انتظر مساعدتكم

[الشاوية*]

السلام عليكم ..
عندي ضياف مهمين و حابة نسقسيكم نحطلهم لي قاطو و سلطة فواكه تكون مزينة بالمكسرات و الشونتي ..و واش رايكم نزيدلهم نوع من المملحات مافهمتش ممكن تعاونوني باقتراحاتكم مع الوصفة المجربة ..
و ادعولي ربي يسهللي ربي يحفظكم

[zokhrofa]

اهلا اختي

ما فهمتش واش قصدك

كي يدخلو حطيلهم ماء بارد و عصير مع قاطو خفيف هذي السنيوة تكون فوق الطابلة كي يدخلو ماشي حتى يدخلو باش تحطيها

من بعد قسرو شوية خليهم يرتاحو من الطريق

و فطريهم

اولا تحطي السلطة و كي تشوفي اول واحد كمل ماشي تنوضي تروحي تجيبيلو الطبسي الثاني خليهم يكملو كامل باش تجيبي الطبق الرئيسي

من بعد كي يكملو كامل حطي الفاكهة و التحلية مع بعض و كل واحد يخير واش ياكل

[الشاوية*]

ماشي عرضة نتاع غذا ...حابة نسقسي تصلح نحطلهم مقبلات مع سنيوة القاطو و الا نحط القاطو برك ...

[لجين وفاء]

شوفي أحنا في قسنطينة العرضة التقيلة نحطو القهوة والحي مع بعض معاهم القاطوات تاع القهوة وتابع العصير يعني الي يوالمو القهوة مثلا المعسلين وتاع الشوكولا الي يوالمو العصير ليسابلي وتاع النواد كوكو.... الخ راكي تعرفي
دركة في فصل الصيف قدميلهم الجي ومن بعد صبيلهم القهوة هادا في طابلة وحدة
من بعد ساعة نحطو الصماط ههههه أحنا نسميوه الصماط يعني ينحي الصماطة من الفم
الصماط هو فيه المحلبي مرشوق باللوز وتحطي الفلن او الكرامديساغ او كريمة الليمون انتي واش تحبي قدميهم في صحون فردية واذا كانو المعاريض بزاف قدميهم في صحوناكبر من تاع الفلن بشوية ويجيو كيما الي نحطو فيهم البسيسة تاع النفاس
ويكون في الصماط أيضا الشريك هو نوع من البريوش وتحطي صحن فواكه الي تقدري عليه او تعملي سلطة فواكه تحطيها فليغوبلي تاعها رآهم يتباعو او ايغوبلي نورمال تزينيها بالكريم شانتي هادا هو الصماط
ولما يقربو يروحو تحطيلهم براد اتاي مع المكسرات وقلب اللوز او قريش
إذا حبيتي تستغناي على التاي ماعليهش
واذا كانت عرضة خفيفة قدمي القهوة الأولى ومن بعد العصير مع سلطة الفواكه وكرام ديساغ اذاحبيتي
والسلام ختام إنشاء ألله تفوتي العرضة تاعك على اتم وجه

[لجين وفاء]

آه حبيت نقلك الموالح مكان لاه في فصل الصيف راكي تشبعيهم ومايقدرو ياكلوا والو من بعد الموالح يصلحو في عرضات الشتاء راكي تعرفي البرد يجوع

[الشاوية*]

شكرا لكم حبيباتي ..بارك الله فيكم