باتيسري بثلاث نكهات من مطبخي وبطريقتي الخاصة

ninafret · 2013-02-25, 16:24

السلام عليكن اخواتي وكيما وعدتكم بالجديد من مطبخي حبيت نقدملكم باتيسري بطريقتي الخاصة فاني وفراز وشوكولاوحبيت نقدمو بصفة خاصة للاخوات اللي يسكنو شوية بعيد على البلاد ومرات يسخفو يشربو قهوة العشية مع شوية باتيسري ومايصيبوهش في المحلات اللي جنبهم وزيد سعرو مرتفع بزاف وممكن توصل الحبة الى 100دج وقادر يكون قديم ولا ماشي خفيف المهم اليوم نقدملكم طريقتي وراح تلقاوها ساهلة ساهلة بزاف وزيد اقتصادية وماتتعبكمش علابالي تحبو الساهل نخليكم مع الدرس وراني عملتهولكم بالتفصيل الممل صورة وصوت قصدي صورة وكتابة هههههههههههههههه

لتحضي الجينواز
في صحن حطي 2بيضات+نصف كاس سكر وقرصة فاني

اشريو نتاع الميزان مافيش احلى منها عن تجربة خبطيهم مليح مليح بالباتور حتى يتضاعف حجمهم ويبياض زيديلهم نصف كاس زيت وزيدي خلطي مليح

وزيدي كاس ونصف فرينة مغربلة مع كيس +قرصة خميرة الحلوى وماننساوش قرصة ملح خلطي بملعقة الخشب تتحصلي على خليط ثقيل

زيديلو نصف كاس ماء دافي ماشي بارد وخلطي بملعقة الخشب

ادهني مول يكون مربع نتاع الفرن العادي بالزبدة ورشيه مليح بالفرينة واتخلصي من باقي الفرينة الزايدة فيه
صبي الخليط وعدليه مليح حتى يجي سطحو متساوي ودخليه للفرن حتى يطيب الفرن يكون ساخن على 200درجة

خليه يبرد شوية واقلبيه فوق بلاطو نتاع حديد حتى تسهلي العمل بالسكين انزعي 1سم من الجوانب الاربعة لانها تجي شوية يابسة واحتفضي بيها على جنب ثم قيسي المسكوتة اللي تحصلتي عليها وقطعيها الى 3 مستطيلات متساوية من نفس الطول والعرض وخليها على جنب

عاودي حضري جينواز بنفس الطريقة الاولى لكن انزعي ملعقة فرينة وعوضيها بملعقة كاكاو

وكي تطيب قطعيها على 3 بنفس الطريقة الاولى
وفي الوقت اللي تكون تطيب فيه حضري لاكرام باتيسير اللي تتباع في الاكياس سبق ووريتهالكم في درس لابياس موني
انا حضرت 3 نكهات فاني ولا بنان +فراز وللامانة ماكانتش عندي شوكولا قسمت الفاني على 2 وزدت للخليط الثاني شوية شوكولا دايبة
حطيهم في الثلاجة
في هدا الوقت حطي في صحن ثلاث ارباع الكاس حليب بارد جدا جدا حتى يعمل طبقة من الجليد وزيدي معاه 200غ غبرة الشانتيي انا نشري نتاع الميزان

وطلعيهم مليح بالباتور تتحصلي على كريمة ثقيلة جدا

قسميها على 3
الاولى زيديلها شوية فاني ولا عطر الموز انا عملت الفاني
والثانية زيديلها شوية من لاكرام باتيسيار و من عطر الفراولة

والثالثة زيديلها شوية شوكولا سوداء دايبة

نبداو التشكيل
حطي قطعةمن المسكوتة البيضاء اللي من غير كاكاو وادهنيها بطبقة من الكرام باتيسيار فاني

وحطي فوقها قطعة اخرى من المسكوتة ضميهم فوق بعض حتى يلصقو وخليهم على جنب

حطي قطعة من المسكوتة البني اللي فيها الكاكاو وفوقها طبقة من الكرام باتيسيار نتاع الشوكولا

واغلقيها بقطعة من المسكوتة وضميهم حتى يلصقو

تبقى عندنا قطعة مسكوتة سوداء واخرى بيضاء لاننا كل بلاطو قطعناه على 3
حطي القطعة البيضاء وفوقها طبقة من لاكرام باتيسيار نتاع الفراز

واغلقيها بالقطعة البنية تتحصلي على هاد النتيجة

حطي فوق نتاع الفاني طبقة من الشانتيي دوق الفاني وعدليها بالسكين
وحطي فوق نتاع الكاكاوطبقة من الشانتيي اللي بالشوكولا
وحطي فوق اللي محشية بلاكرام باتيسيار فراز طبقة من الشانتيي نتاع الفراز

بالمسطرة قيسي طولهم وقطعيهم بالتساوي الى 6 قطعه انا كل قطعة طلعلي فيها 4.5 سم

كي تكمليهم حطي الكرام شانتيي فاني في الكيس الحلواني واعملي وردات صغيرة على جوانب حبات الفاني
كي تكملي حطي الشانتيي اللي بالفراولة في نفس الكيس وزيني حبات الباتيسري دوق الفراز بنفس الطريقة
زيدي ديري في الكيس شانتيي الشوكولا وتبعي نفس الخطوات

زينيها بالفواكه ولا بالمكسرات ولا بالقوفريط سيجار وماتنسايش تدهني الفواكة بلاجولي وتدري البراق الغدائي انا استعملت الفضي

فاني

شكولا

فراز

ومن بعد حطيهم في ليكيسات الكبار نتاع المادلان وقدميهم

والمسكوتة اللي كنت قطعتها بسمك 1سم من الحواف مارميتهاش في الغد عملت بيها لي كوبلي روايال
خديت قطع منها
اسقيتها ببرتقال معصور

وشوية شانتيي بقاتلي بدوق الفراولة

وزدت كمية من المسكوتة وزدت سقيتها

واخيرا طبقة من الشانتيي وزينت بالفواكه وجات روعة روعة وتنفع للمناسبات

ملاحظة
ماشي شرط تعملو كل الكمية اللي عملتها انا لانها عملتلي 18 حبة باتيسري
ممكن تعملو 6 حبات واللي تبقى من المسكوتة اعملوه كوبلي روايال

اللي تحب الباتيسري المسقي ممكن تسقيه بسيرو ولا شاربات مخلطة بماء الزهر ولا تسقيه بعصير من اي نوع انا عن نفسي مانحبوش مسقي لانو يجي حلو بزاف نحبو يبقى خفييييييييييييييييف
ممكن تحتفضي بيه في الثلاجة لغاية 5 ايام انا ماجربتش نخبيه اكثر علاهادا مانضمنلكمش

أم محمد تاج · 2013-02-25, 16:31

الله يبارك أنا لولا وأنا لي هربت بالصحونة هههههه يعطيك الصحة خيتي وبارك الله فيك

ميمة. · 2013-02-25, 16:31

يعطيك الصحة هايل وباين بنين

الوهرانية 1 · 2013-02-25, 16:56

الله يبارك حبيبتي الغالية ماشاء الله ابداع

oum anas 69 · 2013-02-25, 17:22

haylin khir men machri ya3tik asaha

*ام رامي* · 2013-02-25, 17:22

يا سلاااااااااااااااااام
روعة تسلم الايادي
وبصحتكم

feuilleblanche17 · 2013-02-25, 17:27

شكراااااااااا راه يبان مشري يعطيك الصحة

بوعنينبة · 2013-02-25, 18:48

بارك الله فيك

الصوامعية · 2013-02-25, 18:50

ماشاء الله تقولي عليه باتيسري نتاع المحلات
يعطيك الصحة وشكرا على الشرح المفصل

لمسة حنية · 2013-02-25, 19:13

وااااو ماشاء الله
اكثر من رااااائع يعطيك الصحة اختى
بتيسري وعليه الكلاااام

ninafret · 2013-02-25, 19:22

الله يسلمكن اخواتي كل واحدة باسمها والحمد لله انو نال اعجابكم
وادا تحبو المزيد خبروني لاني نقدم دروس في الطبخ والحلويات

karmen01 · 2013-02-25, 19:25

ماشاء الله روعة

YAKMISSOU · 2013-02-25, 20:09

يعطييييييييييييييييك الصحة هايل مشكورة
زيدينا اختي وصفات اخرى

ام يوسف 2737 · 2013-02-25, 20:39

الله يبارك

أم ياسين الزهراء · 2013-02-25, 20:47

رغم اني اسكن في قلب البلاد بصح ماكانش كيما خدمة اليد وخصوصا من عند اخت متالقة كيما انت الله يبارك فيك روووووووووووووووووووووووووووعة

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري