امينة صحيتي بزاف على الروابط تاع ام اماني المقروط يبان بالطبع و الشان راح نديرو هو ان شاء الله

قوليلي واش رايك كان نديرو هاذ الاسبوع يبقالي شباب حتى للعيد ؟

[أمنية غفران]

المشاركة الأصلية كتبت بواسطة zokhrofa

هههههههههههههههه امينة اخيرا ايه الحمد لله لي جا بنين

امينة صحيتي بزاف على الروابط تاع ام اماني المقروط يبان بالطبع و الشان راح نديرو هو ان شاء الله

قوليلي واش رايك كان نديرو هاذ الاسبوع يبقالي شباب حتى للعيد ؟

مرحبا زوزو نهارك مبروك

مقروظ ديريه عادي هايل و ليلة او ليلتين قبل العيد عاوديله التعسيل فقط

راني ناوية ان شاء الله نديره هاد الويكاند

و البارح راني بديت في الحلوى درت المعمول درك نجيب لك تشوفي الصورة من البلا



حقا مازال ما حطيتيش مشاركتك في المسابقة خلينا نشوفو ابداعك

تحياتي

[zokhrofa]

هاتي هاتي نشوف

بصح قوليلي طريقة كيفاش تخبي القاطو باش يبقى يبان جديد

خاطش تعرفي كاين لي دور ريحتو

[أمنية غفران]

المشاركة الأصلية كتبت بواسطة zokhrofa

هاتي هاتي نشوف

بصح قوليلي طريقة كيفاش تخبي القاطو باش يبقى يبان جديد

خاطش تعرفي كاين لي دور ريحتو

الحلوى الي نديرهم نحطهم في باطة و نخبيهم في الثلاجة فقط ماشي المجمد و يومين قبل العيد نجبدهم و ما يصرالهم والو أختي ما نخبيش عليك هادي طريقتي لأني عاملة و ما عنديش الوقت علابيها لازم نلقاو حلول كيما البارح راني خطفت و درت المعمول و درك اللليلة ان شاء الله ندير نوع اخر و راني نفكر في حلوى النمرة و حلوى اخرى لحبيبتنا ام اماني راهو عاجبني هادا بالاك نديره

https://www.djelfa.info/vb/showthread.php?t=1214786

حبيت ندير حلويات بسيطة فقط للفال

و انتي حبيبتي ادا عندك الوقت ديري الحلوى في غرضك

[وردة الرمال43]

سلام حبيباتي ان شاء الله راكم بخيرالمهم نطمنكم راني زيدت والحمد لله سلكت على خير كانت صعيبة شوية مع شوية خلعه لانو الطفل شربلي الما ولكن درك الحمد لله
سميتو وسيم عبد الرحمان ربي يسترو ويحفظو وعقبال للي مزالو ان شاء الله

[بيلسان91]

المشاركة الأصلية كتبت بواسطة وردة الرمال43

سلام حبيباتي ان شاء الله راكم بخيرالمهم نطمنكم راني زيدت والحمد لله سلكت على خير كانت صعيبة شوية مع شوية خلعه لانو الطفل شربلي الما ولكن درك الحمد لله
سميتو وسيم عبد الرحمان ربي يسترو ويحفظو وعقبال للي مزالو ان شاء الله

الف مبروك يتربى فعزكم نشالله