كورني مممممممممممممممم مع لاتاي ولا أروع

[الواثقة بالله 23]

السلام عليكم و رحمة الله تعالى و بركاته

عملت كورني بالجلجلان معسل و محشو بالكرام باتيسيار مممممممممممم كيما قالت نانا ( جدتي) كي ذاقاتو : يتكل بالشوارب هههههههههههه كناية عن الطراوة و اللذّة.

نبدا باسم الله :3 كيلات فرينة مغربلة كيلة جلجلان ( ناقصة إصبع) مش مقلية و مش مرحية منقية و فقط + كيلة زبدة ناقصة إصبع ذايبة و باردة + نص ملعقة صغيرة قرفة + بيضة و نخلطو باليد ثم نبلوا بالماء و ماء زهر ذايب فيهم نتشة ملح حتى نتحصلو على عجينة نتركوها ترتاح 10 دقائق




نحلو العجينة بالقراص(الحلال) رهيفة شوي تقريبا 3 ملم

من بعد قصيهم بالطابع مدور و مشرشف تاع الحلويات رقم 8 (ممكن تستخدمي رقم آخر حسب الكورنيات لي عندك أنا ساعدني رقم 8) تحكمي ليكورني تاع الحديد يتباعو عند المحلات لي تبيع لوازم الحلويات على حساب وش شفيت 12 ب 10 آلاف و 12 يكفو لأنك كل مرة تنحيهم من الحبات و تعاودي تقلي بيهم ،
ملاحظة: ليكورني و ما شابههم من حوايج الحديد ميتغسلوش بالماء لانهم يصدو يتمسحو و يتخباو "قد أعذر من أنذر هههههه"

المهم هاداك الكورني دوري عليه حبة دائرة العجين و أغلقي الجوانب ببياض البيض باه ما تتحلش كي تتقلى ثم أقليهم في زيت ساخن بحذر لأنو الزيت كي يسخن يولي فيساع يحرقهم
أنا كيلت بالصحفة تاع الحليب العادية خرجتلي هاد الكسكاس ههههههه حطيتهم فيه باه يسقطرو من الزيت وليت إستعملتو باه تعرفو الكمية لي تخرج ، من بعد عسل سخون عسلي بيه الحبات مليح ( دخليهم في العسل باه يتعسلو مليح)

تجي الآن مرحلة لاكرام باتيسيار : بيضة تضربيها بلافوي مع 100 غ سكر عادي و أضربي ملعقة أكل فرينة و أضربي ملعقة أكل نشاء فاني و كاس حليب فايض و دافئ خلطي مليح على برا ثم رجعيهم كل فوق النار مع التحريك المستمر حتى تعقد كي تشوفيها ولات هاك

حطي 50 غ زبدة و حركي باه تتحل تولي هاك .

لي كورني المعسلين أحشيهم بالكرام باتيسيار كمية الكرام تقريبا تكفي جميع الحبات، زينيهم إما باللوز إيفيلي أو بالجلجلان محمص أو بيستاش مرحي أو كاوكاو أو ...................أنت حرة ولا خليهم سامبل



ملاحظة: الحلوى هادي بعد ما تتحشى بالكرام لازم تأكل في نفس اليوم و إلا تطرى ، إذا حبيتي تخبيها متعسليهاش و متحشيهاش و خبيها في علبة محكمة الغلق في الثلاجة مين تحبي تشربي بيها لاتاي طيبي لاكرام عسليها و احشيها و كوليها جديدة ، راهي مناسبة تاني للزيارات المفاجئة تكوني مخبيتها في التلاجة تجبديها و تقدميها في 15 دقيقة

و الله طعمهم بنين لي يذوقهم يعجبوه مش رح تندموا إذا جربتوهم

و شكرا على حسن المتابعة الإستماع هههههههه
هيا صلوا على سيدنا و حبيبنا محمد