ارز برياني هندي من مطبخ ملوكة

malek nour hane · 2014-08-15, 20:19

السلام عليكم و رحمة الله تعالى و بركاته
حبيباتي جبتلكم طبق هندي مشهوور في المطاعم و لديييييييييد جدا ...ذقتو فمطعم و عجبني بزاف حوست عليه فعمي قوقل ولقيت 3 وصفات كل وحدة هزيت منها و وزدت شوي اضافات و خرج روووووووووووعة
بسم الله نبدا على الله:

المقادير : دجاج الصدر قطعيه مربعات صغيرة و الباقي يبقا كيما راه +القليل من اللحم مربعات
بصلتين شرائح
3 حبات طماطم متوسطة نعصروها من الماء و نرابيها فالخشين
جزر جوليان
كمشة جلبانة
فلفل حار
رند و عود قرفة و 3 عواد طيب
زعفران
زيت
لتتبيلة الدجاج نحتاج:

علبتين ياوورت فري خال من السكر او المعطر(ذوق تاعو يشبه اللبن و يجي حامض شوي)
زنجبيل طازج مبشور (انا ماكانش عندي عوضت بملغقة صغيرة معبية زنجبيل بودرة)+م ك نعناع طازج مقصوص رقيق+حزمة صغيرة دبشة+ ورقة رند+2اعواد طيب لي هو قرنفل+هيل انا ماكانش عندي+مك راس حانوت+م ص كمون+م ص فلفل احم حار بودرة+شوي فلفل اسود+مك كركم+مص قرفة بودرة+2 سنات ثوم+فلفل حار دوائر+ملح+عصرة ربع حبة قارص
للارز نحتاج:انا استعملت كاس ارز+مك زبدة+ورقة رند +سنة توم+طرف قرفة+2 اعواد طيب+ملح
بسم الله نبداو نطيبو ضرك:
اول خطوة :في مرميطة حطي زيت غزيير يسخن شوي و قلي شرائح البصل مع التحريك حتى تشوفيها بدات تولي ذهبي شوي نحي نص منها واحتفظي بيه جانبا

النصف الباقي كملي قليه حتى يولي لونو دهبي ملييييييح وبالاك تحرقيه صفيه من الزيت هذا البصل نحتاجوه لتتبيل الدجاج

فالروبو ضعي البصل لي قلينا تاع التتبيلة وارحيه شوي وزيدي الدبشة و النعناع و ثوم و فلفل حار و رند واواد الطيب و كملي ارحييهم و زيدي 2 علب ياوورت+ عصرة القارص وارحيهم مليييح مليح مع بعض و الصور توضح

فرغيهم على الدجاج و ضفي بقية التوابل خلطي مليح باه يدخل التوابل للدجاج غطيه ببابي فيلم و الى الثلاجة حولي نصف ساعة او اكثر

فالوقت لي الدجاج يشرب التتبيلة حضري الارز:
اغسلي الارز مسبقا...وفي طاوة ضعي م ك زبدة تذوب و فرغي عليها الارز و حمصيه شوي فيها مع التحريك المستمر ضفي رشة ملح+ورقة رند+سنة ثوم+2اعواد طيب+عود قرفة وحركي و صبي عليهم الماء و طيبيه ربع استواء برك لااااازم مايطيبش ....ربع استواء يعني يبقى مقرمش ههههه ...انا في بلاصة ما ننقعو نصف ساعة نديرلو هاك باه يجي بنين ...صفيه فكسكاس و خليه يقطر حتى وقت الاستعمال...السنة تاع التوم و عود القرفة احتافظي بيهم

الان نبدا تحضير البرياني امممممممممم:
في الزيت لي قليتي فيه البصل ضعي عود قرفة و 2 ورق رند و 2او3 اعواد طيب قلييهم فالزيت سخون ....شوي برك ونحي القرفة و الطيب و خلي الرند

رجعي البصل لي حتافطتي فيه فالاول خلاص و زيدي قطع اللحم و قلي شوي و من بعد زيدي شوي ملح +شوي فلفل اسود+شوي راس الحانوت+شوي كركم+مكعب ماجي او جومبو وفلي على نار هادية

ضفي الجزرو الفلفل الحار و قلي شوي من بعد فرغي عليه الدجاج بيه بالتتبيلة تاعو و زيدي للنار قلي شوي و زيدي الطماطم المبشورة ثم الجلبانة و حركي ملييح و خليها تتقلى شوي من بعد نقصي للنااار خلااااص و غطي المرميطة تاعك ببابي المنيوم مليح و زيدي فوقو الغطاء و نخليهم يطيبو و كل عشر دقايق طلي عليها و حركيها ...كي يطيب اللحم

هنا بعد عشر دقايق حركتها شوفو كيفاه بدات تطلق فالصوص

هنا كي طابت تصفي الاطراف تاع الدجاج

تضيفي الرز و حركي شوي و ضفي السنة توم و القرفة لي احتفظتنا بيهم قبيل

تكوني من الاول ناقعة زغفران في كاس ماء تصفيه و تصبيه عالارز ولازم غير كاس ما او اقل برك لاخاطر كاين الصوص لي طلقها الدجاج ...قوي للنار كي يبدا يغلي نقصيلو خلااااص واعاودي غطيه كيما الاول حتى تلقايه نشف حوالي 20 دقيقة وقبل ما تطفي عليه اعصري عليه شويييية برك قارص خليه 5 دقايق و طفي عليه

الان تبلي الدجاج تاعك كيما تبغي...انا درت زبدة+شوي فلفل اسود+ملح+رشة كمون و تبلتو حمرت الطريفات تاعي ههههه

نقدم الارز مع رشة دبشة....لكي الختيار فطريقة التقديم

امممممممممممممممم شوفو والله ماتتصورو شحال بنين

قدمت معاه هاذ الصلصة هي تجي مع الخيار و جاج محمر بزاف مش زوج طريفات ههههههههههه
الصلصة هي الياوورت فري + عصرة قارص+شوي فلفل اسود وسنة توم وشوي خلاص نعناع طازج

نصائحي:انا مانحبش القرفة و الطيب بصح والله هنا جاو فور ولازمين...لازم تاني نعناع و دبشة و الزنجبيل هدو سر البنة
تاني البرياني يجي حااااااار ...لي ماتقدرش عاحار دير غير شوي
هاو ليكم الياوورت الفري او لبن سوري راه يتباع غير هو ههههه ممكن اسبدالو بالياوورت الطبيعي كيفاه يجي من الداخل

ان شاء الله تجربوه ويعجبكم
في الخير اعتذر اخواتي على الصور ....و شكر خاص جدااااااا للاخت ريتاج تيارتية ساعدتني في تصغير الصور .
تم بحمد الله...ومع السلامة في مواضيع اخرى ان شاء الله
دعواتكن حبيباتي

ريتاج تيارتية · 2014-08-15, 20:41

ملووووكة صغري الصور شوي قلبي خرج نحوس نشوف الطبق كيداير مانجمتش ههههههههههههه

malek nour hane · 2014-08-15, 20:46

هههههههههههههههههه اهلا بالكشرودة لولا...علاه ماتمشطيش شعرك قولي....تعيشي ريتاج نعتيلي كيفاه نصغر الصور

ريتاج تيارتية · 2014-08-15, 21:05

واشي هدا اممممممم يهبل شهيتونا بالارز انا مانبغيش ناكلو بصح كي شفت وصفاتكم تشهيتو وقيلا نبدل العقلية شناوة وخلاص ولا لا ملوكة هههههههههههه

ريتاج تيارتية · 2014-08-15, 21:11

اقتباس:

المشاركة الأصلية كتبت بواسطة malek nour hane

هههههههههههههههههه اهلا بالكشرودة لولا...علاه ماتمشطيش شعرك قولي....تعيشي ريتاج نعتيلي كيفاه نصغر الصور

وانا مانيث كثرودة ثعري ثباب ههههههههههههههه
راني بعثتلك الطريقة

malek nour hane · 2014-08-15, 21:28

راني ما فهمتش الشرح لي بعثتيلي كيعاد الصور ماتخرجليش......اشوفي تسيي الروز تعودي تحبيه ذراع والله روعة...بصح انا دورتها جانيتو...ماتنسايش التقييم خخخخخخخخخخخخخ

بشرى2008 · 2014-08-15, 21:31

scorpionoir · 2014-08-15, 21:32

سالو ريوقي كي لقيت روز. ويا فرحة ما تمت ما شفت والو ايهي ايهي ايهييييييييييييييييييييي.

بشرى2008 · 2014-08-15, 21:39

رووووووووووووووووووووووووووووووووووووووووووووووووو وووووووووووووووعة

lyzzabel · 2014-08-15, 21:40

يعطيك الصحة حبيبتي نورهان الطبق بااااين لذييييييذ بصح الصور ما خرجتلي حتى وحدة ،، شكرا على المجهود و ننتظر منك المزيد من الوصفات اللذيييييذة

ام سهام 02 · 2014-08-15, 21:48

شفت الطبق في الكوزينة رووووووعة تسلمي

شاوية حرة 05 · 2014-08-15, 21:54

امممممممممممممممممممممممممممممممم اختي الغالية ملاك يعطيك الصحة اعطني الحوت نمووووووووووووووووووووووووت عليه ربي يحفضك ويعطيك الصحة

Simassim · 2014-08-15, 22:25

هاااااااايل ملك نورهان كثريلي الحرور وبما انهم ماراهمش يشوفو الصور كلشي راه ليا
حقاً ملك كاينة واحد حاجة يزيدوها فيه وتجي حااااااااااااارة نسيت اسمها ومعيييت نحوس عليها مصبتهاش تتباع مزية الهندي لي عندنا يخدم لحم حلال ومسلم نقدرو ناكلو عنده

شاوية اختي وين شفتي الحوت هداك دجاج لول

سعيدة8888 · 2014-08-15, 22:35

طبق هايل يعطيك الصحة
بصح فيه مراحل بزاف

chez biba · 2014-08-16, 06:21

يعطيك الصحة ملاك، باين يشهي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري