خطوات جينواز ناجحة 100 100+تارت كرمال امممممم

*أم كوثر* · 2013-08-25, 09:26

البسملة1

الى المبتدئات في الحلويات
كثيرا من المرات أقرأ طلبات او تصلني رسائل خاصة
اريد ان اتعلم كيف اصنع تارت عيد ميلاد
او الجينواز ماتصلحليش
او عندي عقدة من صناعة تارت
وعمري مارح نقدر نصنعها وحدي
وغيرها
وتلبية لطلبهم راني وعدت ووفيت
ودرت تارت بالخطوات نتمنى تعجبكم وتجيب على كل تساؤلاتكم

ندخل في المفيد

المقادير
6بيضات بحرارة الغرفة
كاس فرينة
نص كاس نشاء
كاس سكر
1خميرة حلويات
فاني تع الميزان

أول اجة لازم تكون عندك ثقة بنفسك لانها اساس نجاح اي شيئ
ماتخلعكش لي تارت لي تشوفيهم في المحلات قادرة ديري ماخير منهم
تاني لازم توجدي كل اللواز قبل البدئ
وتكون بكميات كافيه خاصة الكريمة
لازم تتقيدي بالوصفة والنصائح بحدافيرها وماتهمليش اي تفاصيل
اخيرا تتوكلي على ربي وتبداي
قبل كل شيئ نوجد المول ونحطه بجيهة
المول المستعمل قطره25سم

نغلق القعر بورق الخبز والحواف ندهنهم بالزبدة ونرشهم بالفرينة

ومش اي مول يصلح لازم مقاييس معينة من بعد نحطلكم قطر هدا المول

الان نغربل الفرينة والنشاء والملح والخميرة

تم نضرب صفار البيض والسكر والفني جيدا

وهنا اساس نجاح الوصفة
لازم البيض يكون بحرارة الغرفة مش تخرجيه من الثلاجة ومباشرة تخدمي بيه ماراحش يتضاعف حجمه والكيكة ماتجيش منفخة وهشة
وادا حصل ونسيتي تخرجيه من الثلاجة معليش سخني شوية ماء ودفي البيض واستعمليه

نضرب مليح ملي اقل مدة ربع ساعة على سرعة عالية
حتى نلاحظ ان الصفار اصبح كثيف ومتل الممايونيز تقريبا

هد الخطوة تساعد ايضا في التخلص من رائحة الصفار المزعجة وماراحش تبان ابدا

على جنب نطلع البياض مع نقطة ليمون

تم نبدى باضافة خليط النشاء والفرينة والخميرة على دفعات وكي تتكتل وتكون عاقدة نضيف البياض ونحرك بهدوء

نحصل على هدا الخليط

نحطو في المول والى الفرن

لي نكونوا سخناها قبل ب10د ولما ندخل المول نضبط الحرارة على 200 درجة وبعد 5د نرجعها ل180درجة حتى تكمل طياب

لما تبدى ريحة الكيكة تفوح نعرف انها طابت
وجامي نفتح الفرن قبل هده اللحظة لانو الكيكة رح تهبط

نختبر الطياب
ندخل موس وادا خرج ناشف معنتها طابت وادا كان مندي نزيدولها الطياب

ونخلوها حتى تبرد شوية ونحيوها من المول ونحطوها تبرد على شبك
ولنجاح الكيكة وتزيينها 100 ب 100 دايما نطيبو الجينواز ونخلوها تبات والغد نزينوها تكون النتيجة رائعة

شوفوا كفاه طالعة ولونها يهبل

وهدي هي مراحل الجينواز واسرارها

بنفس هده المقادير عملت تارت لحفل خطوبة
تارت الكرمال وكانت بنتها لاتوصف امممممم

المول استعملت مستطيل
وطيبت 2 وحدة عادية والاخرى بالكاكاوو

خليتهم يباتوا في الفريجيدار والغد زينتهم

قطعت كل كيكة على 2
وسقيتهم مليح بالسيرو
كاس ماء وكاس سكر على النار حتى يدوب السكر ويبرد ونسقي الكيكات

طلعت 200 غ غبرة شونتيي مع حليب بارد جدا جدااااا
ومن بعد اضفت ملعقتين ديكوجال دوق كرمال

هدي صورة العلبة

حمصت شوية لوز ورحيتهم خشين لتزيين الحواف

هدي كرتونة غلفتها بالمنيوم تسهل العملية اثناء التزيين

الان نبدى بمونتاج التارت
نحط طبقة كيك عادي وكريمة وطبقة كيك بالكاكاوو وهكدا
الكريمة الكرمال نحط كمية وفيرة مش ندهن برك

وكي نبدة مونتاج لازم دايما قعر الجينواز يولي من فوق لانو يكون مستوي

نغلف كل الكيكة بكريمة الكرمال

طبقة وفيرة

نغلف الحواشي باللوز المرحي

ونحطها في الثلاجة تتماسك شوية قبل لانبدى التزيين حتى ربع ستعة

الان الخطوات الاخيرة

نزين الحواشي بكريمة الكرامال ونغلق مليح بينهم باه الكرمال من بعد ماتسيحش

نصب ديكوجال دوق كرمال ونسويه مليح

التزيين يكون حسب الموجود وحسب الرغبة وصدقوني كلما كان بسيط كان احلى

الكتابة بالشونتيي اسهل من الشوكولا

هنا زينت كما تشوفو حاجة بسيطة ودهنت الفاكهة بلاجولي

هنا حطيت شوية بات داموند في بروشات ودرت فوقها وردة صغيرة بالشونتيي ومن بعد هزيتها بمقص جاتني ساهلة

صدقوني طعمها كان هاااايل وطرية وهشة اممممممم
نتمنى تجربوها وتنجحوا فيها وتفرحوني
واي استفسار انا في الخدمة

تعبت في تنزيل الموضوع
دعوة في ظهر الغيب تكفيني

يثبت الموضوع حتى تطلع عليه الاخوات اللاتي طلبن الوصفة

أم ياسين الزهراء · 2013-08-25, 09:34

واوووووووووووووو ياحلوة جات في وقتها هايلة وهايلة الله يحفظك

oum radja · 2013-08-25, 09:34

راااااااااااااااااااااااااااااائع ام كوثر
انا اول وحدة رديت على الموضوع واش رايك ندي كلش ولا نخليلهم شوية هههههههه

oum radja · 2013-08-25, 09:36

خساااااااااااااااارة سبقتني ام ياسين الزهراء خليلي شوية برك

*أم كوثر* · 2013-08-25, 09:38

الله يسلمك ام ياسو
ام رجاء راهي سبقاتك ام ياسين هههههه معليش تقاسموها

حياتي نبع امل · 2013-08-25, 09:45

الله يبارك ربي يحفظك ويخليك
شرح وافي وكافي وكالعادة تبسطي المعقد حتى تبان وكانها اسهل بكتييييير
الدعوة مانقولهالكش نخليها في قلبي نقولها في صلاتي سلامي ليك ولكوثر العزيزة

crono · 2013-08-25, 09:47

اختي ام كوثر
ان شاء الله تكوني ريحتي شويا
واوووووووووووووو ياحلوة هايلة الله يحفظك

besbes · 2013-08-25, 09:58

الله يفرحك كما راكي تفرحينا كل مرة ويجعلها في ميزان حسنا تك ..الصور ما طلعوش كامل وعلاه؟

بريق الامل& · 2013-08-25, 09:59

كفيتي ووفيتي بوركتي
ربي يعطيك ما تتمناي

إلهام07 · 2013-08-25, 10:02

يعطيك الصحة ام كوثر شرحتي كل شيء بالتفصيل الممل
وبصراحة ماشي غرور والله ساهلة ماهلة وبإذن الله نجربها ونحطهالك تطبيق نموت على خدمة لي تارت جيني متعة
انتظريني نفرحك بتطبيقي بصح بإذن الله بعد العرس
ألف شكر على الجهد اللي تبذليه دائما باش تعلمينا كل شيء من الألف إلى الياء
والله بفضل توجيهاتكم الواحد ملي دخل للمنتدى لليوم راهو فرق بين السماء والأرض
الحمد لله رجعتولنا ثقتنا بانفسنا وبإذن الله رايحين نشرفوك أم كوثر

عروبتي · 2013-08-25, 10:05

هايلة يعطيك الصحة وتسلم ايديك على الوصفة الراااااااائعة وعلى الشرح الوافي
جزاكي الله كل الخير

ام عبيدة · 2013-08-25, 10:25

بارك الله فيك أحتي أم كوثر و جعلها في ميزان حسناتك رانا نتعلم منك الكثير و الكثير انت و كل الاخوات لي راهم يتعبو علينا

الممتحنة · 2013-08-25, 10:28

رائعة رائعة تحفة حقا يا مبدعة، ربي يحفظك ومشكورة على الجهد جوزيتي الجنة ان شاء الله،

راجية غفران ربها · 2013-08-25, 10:31

تنارك الله على دوك ليدين ماشاء الله ربي يحفظلك لوليدات يااااا رب

*بيتي مملكتي* · 2013-08-25, 10:34

امممممممممممممممممم هايلة حنونة يعطيك الصحة

إبداع و أناقة

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري