شخشوخة السيار من الالف الى الياء من مطبخي

*وردة الشرق* · 2015-03-17, 17:47

البسملةمرحبا حبيباتي اليوم ارتايت نقدملكم طبق جزائري كل الحراير في الجزائر يعرفو يخدموه لكن الطرق تختلف من منطقة الى اخرى فهناك انواع كتيرة وهدا نوع من انواعها الكتيرة رايحة نفصصهولكم قطعة قطعة بالصور
لاعداد الشخشوخة لازمنا معدات اليك اهم اتنين هما هدان السياران

المكونات بسيطة جدا نبدا بتحضير العجين مقدار من السميد تضيفيلو الملح وتلمي العجين بالماء بارد وتلميه يلبسة ما تكونش طرية لانه لو تكون طرية مبعد تزيد تطلق روحها بعدما تعجنيها وتصعب عليك في الحلان

غطيها بغلاف شفاف وتركيها ترتاح ساعة بعدها اعجنيها بالبيترا او باليد ادا عجنتيها باليد لازم تعجني وتقطعي والعجين لازم تتعجن مليح بعد دلك دري العجين على شكل حربوش قصي قرصات متساويين قلبيهم فقط واضغطي عليهم باليد غطيهم بغلاف شفاف وتبداي تطرحي مباشرة وانا قلت في الاول انك تبليها يابسة باش مبعد ماتحتجيش ديري النشاء وقت الطريح دريها اتخن قليلا من التريدة تكون مليحة ماهيش خشينة خفيفة

بعدما تطرحيها لازم تغطيها انا مدايرة ايزارات خصيصا لها تطرحي كل وحدة تغطيها وتكملي بالطريقة هده وتدي تطيبيها في طاجين الفخار على نار متوسطة هكدا يكون طيابها

وادا حصل وتحرقتلك هكدا انزعي النقط السوداء قبل ما تبداي تحكي

مباشرة من الطاجين الى السيار تشخشخيها هكدا وتلميها في يدك وتحكي ما تضغطيش بزاف فقط بلعقل حكي بشكل دائري او ادي وجيبي

في الاخير لما تنتهي حطيها في وسط السيلر وسيريها لكي تتخلصي من احنا نسميوها الفتلة او الدقاق الدي ينزل منها

رايحة تتحصلي على هده هده الفتلة لما تبقى في الشخشوخة تعجن شويية ننزعزها لكن ما نرميهاش انا نديرها للولاد نفورها فورتين فقط ونسقيها ونمدهالهم

نرجع لتحضير المرق
نحتاج ككل انواع المعجنات : لحم او دجاج من المفضل لحم او لحم ودجاج +طمامط طازجة او مصبرة +بصل +توم +حمص +راس حانوت +فلفل عكري+ملح +فلف اسود+زيت+زبدة او سمن +جزر+حمص+جريوات
لتحضير المرق ان نستعمل طريقتين لكن انا نفضل الطريقة الثانية
الطريقة الاولى: تحطي اللحم والدجاج في القدر بدون زيت حتى تتحمر

بعدما تكتسب لون ضيفيلها البصل والتوم والحمص والجزر وحطيلها البهارات ملح حسب الرغبة +نصف ملعقة صغيرة فلفل اسود+نصف ملعقة كبيرة راس حانوت +نصف ملعقة كبيرة فلفل عكري +2 مغارف كبار زيت +ملعقة كبيرة سمن
وتقلي كل شئ مع بعض لمدة 10 دقائق

بعدما تتقلى ضيفيلها الطماطم ادا استعملتي المصبرة ملعقة كبيرة ونصف وادا الطازجة 2حبات كبار انا ادا استعملت الطازجة نطيبها لمدة 5 دقائق وحدها وادا كان لونها ليس احمر ضيفيلها ملعقة صغيرة من الطماطم المصبرة

مباشرة امرقي انا نمرق 5 كيسان ماء ونقفل الكوكوط ونطيب على نار هادئة لمدة 2 ساعة بالنسبة للحم ادا دجاج فقط ساعة تكفي

الطريقة الثانية :تبداي تحضري قبل بليلة تديري في بول 3 سنينات توم تكوني هرستيهم مليح في المهراس +نصف ملعقة كبيرة راس حانوت +نصف ملعقة كبيرة فلفل عكري +2 مغارف كبار زيتوتمزجيهم ضيفيلهم اللحم والجزر والحمص وتغطيهم وتتركيهم يباتو في التلاجة

غدا ان شاء الله اجبديهم وتكوني قصيتي حبة بصل حطيهم في قدر يكون سخون وضيفيلهم ملعقة كبيرة سمن وملح وجزر وحمص لاحظي انو ما تبلناش اللحم بالملح في الليل لانها رايحة تخرج المرق الي بداخلها وهكدا رايحة تتحصلي على لحم ناشف

اتركيهم يتقلاو عشر دقائق وضيفيله الطماطم

وامرقي بالماء

هنا في الوقت اللي المرق يطيب انت تبداي تفوري الشخشوخة حبيت نعتلكم الفرق بين شخشوخة السيار وشخشوخة الظفر انها تكون مورقة كتيرا

هي تتفور بالتقريب متل شخشوخة الظفر ادهنيها بملعقة كبيرة زيت وحطيها في كسكاس وخليها حتلى تهز الفورة فرغيها في جفنة واتركيها تبرد قليلا ما تبخيهاش وهي سخونة انا نتركها 5دقائق بخيتها بكاس ماء لكن على دفعات بالشوية وتفتلي حتى تتنتهي كمية الماء

هنا لازمك تتركيها تجف تماما قبل ما تزيدي تحطيها تفور للمرة التانية
بعدا تفور المرة التانية تقومي بنفس العملية تبخيها بنفس كمية الماء وتتركيها تنشف وتزيدي ترجعيها تفور للمرة التالتة
هنا بعد هده الفورة الاخيرة تحكيها بالزبدة او السمن اللي تفضليه

في الوقت هدا يكون المرق تاعك ساجي تهزي منو فقط ليدام اللي ملفوق وترشحي بيه الشخشوخة

نرجعو لوقت التقديم هنا انا نفضل تكون الشخشوخة باردة والمرق سخون تسقيها فقط قبل التقديم ب 5 دقائق لانها خفيفة بزاف وما تحتاجش تجمار
وقدميها لافراد عائلتك بالصحة لانها اممممممممممممممممممممممممممممممممممم ما تتشبعش
هده درتها اليوم طازجة

ياريت يعجبكم الموضوع لاني ساعة وانا نخدم فيه لكن مش مشكل تمت المهمة

ام مؤيد عبد الغفور · 2015-03-17, 17:49

يعطيك الصحة ربي يبارك فيك ويجازيك على الجهد الي بذليه

om kamilia · 2015-03-17, 17:55

mmmmmmmmm 444444444444 zineb yatik esseha ala madjhoudek

oum islem · 2015-03-17, 17:59

الله يبارك ما شاء الله عليك شخشوخة حراير بصح انا ندير نتاع المقص

almazalina22 · 2015-03-17, 18:02

يعطيك الصحة صعيبة في الخدمة يليقلها المعاونة حتى انتوما ديرو ها ب 25 كغ واااااااااااااااع

ام سراج وملاك · 2015-03-17, 18:11

يعطيك الصحة حنونة شرح وافي وكافي جعله الله في ميزان حسناتك ياي شهتني فيها ومعنديش سيار ضك نشريه على جالها

ام الهضاب · 2015-03-17, 18:13

يعطيك الصحة زييينب هااااااييييلة اتهببببل اممممممممم

*فاتن* · 2015-03-17, 18:20

مممممممم يعطيك الصحة

ام ايمان16 · 2015-03-17, 19:00

يعطيك الصحة ربي يبارك فيك

عازفة الناي · 2015-03-17, 19:19

ماشاء الله و الله راااااااااااااااااااااااااااااااااائعة جدا
يعطيك الصحة جات top

أم ياسين الزهراء · 2015-03-17, 19:24

الله يعطيك الصحة وبارك الله فيك على الشرح الممتاز وهديك الهبرة راهي لي امممممممممممممممممممم

sabrina206 · 2015-03-17, 19:36

ماشي غير يعجب بل اهبلللللللللللللللللل تسلم الأيادي و بارك الله فيك على الشرح الكافي و الوافي خص غير توكليهانا عزيزتي

في ميزان حسانتك على مجهودات أختي

*توبــــة* · 2015-03-17, 19:59

حبيبتي على بالي طرح المواضيع متعب للغاية
وياريت الأخوات يقدروا تعبنا وغير دعوة الخير تكفينا

نتي أكيد طياباتك معليهمش نقاش
ولكن ليك احلى دعوة في ظهر الغيب يا غالية
ربي يخليك ويحفظك ويخليلك عايلتك حبيبتي

yara racha · 2015-03-17, 20:11

شكراااااااا على هذا الطبق الجديد علينا

omaymen · 2015-03-17, 20:27

يعطيك الصحة زينب على المجهود الطيب سلمت اناملك
احسن تقييم من عندي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري