كي تسهروا مع نت تصرالكم ولالا

[*سندوسة*]

عندما دخلت التكنولوجيا في حياتنا خاصة نحن الجزائريين خربطت كل امورنا واصبحنا احيانا مهملين نوعا ما

حنا فدار كل واحد وعنده لميكرو نتاعة
الوالدة تتصفح النت بحاسوب البيت وانا بالميكرو بورطابل والاخ بالايباد والوالد يشاهد التلفاز ههه ويسقسي الوالدة كانش اخبار فالنت

ويسقسي خويا كانش جديد فالفايس بوك ههه بصح انا مايسقسينيش يعرفني راني لاصقة في منتدى الجلفة هه مرات كي ماما ماتبغيش تقراله يقولي ماماك قراتلي غير العنوان كمليلي ههه اسلوب التشويق

على فكرة الوالدة عندها عضوية هنا فالمنتى بصح ماتشاركش

المهم قوانين البيت تناول وجبة العشاء مابين 8 او9

وكي تكمل سندوسة غسيل لماعين وتطلع للغرفة نتاعها وكل واحد يكون مبرونشي فالميكرو نتاعه حتى كي تلحق 11,30 ولا 12 نتاع ليل حتى نسمع كل مرة واحد يتسلل للمطبخ ههه

مرة ياكلو فالمطبخ ومرة يطلعو للاوووول

مرات الوالد كي نخرج فيه يقولي ران سهران وجعت هههه

ومرات الوالدة تنزل هي تاني الوالد كي ينزل للمطبخ يبغي مرافقة هه نظن يخاف مظلمة

ومرات اخي وهو لي يردلي المطبخ كيما مسرح الجريمة
نلقى شكارة نتاع لحليب حالها فوق البوطاجي هه وقشور الموز فوق الطابلة ومرات غطاء قارورة العصير تحت الطابة والقرعة فارغة ههه

ومرات يجي لعندي للغرفة نروحو للمطبخ نقليله البيض ونديرو لومبيونص فالكوزينة ههه نقوله نتا وجد الفرماج والكاشير والكاس نتاع العصير

وكي يكمل نقوله قعد معايا حتى نظف المطبخ مسكين يقولي نشلل معاك لماعن نقوله غير لاهيني بالهدرة

ومرات صباح نلحق على كارثة نجي ندير لقهوة نلقى جريمة واثار نتاعها وحتى سلاح الجريمة ولكن بعد التحقيق وتتبع الاثار نعرف الجاني

ونبدا في عمليةالتمشيط هه

نتوما ضرك قولولي يصرالكم هكذا انت اخي او اختي كي تسهرو مع نت تجوعو فليل وتروحو تاكلو ولالا

انتظر مغامراتكم