الباك راح .... اللي قرا قرا من سبتمبر ( تم اضافة الأدب وباقي المواد )

[طالب له هدف]

السلام عليكم ورحمة الله وبركاته
معكم طالب متحصل على تقدير 17 في باكالوريا 2017 - بفاصلة تقارب معدل 18 -
نعيطيكم خلاصة الموضوع ....
.
.
.
.متخافوش
لاداعي للخوف والارتباك ..الذي يصحبه - عادة - تانيب الضمير الدراسي ، وفي بعض الحالات حتى البكاء والشعور بالضياع والوقت يمضي دون ان تفعل شيء يذكر ... فقط تنظر في المراجع والامتحانات والكتب والملخصات هنا وهناك دون حركة ... فقط دوامة تجعل "تتخيل وتتوهم ' انك فعلا فشلت وضاعت الباكالوريا و راحت مصاريف وامال وتعب والديك هكاك بلا فايدة ..... متلقاش ما دير تلقى روحك دور في الفايسبوك ساعات وساعات ، وتارة هنا في المنتديات ، مع كراس / مرجع مفتوح موضوع فوق الطاولة ... وانت تكمل تكونكتي ، ( وفي داخلك يقتل فيك تانيب الضمير الدراسي -- لان هذا الوقت المفروض تدرس وتراجع فيه بكل جد وتعب لنيل الشهادة ,,,, )
..
.
.
.
.شفتي الحالة المذكورة اعلاه .. كل طالب اجتاز الباكالوريا فات عليها بطريقة او باخرى ...لكن بدرجات متفاوتة ...
كلنا جتنا لحظات كرهنا حاجة اسمها الباك .. و توهمنا اننا فشلنا وضاع حلم البكالوريا ومعه آمل الوالدين ...

متخافوش,,, راهو مزال الحال .... والله يا خاوتي غير مزال الحال

عندك كي تقرا الجملة هذه .. تكمل ترقد وتكونكتي وتفرح ... وتكمل سباتك العميق
لا ...
لازمك تجمع انفاسك وتبدا الآن ...

.
.
." ما اسهل هذا الكلام ...!! " "هذه الكلمات قريناها عشرات المرات بلا فايدة " ... " جيب الجديد !! " .. " كلمات التحفيز / التنمية البشرية ماتنفعش معايا "
على الأقل احدى هذه العبارات ترددت في اذهانك و " كملت على همك " يا طالب البكالوريا القارىء لهذه الكلمات ... صح ؟؟؟

هانا وصلنا للرسمي .. كيفاه تبدا من الآن ؟؟؟؟؟ ( عندك دروس لم تفهمهم ؟؟؟ تشعر - او انك فعلا - لم تحل قدرا كافيا من التمارين ؟؟ انت متاخر بزااااااااااف trop retard ؟؟؟ كلش داخل في بعضاه وماكمش مكمل حتى مادة ؟؟؟؟؟


ميهمش .... كمل برك اقرا معايا الموضوع .... وصدقني راك تقدر تعوض من ذرك وتفوت اللي بدا من سبتمبر ....

واش دير ؟!

1) اول حاجة -واللي هي اهم حاجة - وكون مديرهاش يروح كلش اللي رايح نقولو من بعد ...... وهي الصلاة في وقتها وهذا عن تجربة يا خاوتي .. او مش غير كي يجيب الباك باه نتفكروا الله جلا جلاله .. نجحتي اولم تنجح .. الصلاة فوق كل اولوياتك و هي فرض وركن من اركان ديننا الحنيف .. لازم تصليها في وقتها وخصص يوميا وقت تقرا حتى صفحة واحدة من القران .. مثلا بعد صلاة الظهر وفترة المراجعة المسائية ..ديرها فترة نقاء وصفاء تجمعك مع خالقك الله جل جلاله .. مع مداومة الاستغفار

2) الطرق الثانوية - بعد السبب الاول - للانطلاق بقوة من الآن:

الرياضيات :
كل وحدة من الوحدات هز الملخص من كتاب المغني ... (هانا قلنا المخلص فقط ماشو تروح للتمارين) .. هز الملخص وعاود اكتبوا في بداية كناش / blocnote/ كراس صغير ... من بعد روح لتمارين "مصفاوي عبد العزيز ".. خاصة في الدوال الاسية واللوغاريتمية .. وقم بحلها من الاول تمرين بتمرين .. حل تمرين كامل ثم شوف الحل .. وهكذا ... الحاجة اللي ابهرتاك ولقيتها فكرة رائعة (حتى طرق حل الاستاذ) .. قم بتدوينها فورا في الكناش تحديدا وراء الملخص اللي اكتبتيه من من كتاب المغني .... وهكذا حتى تكمل تمارين الدالة الاسية تاع مصطفاوري كاملة .. من بعد روح للبكالوريات اذا كنت علمي .. حل - حاليا ولضيق الوقت - مواضيع تاع علمي فقط وركز عليهم بزاق ... اذا كنت تقني رياضي .. حل تاع تقني رياضي برك وركز عليهم .. والفكرة اللي تلقاها ارجع اكتبها ...... اذا مفهمتيش حاجة روح طول لليوتيوب للاستاذ نور دين .... وهكذا مع اللوغاريتم ثم المتتاليات ...
تنبيه : شرح الاستاذ نور دين رائع لكن ما يعيبه - في نظري - طويل وياخذ الكثير من وقتكم .. لذا كيما قلتليكم استعمل هذه الفيديوهات كي متفهوش حل تمرين تاع باك ( ولا حتى تاع مصطفاوي لان سلاسل هذه الاخير خليط من بكالوريا علمية وتقنية ... مع اني متاكد انكم ذرك تفهموا على طريقة حل الاستاذ مصطفاوي لانه يوضح كلش) و حاجة اخرى .. تبعوا كل فيديوهات الاستاذ نور الدين فيما يخص المناقشة الوسيطية ( هنا قلت لكم كلها) لان يشرح جل الحالات المتوقع طرحها بطريقة رائعة .... وكل حالة ( مناقشة افقية ، مائلة ، دورانية ) اكتبوها في الكناش كيف كيف .. خاص هاك العفايس تاع الامتياز :مناقشة وسيطية فيها قيمة مطلقة .. فيها كسر .. فيها فكرة ,, تبعوا الاستاذ نور دين هنا يكفي ويوفي ....

تنبيه 2: اذا وصلت لمرحلة ماعرفتي تحل حتى تمرين عادي ... شوف الحل وتعلم وعاود وكثف التمارين .. حتى احيانا كي تعرفش تحسب كاش نهاية ولا لقطة .. عادي هز الفكرة دونها وتدرب عليها وواصل مشوارك ....

تنبيه 3 : العام هذا قربولكم وحدة الاحتمالات وهذا يدل على احتمال ورودها .. ومتقدروش تقول ماقريناهاش ....هههه لاننا في الاعوام الماضية كان في اخر العام .. كانت الوزارة تخاف تجيهالنا .. يولوا يخرجوا الطلبة يقولوا ماقريناهش .. والاساتذة قالو لينا متدخلش ... وعندنا ثلج وزلزال .. ودرنا اضراب ... الخ
دونك ركزا على وحدة الاحتمالات مليح لانها جتكم في وسط العام ... كيفاه تقروا ؟؟؟ انا العام اللي فات ماركزت عليها ( لانها كانت في ذيل الترتيب ) لكن استطع في ظرف ايام الالمام بالاساسيات وجمع افكار لاباس بها تقدر تحل بيها اي تمرين نموذجي... كيف ؟؟؟ هنا ايضا اقول لكم فيديوهات الاستاذ نور الدين ....رائعة في الاحتمالات ملخصات ممتازة وتمارين نموذجية طيح هي بعد في الباك ... اقروا ملخص كتاب المغني في الاحتمالات وروح شوف تمارين في اليوتيوب .. الاستاذ نور دين في الاحتمالات يحل - غالبا - كل تمرين في فيديو واحيانا اكثر ... انتوما واش ديروا - حسب رايي - على الاقل حل 25 تمرين .. على الاقل او ... مفيهاش او ... لازم right ؟؟... عاود اكتب نص الاسئلة تاع التمرين ثم الحل النموذجي .. اكتب نص التمرين ثم الحل النموذجي .. باه تهز الطريقة وتفهم مليح .. والافكار اي تتعاود بشكل او باخر ..

اما الاعداد المركبة والهندسة الفضائية عادية جدا ... نفس الطريقة المذكورة اعلاه بالنسبة للدوال ( مخلص المغني ،، تمارين مصطفاوي ، تمارين البكالوريا .. تدوين الافكار ومراجعتها اسبوعيا '

كي تكملوا ... الاستاذ مصطفاوي عندو 18 موضوع مقترح للبكالوريا ( موجود على النت ) طلوا عليهم وحلوها


العلوم الشرعية
الحمد لله وبعد توفيق من الله تحصلت على العلامة الكاملة في باك 2017 علوم شرعية
ماهو الملخص الذي استعملته ؟؟؟؟
1) افضل ملخص - في نظري - هو كتاب الخرائط الذهنية للاستاذ فوزي غراب - يوجد في الانرنت حملوه وقوموا بطباعته .. ليس فيها الكثير من الصفحات .... لكن لايكفي
لهذا قلت لكم قوموا بطباعته ... هناك عناصر لا توجد في هذه الخرائط الذهنية ... اذا روحوا لكتاب" جمال مرسلي" ... والعناصر الجديدة اكتبوها بخط ايديكم وزيدوها في الخريطة الذهنية
مزالت اتذكر العناصر التي اضفتها كانت بكثرة في الدرس الاول والثاني .. ومصادر التشريع وغيرها الكثير .. وزيدوا روح للبكالوريا كاين اسئلة متلقاوهش في حتى مرجع .. اكتبوا التصحيح النموذي لهذه الاسئلة وزيدوها في الدرس الموافق في الخريطة الذهنية ..

وبهذا تكون عندك خريطة ذهنية كاملة شاملة .. تدخل لقاعة الامتحان "وانت فرحان" ان شاء الله
تنبيه : كل باك في العلوم الشرعية من 2008 حتى 2017 كاين فكرة جديدة .. اذا اكتبوها كيما واصيتكم ... وركزا على منجهية الاجابة .. واكنتبوا اكبر قدر ممكن في العناصر في كل اجابة .. لانه احيانا التصحيح يكون حاط 6 عناصر كل وحدة عليها 0,25 وانت تكون كتبتي 4 برك ... مع انك حافظ par coeur .. راحت النقاط هكذاك ... so be careful

التاريخ والجغرفيا
المصطلحات والتواريخ والشخصيات والرسومات والخرائط .... اعتمودا على كتاب محمودي عادل الازرق ... الازرق
لكن الدروس ناقصة وغير كاملة ... لذا نصحكم لتحصل على درس شامل كمل على (دروس كتب محمودي عادل الازرق ) بكتاب اسمه الوجيز لكمال هشام و ابحث عن حوايج جديدة في التصحيحات النموذجية للبكالوريا واكتبها واحفظها .. وركزوا على منهجية الاجابة وعدد العناصر المطلوبة ... والمقدمة والخاتمة .. راهي كل وحدة فيه 0,5 .... ولاتهمل طريقة التعليق على الخرائط والاشكال البيانية اليك هذا الموضوع سيعلمك المنهجية حتما
https://www.djelfa.info/vb/showthread.php?t=1949291

متنساش كي ترسم منحنى بياني .. التاطير .. سلم الرسم ,, العنوان ... التغير المدروس على المحاور .. الخ

الفيزياء

حاجة رقم 1 ... لم اعتمد على تمارين ولا على دروس الاستاذ المدعو " عبد القادر قزوري " ... هاذي وحدة ... ولا على الأستاذ فرقاني فارس ..
اذا على ماذا اعتمدت ؟؟
اولا : فهم الدرس جيدا ... من اليوتيوب فقط ... هناك استاذ رائع ومبهر .. ربي يجازيه خير اسمو : الاستاذ شريفي ... هذا الأستاذ - والله - لن تجد مثله... طريقة شرحه رائعة ، بسيطة وسلسلة ,.,. استفدت بنسبة كبيرة جدا ... جزاه الله كل خير ... كل فيديو له هو فيديو قيم ورايح تستفيد اكيد ... وفي حالة ما اذا مفهتيش عليه ( وهذا مستبعد جدا جدا ) روح للاستاذ مولاي عمار ( مع اني لم اشاهد فيديو واحد لهذا الاخير ) فالاستاذ شريفي كي تبعوا كل فيديوهاته حول وحدة ما ...رايح تفهم ليه ليه ...حتى الميكانيك والاهتزازات والاسترة جرب ورد لي الخبر ....

ثانيا : التمارين /// افضل واحسن مرجع دون منازع ............ كتاب المغني بجزئيه ولامجال للنقاش في هذا .. هذا احسن مرجع واشتريه احسن .. ومن لم يشتريه اقول له فاتك الخير الكثير ... كل التمارين رائعة دون استثناء .. الكتاب عمرتو بخربشات قلم الرصاص ههه كل تمرين يفاجئني بفكرة بعفسة --جديدة شرح ممتاز ... واكثر من هذا رايح تلقى معاه في نهاية كل وحدة تمارين الباكالوريا ( علوم تجريبية وتقني وراء بعض) ومعاهم حل مفصل .... راهو كم هائل من العفايس والافكار والتمارين ...ربي يبارك ويجازي مؤلف هذا الكتاب .. فهذا المرجع فقط كفيل بجعل ملم بالمادة .. وفعلا تحس روح متكمن صح من الفيزياء ... وزيد في اخره تلقى مواضيع مقترحة وعفايس اخرى جديدة ... يا للهول هههه ...

تبقى كيما يقول في اللحظات الاخيرة .. كيما يسموها "لمسات الاخيرة " ..هناك تمارين قوم فقط بحلها شفهيا ( لانو يكون الوقت مبقاش بزاف ولا داعي للارتباك ) لهذا قلت ليكم حلوها بعيــــنيكم برك والفكرة الجديدة اكتبوها ... انها تمارين "الدروس الخصوصية للأستاذ غريب" ' اps لعفسة تاع باك 2017 ' استنتاج التصبن ( تمرين الاسترة ) وحوايج اخرى طاحوا نسخة طبق الاصل من هذه السلاسل

تنبيه 1 : يوجد دائما تمرين تجريبي .. اذا - ومثلا -في الوحدة الرابعة هناك التمديد يجب حفظ البروتوكول و فهمه جيدا+المعايرة ph مترية يجب حفظ الرسم و البروتوكول + بروتوكول في الاسترة. .. والاسئلة النظرية تلقوها بكثرة في كتاب المغني ,,,بكثرة في كل الوحدات .. قوموا بكتابتها .. فهي مهمة جدا
فقط ,,,,هذا على ماذا اعتمدت... والله المستعان ....

الفرنسية


"سهلوها تسهال " ... للعلميين هناك 3 وحدات ( النص التاريخي ،، النص الحجاجي ، النداء ) ـــ،ــ كتاب واحد فقط كفيل بتحقيق الامتياز في هذه المادة .. هذا الكتاب اسمه " المراجعة النهائية " غلافه ازرق .. للاسف اكتشفته في اخر العام -في افريل- .. بصح اسلوبه بسيط جدا يخليك متلهف لاكماله ومفيهش صفحات ياسر ... رايح تتعلم منو القواعد ..( ونسبة طرح الاسئلة على القواعد ضئيل جدا ، كل الاسئلة حول فهم النص .).. النصوص المطروحة نموذجية ... تخليكم تتمكنوا من المادة وتكتشف حوايج يحاسبوا عليها وانتوما ماتعرفوهاش .. وتتعلموا قداه من حاجة من صفحات هذا الكتاب ....انصحكم به وبشدة

نصيحة رقم 1 : فقط - في نظري - لا تعتمدوا على ال comte rendu الموجود في الكتاب ... هذا هو العيب الموجود في الكتاب فقط ..
س : هل اخترت في الوضعية الادماجية تعبير كتابي او compte rendu !؟؟

اخترت وانصحكم بالcompte rendu .. واذا كنت تعرف طريقتو .. معناها 4,5 هدية راهو ساهل يا خاوتي غير متتخلعوش.... انا اعتمدت على compte rendu اللي مدهولنا الاستاذ ( المفتش ) الذي درسنا في القسم في اول العام .. وكاين ناس جابت بيه 5/5 ..هو في كراسي .. وللاسف كراسي ليس عندي .. عطيتو يديروا عليه فوطو كوبي وراح من واحد لواحد .. لذا سامحوني الوثيقة ليست عندي ........................

نصيحة 2 : كل نص تقروه من كتاب المراجعة النهائية .. هزوا الكلمات اللي تتعاود جيبوا ورقة بيضاء اكتبوها واكتب بجنبها شرحها باللغة العربية .. الكلمات المفتاحية تتعاود في الباك غير تهناو ,, يعني انتوما واش ديروا ... مثل - على سبيل الحصر - النص التاريخي ,, جيبوا ورrة ولاكاش كراس .. اكتبوا الكلمات التاريخية التي لم تفهموها والمصطلحات التاريخة وحذاها شرحها بالعربية ... وطل عليها يوميا .../// العفسة هذه .. ديروها في texte historique برك متضيعوش الوقت .... لان texte argumentatif كل موضوع عندو مصطلحاتو ,,, يكفيك حل نماذج من كتاب المراجة النهائية ... وفي الوحدة 3 ( النداء ) فقط تعرفوا les formules .. كيفاه يبدا النص وكيف يتم فقط من النماذج المقدمة ..

....هذا يكفي وزيادة في الفرنسية ....


الإنجليزية

هنا هناك قواعد لازم تتعلموها ( ماشو كيما الفرنسية ) القواعد تتواجد بكثرة ... اليكم هذا الملخص المميز للقواعد فيه كلش ( زبدة الموضوع ) هنا
https://eddirasa.com/%D9%85%D9%84%D8...4%D8%AB%D8%A7/

الانجليزية مكانش مرجع ... او بالاحرى لن تحتاجوا لاي مرجع ... متوسوسوش رواحكم شفتوا اقروا واحفظوا الملخص اللي موضوع فوق ثم اليكم بعض المصطلحات التي تتكرر : https://www.mediafire.com/file/d132n...document+4.pdf
لكنها لاتكفي وناقصة هاني حذرتكم زيدوا انتوما كي تحلوا البكالوريات اكتبوا الكلمات التي تتكرر .. ففي الانجليزية ال vocabulary يتعاود كيما هو في الوحدات الثلاث ... تذكروا هذا جيدا ...

نصيحة اخيرة تعتبر الاهم : الفقرات .... هنا يجب عليكم تحضير فقرات محورية ( كيما يقولو مفيهاش.. ) او لازم يا خاوتي ,,كل وحدة اكتب على الاقل 4 فقرات محورية وهكذا ...

الأدب العربي
درستها في الأيــام الأخيرة .. مادة سهلة والقواعد اسهل من السنوات السابقة . كاين اما شعر او نثر
س: ماذا اخترت شعر او نثر ؟؟
الاساتذة اخبرونا ان النقاط تكون كارثية في النثر ( وهو فعلا صعبا من حيث التراكيب .. ) وتحاسب كلمة كلمة ... لاننا في الباكالوريا ولسنا في امتحان السانكيام .. يعني تجاوب على اسئلة البناء الفكري كوبي كولي تهز جملة طويلة من النص واكملت الاجابة ..لالا .. لازم تعاود تصيغ الاجابة باسلوب يدل على فهمك لما بين سطور النص . و روح القي نظرة على النثر الذي جاء في باك 2017 ... الجميع هرب مسرعا للشعر من اول لحظة .... .. الشعر عموما اسهل اذا فهمتي النص ( ولست مطالبا بفهمه كلمة كلمة .. فقط المعنى العام للقصيدة .. وتحس روح انك حر في الاجابة عن البناء الفكري ...... باختصار
النثر : عموما صعب في اسئلة البناء الفكري / سهل من ناحية البناء اللغوي ( الاعراب وغيرها )
الشعر : عموما الاسئلة مقبولة في البناء الفكري .. / تحتاج لقليل من التركيز في البناء اللغوي .. فقط

ملاحظة: فقط في باكالوريا 2015 كسرت هذه القاعدة ... اذ جاء موضوع النثر سهل جدا جدا .. وهذا واضح للعيان .. و اخطؤوا في اسم الشاعر في القصيدة ... يعني انتوما ادرسوا النثر والشعر ( هي القواعد راهي نفسها فقط احفظوا الخصائص برك ) .. ويوم البكالوريا .. شوفوا الموضوع اللي فهمتوا السند تاعو مليح ( شعر او نثر ) واتكلوا على الله .....

س : ماهي افضل المراجع المعتمدة لمراجعة الأدب ؟؟

لا تكثروا المراجع وماتخلطوش عليكم الدعوة ...
هناك ملخصات شاملة وشبه كافية للاستاذ بشير بلعيد حمل من هنا https://www.mediafire.com/download/o...auca1/arab.rar
( لخص البرنامج في صفحات .... بارك الله فيك ) انقر فقط على الرابط لترى دقة واجمالية هذه الملخصات ( 7 صفحات فقط )

ملاحظة حول هذه الملخصات : احفظوها وافهموما كيما هي ... ولا تنخدعوا بالمصطلحات يوم الامتحان والباك... لانهم يلعبوا على المصطلحات لارباك الطلبة .. مثلا
الشعر الحر = شعر التفعيلة = الشعر الحديث ( لان كي تبحث في الانترنت تلقى خلط كبير ... ) يعني كي تحفظ من مخلصات بشير بعيد خصائص الشعر الحر ( واسماء رواده ) .. هذه الخصائص هي نفسها للشعر الحديث وشعر التفعيلة ...

خصائص ادب المهجر = خصائص المدروسة الرومانسية = الرابطة القلمية .... وهكذا ( المذهب = المدرسة= التيار )

- واياك وان تحفظ كل اديب وخصائصه ... حذاري ...( متضيعوش وقتكم ) مثلا تحفظ خصائص ابن خلدون وحدو .. وتروح ايليا ابو ماضي وحدو , وكل شاعر وكاتب لوحده ...., يعني يلزمك اعوام باه تكمل و ستنسى كل شيء .. هذه طريقة خاطئة .... لذا احفظو بالتيار / المدرسة ... مع تذكر الاسماء
مثلا : ذكر في السؤال اذكر خصائص ادب " ميخائيل نعيمة " .... فكر انت ... ميخائيل نعيمة من المدرسة الرومانسية .. اذن خصائص المدرسة الرومانسية هي نفسها خصائص ادب ميخائيل نعيمة .....

ذكر في السؤال ..خصائص ابن خلدون ... فكر شوي .. ابن خلدون يعتمد على النثر العلمي .. اذا خصائص النثر العلمي هي نفسها خصائص ادب ابن خلدون .. وهكذا ...

تنبيه ضروري : شفتو المدراس والتيارات الادبية ..تذكروها اذا قال لكم في السؤال """"من الناحية الفنية ، الادبية ،، او المضمون """ اما اذا قال لكم في الشعر من ... "" الناحية الشكلية "" هنا احذروا راهو يقصد خصائص "شعر حر " ام " شعر عمودي " ... ..(الشِّعر العمودي فيه شطرين صدر وعجز هو الشعر الي قريتوه في السنوات الماضية ، أما الشِّعر الحر فهو يتكوّن من شطر أو سطر واحد.)

تنبيه ضروري 2 : لماذا قلت سابقا ملخصات بشير بلعيد شبه كافية .. لانه ينقصها عناصر تعد على اصابع اليد ( عناصر مهمة جدا غفل عنها الاستاذ بشير بلعيد "... يعني هزوا سيالة وزيدوا وراء الصفحة السابعة هذه العناصر المهمة جدا :

-- الفرق بين الشعر الحر والشعر العمودي
بالنسبة للمدارس :
-- خصائص المدرسة الرمزية .. + 3 اسماء من اهم روادها
-- خصائص المدرسة الكلاسيكية + 3 اسماء من اهم روادها
بالنسبة للنثر :
--خصائص النثر العلمي + روادها ، اسماءهم فقط ( ابن خلدون ، ابن بطوطة ، ابن كثير ,, الخ ) ( اعتفد ان هذا العنصر مذكور في الملخص وزيدوا تاكدوا )
-- خصائص الصنعة اللفظية ( مهمة جدا ) ( = خصائص المدرسة الواقعية )
بالنسبة للشعر :
-- خصائص الشعر التعليمي + 3 اهم رواده ( ابن الوردي ... اول درس قريتوه وغيره )
-- خصائص الشعر الاجتماعي .. واهم رواده
-- خصائص الشعر الثوري السياسي الملحمي الثوري + 3 اهم رواده ( مفدي زكرياء .، محمود درويش.... الخ ) ( يوجد نوعين من الشعر السياسي وطني وقومي .. الخصائص راهي نفسها .. فقط اذا كان وطنيا ( يتحدث الشاعر عن وطنه مثلا مفدي زكرياء عن الجزائر .. محمود درويش عن فلسطين .). اكتب عند ورقة الاجابة في البكالوريا : " خصائص الشعر السياسي الوطني " وسطروا عليها وبينوها مليح للمصحح .. لان بعض المصححين ان لم كلهم يحطوا عليها 0,25 او حتى 0,5 .. حتى وان لم تذكر في التصحيح النموذجي ...
واذا كان قوميا ( الشاعر يتحدث عن وطن ليس وطنه الاصلي بدافعة القومية والدم الواحد والثقافة المشترك ولطرد المستعمر .. مثلا نزار قباني " من سوريا " يتحدث عن القضية الفلسطينة .. وهكذا ... ) اكتب في ورقة الاجابة .. خصائص الشعر السياسي القومي

-----------
الخصائص على الاقل اذكر 4 خصائص على الأقل .. ولا تتجاوزا 4 .. اربعة فقط

+ توضيح : محمود درويش على سبيل المثال .. هو اديب رومانسي .. لكنه كتب في الشعر السياسي .. لذا الخصائص تكون على حسب الموضوع المتناول في النص ...

بالنسبة لنثر ابيات القصيدة + التلخيص .... اطلعوا على كلمات الاستاذ في هذا الموضوع المميز https://www.djelfa.info/vb/showthread.php?t=2131399
------------
هذا فقط + الاطلاع على البكالوريات السابقة مع التصحيحات النموذجية ..... هذا فقط ما يلزمك في الأدب العربي ...

هدية اخيرة : كونوا منطقين في الاجابة في مادة الأدب العربي كيف ؟؟
مثلا في الشعر : قال لكم مانوع الشعر اذكر خصائصه ؟
اوتوماتيكيا.. الاجابة تكون محصورة في 3 اجابات محتملة لا غير وهي ( اما الشعر تعليمي - او شعر اجتماعي او شعر سياسي ثوري ) الاجابة حتما تكون واحدة من هذه الاحتمالات لان هذا هو واش مقرر عليكم في برنامج الباك .. يعني متغردوش خارج السرب ..

مثلا قال لكم في النثر .. ما نوع النثر ؟؟
الاجابة تلقائيا تكون محصورة في ثلاث احتمالات لا غير ,, وهي اما ( نثر علمي - او مقال - قصة ، مسرحية ) ومستحيل تجيكم في الباك قصة او مسرحية يعني نحو الاحتمال تاع نوع النثر قصة ( يعني اما مقال او نثر علمي فقط ) ... لماذا مستحيل تجيكم ؟؟ لان القصة والمسرحية بناء متكامل متسلسل .. تروح جملة يروح المعنى .. لازم كي يجيب ليكم قصة او مسرحية يكتبها كلها من الاول للاخر او مايكتبهاش .. وهذا محال .. لان السند النثري محدد بعدد الاسطر في الباك .. يعني ماتجيكش غير تهانو .... بصح عندكم اذا جاء نثر في العنوان تاع ( كلمة مسرحية او يحكي على تطور المسرحية وتطور القصة ( باك 2017 ) تروح تجرو تكتبوا نوع النثر : مسرحية ، قصة ... لالا هو مقال في هذه الحالة .... اذا اتصفوا بالذكاء ....

حاجة اخرى : احفظوا خصائص المقال من الملخصات اعلاه ... والمقال فيه انواع : سياسي ، اجتماعي ، ,,,الخ .. واذا تخلطت عليكم الدعوة ومعرفتوش نوع المقال ... متكتوبش نوع المقال .... المهم اكتبوا نوع النثر : مقال واذكر خصائصه ..

اذا قال لكم الي اي تيار ينتمي صاحب النص
اذا كان شعر :
ما هي الاحتمالات المتوقعة : اما مدرسة رومانسية ، او رمزية ، او كلاسيكية .. فقط ( شفتو قداه ساهلة مادة الادب العربي ) عندك 3 احتمالات تخير منهم فقط

اذا كان نثر
ما هو التيار الادبي الذي ينتمي له الكاتب .. ؟؟؟؟؟
احتمال 90 بالمئة ..... هو من رواد الصنعة اللفظية واذكروا خصائصها ..

..... ولكي لا تذهب لكم النقاط هكاك .... كي تكبوا مثلا الاديب ينتمي الى المدرسة الرومانسية زيدوا افتحوا قوس واكتبوا ( = الرابطة القلمية = وهو من ادباء المهجر ) .. باه المصحح مايقاش وين يتنفس معاكم خخخ


الفلسفـــــة

تحصلت على 13,5 من منجهية تحليل النص فقط ،، لم ادرسها بتاتا ...( لا في الفصل الاول ولافي الثاني ) ....في نصف أفريل اطلعت فقط على منهجيات الاستاذ شهاب الدين وركزت على منهجية تحليل نص ( طريقة الاستاذ شهاب في تحليل النص رائعة مختصرة على شكل رؤوس اقلام تحتوي اهم العناصر للـلازم تكون في الاجابة وانت من بعد توسع وهز عبارات من النص وكمل وزيد من الملخصات المذكورة اسفله ) ... اليكم بعض المنهجيات الخاصة بالاستاذ لكن ينقصها منهجية تحليل نص ... https://www.djelfa.info/vb/showthread.php?t=2047605 وارسل لي الأستاذ بعض مقالاته .. تعلمت منها كل شيء فهي مرتبة منظمة.. لكن ارسل لي الوحدات الاولى وجزء من الثانية فقط ..( راسلوا الاستاذ على صفحته في الفايسبوك للحصول على المقالات الاولى فقط ) . وللاسف توقعات الاساتذة للعام السابق 2017 عكستها المواضيع المطورحة في الباكالوريا ...وجتنا مقالات لم تكن في الحسبان ... لذا اغلب الطلبة لجؤوا لتحليل النص ...
لا يمكنني ان انصحكم اكثر في هذه المادة ... لكن اقول لكم : "لا تعطوا الفلسفة الكثير من الوقت "... فقط عليكم باتقان المنهجيات الاربع ( المقارنة -الجدل- استقصاء بالوضع- تحليل نص ) وهزوا افكار من هنا وهناك لتعرفوا واش تكتبوا في ورقة الاجابة ... مثلا العام الماضي نصح الاستاذ الدين بهذه الملخصات : https://www.bacalgeria.com/philosoph...84%D8%AB%D8%A9

هذه الملخصات رائعة جدا ستفيدكم + منهجيات الاستاذ شهاب الدين = "باذن الله" تخدموا مليح في الفلسفة


العلوم الطبيعية

تجاوب على كلشي صحيح لكن النتيجة ضعيفة... السبب يرجع إلى نقص المنهجية الصحيحة ( التحليل .. التفسير ..الاستنتاج ,, استغلال الوثائق ) ...اذن اهم سؤال يطرح كيف تتعلم المنهجية ؟من اول العام وانتوما تسعموا في هذه الكلمة : " لعلوم لازملها المنهجية " المنهجية هي الأساس في العلوم "" كلشي على المنهجية " .... اذا عليكم باتقان مايسمى ( منهجية الاجابة ) كيف ,.......؟؟؟
.
.
.
.من أنشطة الكتاب المدرسي هذا هو المصدر الوحيد لتعلم منهجية الإجابة لذا اسرعوا واستدركوا مافاتكم ... كيفية استغلال الكتاب المدرسي ..؟؟ سهل جدا .. عليكم اولا بهضم كل انشطة الكتاب المدرسي دون استثناء ... حل الانشطة تجدونه في كتاب رائع اسمه " الهباج " فيه حل مفصل واستثنائي ... مثلا وحدة تركيب البروتين .. اول خطوة تروح للكتاب المدرسي .. تحلهم نشاط بنشاط ثم تتطلع على الحل .. ثم تقرا ملخصات قيمة للاساتذة ... س : ماهو افضل ملخص للعلوم ؟؟

..
.
.ملخصات الاستاذ مصطفى بن خريف - تحت اسم مجلة المجتهد هي الافضل .. اسلوب سلسلة ، كلمات مفتاحية ، ملم بالدرس من اغلب النواحي .. رسومات بخط اليد .. بارك الله في صاحب هذه الملخصات .. احيانا -قلت احيانا -تلقو خطا مطبعي فيها فقط .. حملوا كل الوحداث دون استثناءمن الوحدة 1 حتى للتركيب الضوئي والتنفس والتخمر ... احفظوها كلمة كلمة ... هي الأساس

بالمناسبة في العلوم الطبيعية : الحل يكون شفويا في التمارين وليس كتابيا كالفيزياء والرياضيات ... اذا قمت بحل التمارين كتابيا يجيكم الباك وانتم ماحليتو والو وتندمو ... لازم شفويا .. اقرا التمرين كاملا ثم اجب عن الاسئلة شفويا ( حتى التحليل والتفسير ديرو شفويا ) ثم اطلع على الحل ... واعرف نقاط ضعف .. تبقى مسالة الرسومات .. خصص في كل الاسبوع وقت ديرو للتدرب على الرسومات المقررة عليكم ( موجودة في ملخصات بن خريف مصطفى ) وارسموها وعاودوها حتى تتمكنوا من كل الرسومات .. فهذه الاخيرة تعطي انطباع للمصحح انك متقن للمادة .. لاتنسوا العنوان والتاطير والبيانات .. كلشي بقلم الرصاص ,,, ولا للالوان
+ عليكم باستغلال الوثاثق .... يعني تجاوبوا حسب الوثيقة و بعض من الذي تحفظون ... و ليس العكس

..... ثم تجي مرحلة جمع الافكار والتدرب على تمارين عدة ....
1) اول وافضل مصدر للتمارين هو ( البكالوريات علوم تجريبية ,,ورياضيات ) مع التصحيحات النموذجية والدقة المطلقة ...
2) البحث عن افكار الكتاب المدرسي بقالب مختلف .. س : اين اجد افكار الكتاب المدرسي بشكل مختلف ؟؟.................. في كتاب اسمه المجتهد لمؤلفه بودربالة
شوف البكالوريا وقارنها مع ما ورد في هذا الكتاب... ورد لي الخبر ... ( اطلعوا ايضا على الملخصات الموجودة في المجتهد )

3) الافكار الممتازة ... تجدونها في تمارين ممتازة للاستاذ " بوالريش احمد " تماريناته رائعة تثبت لكم المعلومات وتعطيك عفايس لا يستهان وهو ياخذ ايضا من البكالوريات الاجنبية ... وكل شيء في هذا التمارين لا تهملوه ...( بوالريش احمد اعتمدوا على تماريناته فقط وليس الدروس )

هل اعتمدت على كتاب احمد امين خليفة ؟؟؟
لا .. في رايي انتم لستم بحاجة إلي هذا الكتاب باجزائه الثلاثة .... تضيعون الوقت فقط ... لازلت اتذكر العام الماضي الكل ينصح به .. وخاصة المتفوقين منهم... كل ما نسمع كلمة "علوم"لازم يجي من وراها كلمة " كتاب احمد امين ".. لا ادري لماذا يقولون انه مفيد ؟؟ .... عن نفسي اقول لكم لن تحتاجوا اليه اصلا .... وانتم احرار في الاختيار ..
بالاعتماد على الطريقة المذكورة فوق تمكن من اتجاوز العلامة 18 في الباكالوريا .... - الحمد لله -

ملاحظة : ان صادف وان لم تفهموا احد الدروس او فكرة معقدة ... توجهوا للفايسبوك ( الاستاذ أحمد كلواز ) يقوم بعمل حصص مباشرة للدروس و التمارين و بإمكانكم سؤاله و هو يجيب ... او توجهوا لموقع الدراسة .. ( هذا اذا لم تفهموا الدروس ... )
------------------------------------------------------
سيقول البعض عندم يقرا الكلام فوق ... هذه الطريقة المفروضة نطبقوها من اول العام ... وحاليا بقا 3 اشهر وراح الحال ... .
مزال تقدر تبعها من الآن ويكفيك الوقت .. فقط اعطي جل اهتمامك للعلوم وادرسها باستمرار وماتفشلش " مبقاش قد للي فات ... " فهي المعامل الاكبر ..

[طالب له هدف]

حاجة اخرى ... بالنسبة للرياضيات .. اذا معرفتوش او مفهمتوش حاجة وملقيتوش حل تاعها .. يوجد الاستاذ بوص ربي يجازيك خيرا .. سيبسط لكم الفكرة لاقصى درجة وتخرجوا من منتديات الجلفة فاهمبين ان شاء الله

[Miss Princess]

Mercii bcp frère
ربي يحفظك ويوفقك إن شاء الله
في انتظار التكملة

[*افكار*]

الله يحفظك ويوفقك بارك الله فيك
شكرا على النصائح القيمة
دعواتك اخي

[عبدالرحمان 31]

شكرا جزيلا خويا

[عزيزة aziza]

شكرا اخي بارك الله فيك هل من نصائح في الادب

[المُعادلة الصّعبة]

والله موضوعك عجبني خلاص
رتحتلو وحبيتو
وشجعني من اعماق اعماقي
حسيتك كتبتيه بكل اهتمام
وخصوصا اللهجة مهيش بعيدة عليا ياسر ههه م الشرق ياك ؟
ربي يبارك فيك ويفرحك خويا
نتمنى كون تكون من ولاية تبسة تاعي بعد لانو كاين موضوع مخوفني
شفتي الاستاذة تاع الاجتماعيات قالتلنا الوجيز مليح هايل بصح العيب لي فيه انو ما بقاوش يمدوا عليه نقاط فالآونة الاخيرة -تحكي على ولايتنا هي-
قالتلنا تالمون يستعملوه التلاميذ ولاوا يحسبوا اي واحد يكتب من الوجيز معناها نقل " دار كوبياج"
انا خفت من هدرتها
بصح في نفس الوقت نطمن في روحي لانو الوجيز مبقاش كيما بكري شايع ياسر او محمودي عادل هو لي انتشر في كل مكان وزمان
طمنني خويا قداش جبتي فالاجتماعيات انت
وهل اعتمدتي الاعتماد التام على الوجيز في حفظ الدروس ؟
وثانيك بغيت نسقسيك اسكو الخرائط الذهنية لفوزي غراب هذاك ضروري ؟
انا من بداية العام نطبع في جمال مرسلي ونحفظ منو ويعجبني ونرتاحلو ووالفت بيه يعني باغية نكمل بيه هو برك ياخي نورمال ؟
وثانيك عندي سؤال اخر
انا منيش من ذيك الجماعة لي متاخره هذاك التاخر التاخر ال....فظيع
قريت كل محور وكل وحدة في وقتها والحمدلله
يعني بديت من سبتمبر
وحليت عدد معتبر من التمارين ولكن نحس مهومش كافيين
لاني شفت مواضيع الرياضيين مش كي تاع العلميين
تاعكم تقريبا يتعاودوا سيرتو فالرياضيات
بصح تاعنا كل عام يجيبوا افكار جديدة وصعيبه نوعا ما
علابيها نشوف مهما حليت ما يكفيش
وضرك معنديش من واش نحل المصادر فضوا
حتى فالفيزيا المصادر لي عندي والمراجع حليت منهم كامل حابة الافكار الجديدة
الحقيقة مزلت كي نتلاقا بتمارين فيها افكار جديدة نحصل ميش متمكنه هذاك التمكن يعني مزال عندي نقائص
مممم ونصائحك حول تنظيم الوقت من فضلك
علابالي كثرت كثرت على ما وصاوني ههه
مندري اصلا اذا فتحتي الموضوع هذا للاستفسارات ولالا
و انا ما رحمتكش
نتمنى تكون متفهم الفترة لي رانا فيها
بارك الله فيك بانتظار تكملتك انا في المتابعه خويا

[|~أحْـﻶمـღ وًرديـَّہ*|]

شكراا لك اختي

قلت ان الشريعة كل عام فكرة جديدة والله يبارك العلامة الكاملة هل وجدت نفسك مطلعة على تلك الافكار الجديدة واستطعت الاجابة ام قمت بالاجابة حسب فهمك ؟ ارجو انك فهمتي قصدي

[طالبة لها هدف]

لقد طمنتني حقا
فقط اريد سؤالك عن شيء حيرني مثلا في باك العام الماضي كاين في تمرين النووي السؤال الاخير تع احسب الطاقة حنا سؤال كيما هذاك ما تطرقنالوش في لكلاسة كيفاش ندير ولا وش من مرجع نلقى فيه مثل هاته الاسئلة بين قوسين كيفاش نقدر نلم بكل شيء

[-Queen Of Dreams-]

مرحبا
حابة ن سقسيك
يعني نتا مابديتش من سبتمبر ولا كيفاش
انا راني حرة ومزال قاع مابديتش غير كيما بديت عندي 3 أيام برك اسكو يكفيني الوقت صح للامتياز ولا صايي راح الوقت
للعلم راني نقرا فالجامعة باراميديكال
راني حاسة الوقت مايكفيش قااااع قولي يكفيني او نو وطريقة تنظيم الوقت
نتا قلت ملخصات نكتبو تاع المغني لكن هناك من يقول لازم نديرو ملخص شخصي
عندي ملخصاتي تاع العام اللي فات لكن حابة نعاود جدد ضرك ندير كيم قلت نتا نكتب تاع المغني ولا ندير ملخص شخصي تاعي
طريقة التعامل مع العلوم رجاءاااااا هيا اللي ضيعتني العام ا للي فات نقاطي قاع ممتازة نقطة 12 فالعلوم هبطتني قاع
وشكرا

[طالبة لها هدف]

وش تنصحني في الادب
حقا اطمح للعلامة الكاملة
وش من مرجع ولا ملخص
و فيما يخص الحفظ انا انسق بين كراريسي و ملخص مرسلي و محمودي الاخضر

[طالبة لها هدف]

اتمنى حقا انك ديرلنا موضوع خصيصا لمادة العلوم

[!~•عًــ سُــيّــدٍ ــلــيّ •~!]

شكرا لك اخي

[طالب له هدف]

المشاركة الأصلية كتبت بواسطة Miss Princess

Mercii bcp frère
ربي يحفظك ويوفقك إن شاء الله
في انتظار التكملة

شكرا على مرورك أختي ... وفقكم الله وسدد خطاكم

المشاركة الأصلية كتبت بواسطة *افكار*

الله يحفظك ويوفقك بارك الله فيك
شكرا على النصائح القيمة
دعواتك اخي

العفو ،، ربي يوفقكم

المشاركة الأصلية كتبت بواسطة عبدالرحمان 31

شكرا جزيلا خويا

العفو يا عبد الرحمان .. Good luck

[طالب له هدف]

المشاركة الأصلية كتبت بواسطة عزيزة aziza

شكرا اخي بارك الله فيك هل من نصائح في الادب

العفو ... سيتم اضافة الجزء الخاص بالأدب ..

المشاركة الأصلية كتبت بواسطة المُعادلة الصّعبة

والله موضوعك عجبني خلاص
رتحتلو وحبيتو
وشجعني من اعماق اعماقي
حسيتك كتبتيه بكل اهتمام
وخصوصا اللهجة مهيش بعيدة عليا ياسر ههه م الشرق ياك ؟
ربي يبارك فيك ويفرحك خويا
نتمنى كون تكون من ولاية تبسة تاعي بعد لانو كاين موضوع مخوفني
شفتي الاستاذة تاع الاجتماعيات قالتلنا الوجيز مليح هايل بصح العيب لي فيه انو ما بقاوش يمدوا عليه نقاط فالآونة الاخيرة -تحكي على ولايتنا هي-
قالتلنا تالمون يستعملوه التلاميذ ولاوا يحسبوا اي واحد يكتب من الوجيز معناها نقل " دار كوبياج"
انا خفت من هدرتها
بصح في نفس الوقت نطمن في روحي لانو الوجيز مبقاش كيما بكري شايع ياسر او محمودي عادل هو لي انتشر في كل مكان وزمان
طمنني خويا قداش جبتي فالاجتماعيات انت
وهل اعتمدتي الاعتماد التام على الوجيز في حفظ الدروس ؟
وثانيك بغيت نسقسيك اسكو الخرائط الذهنية لفوزي غراب هذاك ضروري ؟
انا من بداية العام نطبع في جمال مرسلي ونحفظ منو ويعجبني ونرتاحلو ووالفت بيه يعني باغية نكمل بيه هو برك ياخي نورمال ؟
وثانيك عندي سؤال اخر
انا منيش من ذيك الجماعة لي متاخره هذاك التاخر التاخر ال....فظيع
قريت كل محور وكل وحدة في وقتها والحمدلله
يعني بديت من سبتمبر
وحليت عدد معتبر من التمارين ولكن نحس مهومش كافيين
لاني شفت مواضيع الرياضيين مش كي تاع العلميين
تاعكم تقريبا يتعاودوا سيرتو فالرياضيات
بصح تاعنا كل عام يجيبوا افكار جديدة وصعيبه نوعا ما
علابيها نشوف مهما حليت ما يكفيش
وضرك معنديش من واش نحل المصادر فضوا
حتى فالفيزيا المصادر لي عندي والمراجع حليت منهم كامل حابة الافكار الجديدة
الحقيقة مزلت كي نتلاقا بتمارين فيها افكار جديدة نحصل ميش متمكنه هذاك التمكن يعني مزال عندي نقائص
مممم ونصائحك حول تنظيم الوقت من فضلك
علابالي كثرت كثرت على ما وصاوني ههه
مندري اصلا اذا فتحتي الموضوع هذا للاستفسارات ولالا
و انا ما رحمتكش
نتمنى تكون متفهم الفترة لي رانا فيها
بارك الله فيك بانتظار تكملتك انا في المتابعه خويا

اللهجة التبسية معروفة يا اختي .. ونحن نعرفوا بعضانا من الهدرة برك هه... نعم نحن من نفس الولاية : )
من الجيد ان الموضوع ألهمك وشجعك للمضي قدما .. وفقك المولى وسدد خطاك ---

بخصوص الاجتماعيات خصوصا ومواد الحفظ عموما ( فلسفة وعلوم شرعية ) .. في تبسة كل واحد كيما يقولو " يغني بهواه " خالف تعرف.. كل عام يجيبوا هدرة جديدة ... المهم - حسب تجربتي تحصلت على 18 في المادة - يعني.. كما قلت لك ( المصطلحات ، التواريخ ، الشخضيات ، الرسومات والخرائط احفظي من كتاب محمودي عادل الأزرق ) بالنسبة للدروس لايكفي هذا الكتاب .. لازم تروحي للوجيز وتهزي منو برك العناصر الجديدة التي لاتتواجد في م, عادل الازرق .. وضيفاها في الكتاب على شكل اوراق صغيرة ولصقيها او اي طريقة اخرى .. + لازم تروحي للبكالوريا كاين اسئلة جديدة لاتوجد في اي مرجع ( تاع فهامة ) اكتبي التصحيحات النموذجية ( للبكالوريا تاع علمي فقط .. الموضوع الاول والثاني ) تاعها واحفظيها رايحة تفيدك ... وكاين اللي حفظ على الوجيز وماجابش النقطة وكاين للي حفظ عليه وجاب الامتياز .. وكاين لحفظ على م,عادل وخرج باقصى تقدير 11 ,, وكاين لي حفظ عليه وجاب نقطة عالية .... يعني كل شيء على حسب طريقة الاجابة وتجاوب على حسب موضوع السؤال .. مكاش تشوف اي كلمة ( مثلا الاتحاد السوفياتي ... تروح ترمي خبط عشواء اي عنصر يجيك في بالك ) ( ولا تقرا كلمة اقتصاد التنينات والنمور تروح تكتب برك ... لازم تكتب على الأقل 6 عناصر .. تصب في محتوى السؤال .. وهذا تتعليمها من التصحيحات النموجية للباك ...( لازم تو تروحوا للتصحيحات النموذجية للباك لانها هي الرسمي متخلوش كي يوصل ماي )
حاجة اخرى اغلب النقاط للطلاب تروح في الوضعيات الادماجية ..لذا احرصي على ان تكون المقدمة ( عليها 0,5 ) في سطرين , سطرين ونصف لااكثر .. هزي كلمات من الجملة قبل السؤال وكلمات من السؤال وكلمة ولا زوز من العناصر اللي رايحة تجاوب بيهم واربطي بيناتهم في سطر او سطرين .. العرض ....- عن نفسي .. وقالها لي العديد من الاساتذة .. في- التاريخ والجغرافيا .. لاتكتبي على شكل فقرة ’’متكتبيهاش فقرة ... اكتبي العرض كيما حفظتي... على شكل عناصر - مطات - تحت بعضاهم
ثم روحي للخاتمة مطوليش فيها .. سطرين على الاكثر

بخصوص الخرائط الذهنية فوزي غراب
بالنسبة لي هي مهمة جدا وفي ثوان معدودة تقدر تلقى الجواب في البكالوريا لان الدرس ملون ومنظم في صفحة او صفحتين ترتيب منطقي يترسخ في مخك اصلا ( بعد اضافات جمال مرسلي والتصيحيحات النموذجية ) .. لكن لكل منا طريقته في المراجعة .. كم تعلمين طرق المراجعة كالبصمات الوراثية تختلف من شخص لاخر .. وكل واحد واش يخرج عليه .. وانا نشوف فيك استفدتي صح وعاونك كتاب جمال مرسلي .. دونك حالتك هذه -
حذاري ..ماتعاوديش الحفظ و متهزي حتى ملخص جديد .. فقط نوصيلك هزي العناصر الجديدة الموجودة في الخرائط الذهنية وتصحيحات البكالوريا النموذجية وزيديها في كتاب جمال مرسلي ... ( هاني قلت ونعاود الـعناصر جديدة برك ماشو تلقى تعريق مختلف- للصحة النفسية والجسمية مثلا- تعاود تكتبيه . ,.لالا هكاك رايحي تعاودي ا زيرو ويروح عليك الحال .. فقط عناصر جديدة ...)

بالنسبة للنقطة الثالثة
انقل لك هذه النصيحة
" فلتعلم أنّه لا أحد يكون جاهز لأيّ امتحان ، من ينتظر أن يكون جاهز سينتظر طول عمره ، هكذآ هي نفسية الانسان و وساويس الشيطان لن تتركك ، يظهر لك أنّك نسيت كلّ شيئ و تعتقد أنّك ستفشل و غيرها من الاحباط الذي يؤثّر على معنوياتك ، لا تنخدع بأجواء الامتحانات و اسم البكالوريا ، ركّز و استمر فحسب ... فلا شيئ يستحق ، اعطي كلّ ما لديكْ و الله الموفّق هو الذي سيرى الخير لك في النجاح أو لا ، في التفوّق أو لا ..."

اقري هذه النصحية وعاودي .. هي نصيحة ولوجه الله
حاجة اخرى .. كيفاه تقولي مبقاتش المراجع .. يعني تريدين المزيد المزيد ؟؟؟ اسمعي ذرك نقول هدرة ( ليس تلك الهدرة المثالية تاع اقرا 20ساعة في النعار ..حل 100 تمرين اقرا ماترقدش .. متتنفس .. راهو الباك راهو ... .. هذه كلمات هدامة ماهيش نصائح ...)
كونك رياضية معينيش تقتلي روحك وتخنقي روحك .. ومتتنفسيش وتقري الدروس الخصوصية عند 3 اساتذة ( الجمعة والسبت تفوتيها غير طالعة هابطة .. اساتذة تبسة تاع الدروس الخصوصية نعرفهم مليح لهذا قلت لك هذا الكلام ) .. فقط اعطي المات وقت اكثر من البقية واهتمام زايد شوي فقط .. مثلا الدوال ا .. كل باك فيها دالة اسية على الاقل والاخرى حتما لوغارتمية.. دونك من 2008 حتى 2017 مواضيع ع,ت عندك حوالي 20 تمرين دوال بالحل المفصل .. ثم تروحي للتقني رياضي .. تحلي الدوال تاعهم .. وتزيدي مواضيع الرياضي تاعكم من 2008 على 2017 ؟؟ يعني شوفي برك بعين العقل قداه من تمرين دوال حليتي .. وزيدي كل موضوع فيهم زوج تمارين تع هندسة فضائية و 2 اعداد مركبة 2 متتاليات ... يعني راهك كم هائل وزيدلهم تمارين مصطفاوي و18 موضوع مقترح خاص ( رقم 14 15 16 17 18 ) تاع مصطفاوي " فيهم عفايس ...؟؟ مع تدوين الافكار هاني نعاود .باه تتفكريهم .. يعني كون دير كيما قتلك برك .. هاكي تولي طيري في الدوال وباقي الوحدات وتلعبي بيهم لعب ...( الجبر فقط زايد عنكم ركزي عليه وحلي le max مع تنوع الافكار فقط ) .. وتفكري اذا زاد الشيء عن حده انقلب ضده ..
فكرتيني في مقول قالها لينا احد الاساتذة ( اكم تحلوا في الصعيب والصعيب .. ووقت لي يجيكم الساهل متعرفوش تحلوه ) قلنا كيفاه ... لي يحل الصعيب مايعرفوش يحل الساهل ؟؟؟ قال لينا في الباك نعم ... يعني قصدو ركزا على التمارين النموذجية والافكار المعقولة .. والله المستعان
وحاجة اخرى مهمة جدا متدخليش بعقلية لازم نجيب عشرين .. لازم نجيب العلامة الكاملة... حذاري ثم حذاري .. يما ناس نعرفهم دخلو بعقلية الvinght وهوما رياضيين .. طاح ليهم سؤال جديد ولا زوز معرفوهش دخل بعضاهم وراحوا فيهم .. مع انو كل واحد عليه 0,5 او 0,75 كاقصى تقدير .. لذا ادخلي قولي باسم الله.. الله المستعان وحل الاسئلة قدر استطاعتك ...واذا جات عفسة معرفتيش متخافيش .. يروحك في اقصى الحالات والكواراث 0,75 ... او اقل 0,5 ... يعني مايروحلكش تمرين كامل .. علاه ؟؟ شوفي اسئلة البكالوريا الكل ( رياضيات وفيزياء ) كي يجيبك عفسة جديدة .. واش يقولك ؟؟ يقول اثبت ان ... شفتي ولا لا ... يقول اثبت ان باه حتى اذا معرفتيهاش تقدري تحلي باقي التمرين في عقلك ومورال طالع ..لان واضع الاسئلة علابالو بالظروف الطارئة يجوكم 3 اسئلة جديدة تدخلو بعضاهم و البنات طيحوا دوخوا خخخخ والذكور يهزوا يكسروا الزجاج ويقلبوا الطاولات ويكسروا الكراسي .. وتجي l'ambulance تجري من لهيه وتولي دراما على جال امتحان بسيط اسمو الباك .. لذا على المترشح ان يدخل مرتاح وفرحان مهما كانت النتيجة لان حتى نفسك تعبت معاك هذا العام .. good luck ... ربي يوفقكم جميعا