![]() |
|
قسم الطبخ و المأكولات لتبادل الخبرات في مجال الطبخ والأطباق المتنوعة الجزائرية و العربية ... |
في حال وجود أي مواضيع أو ردود
مُخالفة من قبل الأعضاء، يُرجى الإبلاغ عنها فورًا باستخدام أيقونة
( تقرير عن مشاركة سيئة )، و الموجودة أسفل كل مشاركة .
آخر المواضيع |
|
تحضيراتي الخاصة للشهر مضان المبارك ....لكل الاحباب
![]() |
|
أدوات الموضوع | انواع عرض الموضوع |
![]() |
رقم المشاركة : 1 | ||||
|
![]() السلام عليكم ورحمة الله وبركاته
بسم الله الرحمان الرحيم تحضيراتي للشهر الكريم عندي مدة وانا نوجد لهاذ الشهر الفضيل شهر رمضان المعضم يارب نلحقولو بالصحة والهناء ان شاء الله كل مرة نعمل حاجة ونصورها ونخبي باه لما نكمل نحطلكم تحضيراتي باه اخوات بزاف يستفادو اكيد الكثيرات يعرفو وما شاء الله عليهم لكن اكيد كاين المبتدئات واللي دارو ديار جدد ويحبو يفرحو ازواجهم وعايلتهم بصنع ايديهم على بركة الله نبدئ الفريك ![]() اولا الفريك واللي اكيد مفيش دار ما يكونش فيها حنا الشعب الجزائري نموتو على شربة لفريك انا شخصيا عمري لا شريت الواجد نحب نخدمو وحدي على طريقة جداتي وماما ربي يطول في عمرهم نشري لفريك راح يكون لونو اخضر لكن اللي ما يعرفلوش راهم الاكثرية يبيعو المسبوغ ربي يهديهم نحطو في بسينة نحل عليه العين نحك ما بين يديا مليح مليح ثم نجيب كسكاس ونفرغ غير بالشوية راح هاذوك الحبات الفارغين والمحروقين راح ينزلو في الكسكاس والباقي يبقى في الاسفل اللي في الكسكاس ارميهم نعاود مرة اخرى نفس الطريقة وكل مرة رايحة تلاحضي انو بدى يصفى من الوسخ اللي فيه انا خذا مني اربع مرات غسيل ![]() ![]() ![]() ![]() ثم صبي عليه الماء حتى يتغطى كليا وحطيلو الملح انا شريت 6 كيلو فريك ولما يخلاص رمضان راح يجيبو لفريك الجديد واكيد نزيد نشري المهم درتلو مغرف اللي نسقو بيه المرق عملتو ملح وحركي مليح وخليه جداتي انا تخليه يبات لكن انا عملتو في الصباح وفي المغرب صفيتو في سيار وخليتو يقطر الليل بطولو الملح هنا رايح يعطيلو بنة هايلة وما تخافيش في المرق مش رايح يجي مالح بالعكس يجي بنين صح وبالنسبة علاه نخلوه في الماء راح يتشرب الملح مليح وفي الطياب يطيب بالخف ما يطولش ومن قبل كنت نصفيه من الماء باه نعملو لملح ونخليه يقطر لكن طريقة إنّو يبقى في الماء احسن ![]() ![]() ومن بعد طرحتو فوق فراش وخليتو في الشمس ييبس مليح لازم ييبس مليح كل مرة حركيه راح يقعد شحال من يوم و من بعد نقيه من الحصى اللي فيه ومرريه في سيار الزرع اللي ثقوبو كبار بزاف حتي ينزل كل الشوائب اللي فيه ![]() لميه وابعثيه للرحاي اول مرة سيريه في سيار رقيق نتاع الرطب نحيلو كامل الرطب ثم في سيار شوية اكثر منو حنا نسموه لمعاودي هاذاك هو اللي يطيحلك لفريك لمليح يبقالك لخشين عاودي ارحيه في رحاية القهوة وكل مرة نحيلو الرطب ثم في لمعاودي حتى يخلاص ![]() من بعد اللي عندها التقعيدة جوزو فيها يتنحالو لقشور ويرجع فريك وعليه لكلام واللي ما عندهاش تنفضو في الريح لكن راح يغلبها شوية ![]() حنا نحبوه مخلط بالمرمز نعملو زوج كيلات فريك بكيلة مرمز يجي روعة والله الشربة نتاعو ولا اروع وما تتشبعش المرمز انا نشريه من عند اخت في الريف مضمونة خدمتها ونضيفة احسن بألف مرة من اللي يتباع في الحوانت وريحتو روعةةةةةةةةة ![]() ![]() ممكن تحتفضي بالرطب نتاعو تستعمليه في اللحم المرحي الاسماك طاجين الزيتون راهو يمد بنة رهييييييبة ![]() والله صح يتعب لكن احسن بالف مرة من اللي يتباع واجد واكيد نجوزو رمضان بالصحة ولهناء ونزيد نخدم منو لبقية العام ان شاء الله نروحو للافاح كاين اللي يسموه راس الحانوت هذه الطريقة تعلمتها على ماما الله يحفضها ![]() نشري التوابل بالميزان اللي تحبي لكن انا كي نخلطهم نخلط بكميات محددة يجيني افاح رااااااائع كيما يحب الخاطر ونحب نحضر كمية كبيرة باه مش كل مرة نضال نخلط شريت الكسبر ب50 الف د ج اي ما يعادل 1 كيلو 3 م ك كروية اي ما يعادل 30 غ 3 م ك عرق الاصفر (زعفران) اي ما يعادل 30غ 4 م ك فلفل احمر حلو اي ما يعادل 40 غ 9 م ك زريعة البسباس اي ما يعادل 100 غ 27 م ك افاح واجد من عند العطار اي ما يعادل 300 غ 2 م ك زنجبيل اللي يحب يحطو انا صراحة نحبو في كلش غير في الحلو راه فيه فوائد كثيرة لا تعد ولاتحصى في الصورة ما حطيتوش عمدا لانو كاين اللي ما يحبوش وحبيت نوصل الطريقة كيما تعلمتها ![]() نخلطهم مع بعض ونمررهم في سيار الرطب والحوارش نعاود نرحيهم في رحاية القهوة وكل مرة نصفيهم بالسيار حتى يبقاو غير القشور أرميهم تتحصلي ان شاء الله على اجمل توابل والذ اكيد ![]() ![]() البرغل ![]() غسلت القمح عادي بالماء وخليتو يبات فيه في الصباح صفيتو وخلفيته يقطر ثم نشرتو باه ييبس في الشمس من بعد ارحيتو عند الرحاي وسيرتو نحيتو الرطب كيما عملت مع لفريك حتى تحصلت على برغل رقيق وباهي ينفع للاكلات السورية وخاصة الكبة لهريسة ![]() نجيب الفلفل الاحمر والحار نمسحو مليح ثم نقيه من الزريعة اللي فيه نقطعو ![]() ثم نفورو لما يبرد نرحيه في الروبو كاين اللي يحبو خشين وكاين اللي يحبو رقيق انا عملتهم في زوج فقط الرقيق زيدي عاودي مرريه في الرحاية اليدوية ![]() حطيه في كسكاس وحطي حاجة تحتو وخليه يبات يقطر حتى للصباح من بعد ديريلو كمية من الثوم المرحي والملح الكسبر المرحي وشوية زيت زيتون كمون كاين اللي عملتلو الدبشة انا نحبها هكذا ![]() ثم عمري البلارات نتاوعك يكونو معقمين من قبل على طريقة حبيبتي زينب اغلقيهم مليح ثم حطيهم في ما وخليهم يغليو احسبي بعد ما يغلي الماء 10 د وطفي واحتفضي بيها في اي مكان تحبي ![]() الطماطم نحب نوجدها من قبل لاني نستعملها بزاف في البيتزا وراكم عارفين رمضان مع الصيام وسخانة ربي يقدرنا خذي الطماطم نتاعك اغسليها قطعيها طبعا انزعي الجزء الاخضر وداويها عادي ملح فلفل اسود كمون افاح زنجبيل زيت شوية طماطم مصبرة توابل الكاري الا عندك دبشة ثوم حطيلها تقريبا كاس ماء ![]() غطيها وخليها طيب مليح على نار هادئة مرة على مرة حركيها ![]() ثم ارحيها بالبرا ميكسور ![]() وعاودي جوزيها في الرحاية اليدوية شوفي واش يبقى منها في الصورة ![]() اذا حبيتي تحتفضي بيها في المجمد عمري قرعة نتاع ماء وخبيها ![]() واذا حبيتي على برى او في الثلاجة عمري البلارة نتاعك واغلفي مليح ثم في تغلي واحسبي 10 د بعد ما يغلي الماء وطفي هاذ الطريقة تعلمتها على عجوزة اختي ربي يذكرها بالخير طريقة مضمونة فقط هي ما تحطش التوابل وانا نحب الطماطم مداوية مليح كل واحد وذوقو الثوم ![]() كاين عدة طرق للثوم ممكن تقشري الثوم من بعد ارحيه مع شوية عصير القارص والثوم راه في وقتو وبأثمان معقولة ![]() خبيه في بلارات والى المجمد يجيك سهل الاستعمال في رمضان خبيه في بلارات صغار من الاحسن باه تجبدي بالشوية وممكن تقشريه وتخليه ييبس في الشمس نغطيه رشاش لكن رايح ياخذ وقت اطول ثم ارحيه وجوزيه في السيار الرطب هاااااايل جداتنا راهم ما خلاو واش يعلمونا افكارهم هايلة وتنفع ![]() ![]() وكاين طريقة الاخت الكريمة زينب طريقة الفور هاذا هو الرابط طريقة سهلة وبسيطة https://www.djelfa.info/vb/showthread.php?t=1799175 وكاين هذه وهي اسهل طريقة واسرع واكيد الريحة روعععععععععة 🌟كيفية تحظير الثوم غبرة ail en poudre🌟 عن جد اروع والد وأطيب ثوم غبرة راح تحظريه 💐خذي الثوم بعد ما تقشريه ارحيه مع الكسبر الحب في ميكسور ( كمية الثوم تكون اكثر من الكسبر ) ( راح تلاحضو إنّو الكسبر ما يترحاش مليح عادي ) ثم حطيه في سينية والى الشمس راح ياخذ منك من يوم الى يومين اذا كانت الشمس حامية مليح وتلقايه يابس حجرة عودي ارحيه في الميكسور روبو ومن بعد هزيه في سيار رطب وعاودي ارحي اللي مازال احرش ومرة اخرى هزيه ثم اطرحيه مرة اخرى في سينية ودعيه في الضل اربع او خمس ايّام ومن بعد خبيه في بلاراة صدقوني ريحته تهبل وطعمه رااااااائع اضيفيه لكل اكلاتك ![]() وهنا بعد ما يبس ![]() ![]() وهكذا نكون وصلت الطريقة للاخت والحبيبة وهيبة على خاطر شفتها مرة تسال عليه في الكوزينة جربيها ومش رايحة تندمي ان شاء الله وحتى البصل قطعتو هلالات وحطيتو في الشمس يجف باه نعملو بودرة البصل ![]() شباح الصفرة خذي 5 كيلا لوز مرحي ماشي رقيق بزاف وكيلة سكر عادي خلطي ![]() ثم لمي بشوية ماء الزهر وصفار البيض وخلطي مليح مليح حتى الحصول عل عجينة اعجنيها مليح بيدك باه يذوب السكر فيه اطرحي واعملي الشكل اللي تحبي ثم حطيهم فوق ورق الطهي وغطيهم حتى للمساء ![]() مرريهم في بياض البيض ماشي مخفوق ثم اقليهم في زيت سخون اقليهم بالخف نحيهم خليهم يبردو ثم عاودي نفس العملية في البياض ثم اقليهم ما تحمريهمش ![]() امسحيهم بالورق ![]() ثم خبيهم في باطة والى المجمد بهاذ الطريقة العمل تضمني بلي ما يتحلوش في القليان ولا في المرق ![]() الدهان للعيد اذا عيشنا ربي ![]() ![]() انا شريت الدهان واجد من عند الحلاب فقط عاودت ذوبتو وصفيتو وحطيتو في بلارة والى المجمد كاين اللي يحتفظ بيه على برا لكن ريحتو راح تكون قاوية وانا ما نحبوش هكذاك شوفي واش يبقى في اسفل الطاوة بعد ما ذاب وفرغناه ![]() الفلفل الحار بانواعه ![]() نقيت الفلفل الحار الاخضر من الزريعة نتاعو ثم رحيتو خليتو يقطر ![]() في الصباح داويتو بالملح الكسبر المرحي الثوم وكمية من الخل وشوية زيت عادي خلطتهم مليح ثم في بلارة وغلقت عيه مليح ![]() ![]() حطيت في الثلاجة يكمل ترقادو على خاطر انا محتاجاتو في رمضان والعيد ختكم تموت على هاذ لحوايج ههههههه وهذه طريقة اخرى رحيت الفلفل مع الزيتون الاخضر والجزر وداويتهم بنفس طريقة الفلفل الاول لكن الطعم اروععععععععع ![]() ورقدت الفلفل عادي مع حبيبات زيتون وجزرة في الماء والخل والملح هنا راهو جديد مازال اللون ما تبدلش ![]() او اقلي الفلفل الحار في الزيت ثم قشريه قطعيه بالطول ثم اعمليلو خل ملح كسبر مرحي ثوم وشوية زيت زيتون اممممممم حنا هاذ الطريقة نستعملوها في الاعراس تجي روعةةةةةة ![]() ![]() الحميص ![]() شويت الفلفل الحلو والحار نقيتهم ثم مسحتهم فقط ما تغسليهش باه البنة ما تروحلوش امسحي بيدك وكل مرة شلي يدك بالماء ![]() قطعتو وعملتو في ساشي والى المجمد حنا ناكلوه يوميا في رمضان غير نجبد نداوي ونطيب حتى انو يطيب ثم ثم كل ما يجيبلي الفلفل نخبي شوية حتى نكمل الحمص شمختو الليل بطولو ثم طيبتو في الماء نص طياب وخبيتو ![]() لفت سعيدي ![]() حنا ناس العلمة وسطيف نموتو عليه في الطعام بلفت سعيدي على هاذيك خبيت منو بعد ما قشرتو وشقيتو في الوسط وفورتو فوق برمة فيها الملح راه يقعد هو هو ما يتبدلش الذوق نتاعو العصير على طريقة الهام اللهلوبة https://www.djelfa.info/vb/showthread.php?t=1779728 جمدة البرتقال والقارص ثم نجبد بالزوج حبات برتقال صغاروحبة قارص ونرابيهم بالخف ونلوح في ساشي ونرجعو الى المجمدباه ما يطلقش الماء نتاعو وكل كمية وحدها في ساشي هكذا باه ما يشدش لبلاصة خبيت منو كمية كبيرة البرتقال نتاع الخضار كلو جبتو هههههههه حبيت برك ننقوللكم انا كي نحب نعمل عصير نجبد بالساشي ونتبع طريقة الهام فقط انا كي نحبو بالجلباب نتاعو نجووووووووووم في الرحاية اليدوية والا حبيتو صافي نفرغ طول في شاش او خمار وعنصر مليح مليح يجي روعة يعطيك الصحة الهام على هاذ الوصفة ![]() ![]() الخبز المرحي لاشابليغ ![]() يبست الخبز في الفور وصدقوني كي تيبسوه في الفور يجي احسن الف مرة من انكم تيبسوه على برى رحيتو وسيرتو ونحيتلو الغبرة وخبيتو في الثلاجة واكيد عندو عدة استعمالات النعنا ع اليابس المرحي اولا يبست النعناع مليح مليح ثم سيرتو في سيار هبطت منو الحجارة الصغير والتراب اللي فيه نحيتو من لعواد اللي فيه ![]() ومن بعد رحيتو في الرحاية وسيرتو في سيار الرطب وخبيتو في بلارة صغيرة ينفع لكلش سيغتو مع الشربة اممممممممممممم ![]() الغرس ![]() نقيتو و رحيتوو خبيتولمقروط العيد ان شاء الله مزال نزيد نخدم الكوكاو ونرحيه والكوكاو المملح لالتاي ونزيد كي يقرب رمضان ان شاء الله نخدم لي تاغت اولات بوصفة الهام نتاع الزيت ونخبيهم في بساطة هكذا يجيني ساهلين غير ندير الحشوة وخلاص واخيييييرا خلصت كتبت وحملت والله تعبت اكثر من 3 ساعات وانا في هاذ الموضوع كل مرة يروحلي ونعاود من الاول لكن ماشي خسارة قدام دعواتكم في امان الله
|
||||
![]() |
![]() |
رقم المشاركة : 2 | |||
|
![]() ربي يفرحك في اولادك باين موضوع متعوب عليه وفيه خير كثير |
|||
![]() |
![]() |
رقم المشاركة : 3 | |||
|
![]() بارك الله فيك اختي ربى يجعلها فى ميزان حسناتك |
|||
![]() |
![]() |
رقم المشاركة : 4 | |||
|
![]() الله يبارك مرة ونص |
|||
![]() |
![]() |
رقم المشاركة : 5 | |||
|
![]() الله يباااااااااااااااااااااارك عليك و فيك فحلة نتاع الصح موضوعك يحرّك الموتى |
|||
![]() |
![]() |
رقم المشاركة : 6 | |||
|
![]() بارك الله فيك اختي |
|||
![]() |
![]() |
رقم المشاركة : 7 | |||
|
![]() وعليكم السلام ورحمة الله وبركاته |
|||
![]() |
![]() |
رقم المشاركة : 8 | |||
|
![]() الله يبارك ربي يعطيك صحتك و يحفظك كل شيء هايل |
|||
![]() |
![]() |
رقم المشاركة : 9 | |||
|
![]() بارك الله فيك كلش هايل |
|||
![]() |
![]() |
رقم المشاركة : 10 | |||
|
![]() يعطيك الصحة أختي و ربي يجا زيك إنشاء الله |
|||
![]() |
![]() |
رقم المشاركة : 11 | |||
|
![]() الله الله عليك مرة و نص |
|||
![]() |
![]() |
رقم المشاركة : 12 | |||
|
![]() والله يا أخت إلهام أنك طيبة وإنسانة هايلة ربي يعطيك على حساب قلبك أنا من المعجبين بيك وبشطارتك إن شاء الله تكونيلي صديقة في أقرب الفرص فمعرفة الحراير مثلك كنز. |
|||
![]() |
![]() |
رقم المشاركة : 13 | |||
|
![]() الله الله عليك يااسمهان ربي يباركلك في صحتك خلتينا نعيشوا معاك أجواء رمضان |
|||
![]() |
![]() |
رقم المشاركة : 14 | |||
|
![]() يعطييييييييييك ال الف عافية ويبارك في عمرك فحلة الله يبارك من العصري للتقليدي للتدابير ربي يحفظك ويسر للك كل صعب يارب انت والبنات شكررررررا اسمهان الغالية |
|||
![]() |
![]() |
رقم المشاركة : 15 | |||
|
![]() الله يعطيك الصحة وبارك الله فيك على التدابير الجد مهمة |
|||
![]() |
![]() |
الكلمات الدلالية (Tags) |
....لكل, لأشهر, مضان, المبارك, الاحباب, الخاصة, تحضيراتي |
أدوات الموضوع | |
انواع عرض الموضوع | |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc