مرانغ ناجحة 100%+ تارتة عيد ميلاد زوجي

[جوهرة الغرب.]

مساء الانوار
بعدما نجحتلي المرانغ قلت نشاركها مع اخواتي حتى يستفيدوا لانو انا كذلك كنت دائما نبحث على الطريقة الصحيحة لنجاحها والحمد لله خرجتلي روعة وحمرتلي وجهي قدام زوجي

المهم المقادير هي :
3 بياض البيض
300 غ سكر عادي
1 ملعقة كبيرة مايزينة
1 ملعقة صغيرة فانيليا
رشة ملح

التحضير:
ديري حمام مائي وفوقه اناء معدني انا استعملت الاناء الخاص بالبتخان ومدابيك الاناء المعدني مايلمسش الماء باه البياض مايطيبش ..اذن نحط بياض البيض ورشة الملح وبواسطة الباتور نبقى نخلط الى ان يتضاعف الحجم ليصبح مثل الثلج وعندها نضيف السكر بالتدريخ الي ان يصبح الخليط ناصع البياض ولامع وايضا ثخين اي عاقد ....ثم بعدها ننقله الى البتخان ونخلط على اقصى درجة الى ان يبرد الاناء تماما ...واللي ماعندهاش البيتخان تستعمل الباتور ....
ثم على ورق الزبدة او ورق الالمنيوم نشكل ورود او اي شكل حسب الرغبة بعد ان نكون وضعنا الخليط في لابوش ادوي...
ثم نأتي للمرحلة الاهم لانو هي سر نجاح المرانغ :
الفرن....لازم تكوني مسخناتو مليح مليح ولما ادخلي المرانغ نقصيلوا الى ادنى درجة واتركيه مدة ساعة ثم اطفي عليه وخليه حتى يبرد وخرجيه ...
انا حضرة القشدة الطرية السائلة كنت طلعتها على شكل كريمة الشانتي مع السكر الرطب ولصقت بيها زوج حبات مع بعض ورشيتهم بالكاوكاو المحمص على الاطراف ...جاو بنان وهشاش وهاهي النتيجة ...

نتمنى تعجبكم وتجربوها وان شاء الله تفرحكم


وهاذو عن قرب




وهاذي تارتة عيد ميلاد زوجي ان شاء الله تعجبكم :




ماتنساوش التقييم ودعوات الخير
تحياتي