كاستال بكريمة النيسكافي من مطبخي بالصور

[إلهام07]

هههههههههه خليوني سخفت نحط موضوع ونديرلو عنوان : وصفة كذا من مطبخي بالصور كيما ديرو نتوما هههههه زعمة مدام بوحامد هههههههههه

حبيباتي مانزعفكمش ولعيونكم هاهي وصفة الكاستال من مطبخي وبيديواتي هههههههههههه كل مرة نستعمل الصفار في الوصفات ويبقالي البياض نديرو في كيس بلاستيكي ونحتفظ بيه في المجمد كي تلم عندي 5 بياض قلت نحطلكم وصفة الكاستال
هذي الوصفة نتاع خالتي من كتاب حلويات فرنسي قديم هههههه تعلمتها من عندها لما رحت زيارة ليها وتكاسلت من هذاك الوقت نحطها موضوع

المقادير :
5- بياض بيض ( بيضات كبار ويكونو بحرارة الغرفة )
قرصة ملح
250غ - سكر عادي
250غ - كاكاو محمص ومرحي متوسط
50غ - مارغارين طرية أي نوع
50غ - فرينة
1/2 خميرة كيميائية
فاني

الكيفية :
- طلعي البياض مع قرصة ملح حتى يطلع مليح كيما الصورة



- وابداي زيدي في السكر بالشوية والخفاق يخفق حتى يذوب السكر ويجمد البياض وتتحصلي على مايسمى المنقار كيما في الصورةهنا تكملي مباشرة العمل ماتخليش البياض وتروح تحكي في التيليفون ترجعي تلقايه هبط



- في المرحلتين السابقتين الخفاق يخفق في السرعة القصوى
- نخلط مع بعض المكونات الجافة ( فرينة وكاوكاو وخميرة وفاني )



- نوقف الخفاق ونضيف كل المكونات الجافة والزبدة مع بعض ونخفق لثواني على سرعة متوسطة كي تشوفو الخليط تخلط والزبدة دخلت في المكونات حبسوه




- في مول نتاع الفرن نديرو ورق الزبدة ونحط الخليط ونمشيه بالشوية بدون ضغط باش مايخرجش الهواء

- ندخلو لفرن مسخن مسبقا على درجة حرارة متوسطة حوالي 160° وحذاري راهو رقيق ويطيب بسرعة في حوالي 10-15د ، شوفو اللون كي طابت لونها بني فاتح




- نخليه يبرد مليييييييييييييييييح حوالي نصف ساعة أو ساعة لازم يكون برد ونشف في هذا الوقت نخدم الكريمة يكون هو برد ( ماتخافوش كي تشوفو العجين رقيقة راهي جي 2 طبقات جي مليحة برك ماشي خشينة )
كي يطيب يبانلكم يابس كيما الماكارون ماتخافوش كي تحطو الكريمة يرجع هشوش وطري ولذيذ يم يم

- نخدم كريمة الزبدة بالنيسكافي يم يم :
- نخفق المارغارين بالخفاق حتى ترجع كيما الكريمة خفيفة ولونها فاتح ( كل مايكون نوع المارغارين مليح تكون الكريمة مليحة ) أنا نستعمل فلوريال ريحتها وطعمها ملاح كيما الزبدة ( انا لهذه الكمية استعملت حوالي ثلث قطعة فلوريال نتاع 250غ )
- نضيف الفاني و حوالي 4 ملاعق سكر قلاصي ونخفق ( نضيف بالوحدة ماشي كامل مرة وحدة ) انا بصراحة ندير السكر ونذوق إذا ماشي حلوة نزيد السكر خاصة كي تكون فيها النيسكافي مركزة رايحة تدي السكر اكثر بصح في هذي الوصفة ماديروهاش حلوة بزاف لاخاطر رايحين تزيدو تذريو السكر من فوق
- ذوبت حوالي 2ملاعق صغار نيسكافي في فنجان نتاع حليب لازم الحليب يكون بارد وإلا الكريمة تفسد ( اللي يحب يدير فيها 3ملاعق باش يجي طعم النيسكافي باين أكثر هو حر )
- كل مرة نضيف الحليب غير شوية ( أنا نضيف بالملعقة نتاع القهوة ) ونخفق لثواني ونزيد ملعقة أخرى وهكذا حتى نخلص كمية الحليب ترجع الكريمة خفييييفة كانها شانتيي ( هي الوصفة الاصلية يزيدو فيها ثاني الزيت بصح انا مانديرش )
مرة درت هاذي الكريمة في الليل وكنت تعبانة والوقت متاخر وتقلقت صبيت الحليب بكمية كبيرة فسدتلي الكريمة ورجعت كيما الحليب المكلكل مالا حذاري ديرو غير بالشوية



- نحي الكاستال من البلاطو واقسميها إلى قسمين متساويين






- أطلي نصف كمية الكريمة على النصف الاول ومشيها مليح لازم تكون طبقة رقيقة باش الكاستال ماجيش ثقيلة



- حطي النصف الثاني فوق النصف الأول واعدليها مليح ( أنا ماصورتش هذي المرحلة لاخاطر وحدي في الكوزينة بصح هاهي الصور نتاع خالتي هي راهي دايرة ضعف الكمية )



- زيدي أطلي النصف الباقي من الكريمة على الوجه نتاع الكاستال

- زيدي ذري من فوق كاوكاو أنا نحيت حوالي 2 ملاعق كبار معمرين مليح كاوكاو من اللي درت بيه الكاستال ذريهتم من فوق الكريمة



- زيدي ذري من فوق السكر الناعم بسخااااء لاخاطر الكريمة ضرك تشربو



وهذي خالتي حبيبتي توحشتها خليوني نحط صورتها :






- قطعي الكاستال إلى قطع متساوية وحطيهم في كيسات وممكن تستهلك مباشرة بصح أنا نحب نخليه في الثلاجة ساعة قبل الاستهلاك




- هذه الكمية قطعتلي 15 حبة البلاطو نتاعي صغير شوية وثاني قطعت الحبات شوية كبار ، المفروض هذه الكمية تقطع 20حبة

وهذا الكاستال نتاع خالتي حبيبتي دارت بزاف وبعثت منو لحبيبتها شوفو حباتها اصغر من حباتي جاو باهيين :




هاني حطيتلكم وصفة الكاستال كولو حتى يخرج على نيفكم هههههههههههههههههههههههههه والله طعمه كيما نتاع المحلات 100/100 اللي ياكلو يهبل عليه ويطلب الوصفة خاصة بطعم النيسكافي يم يم وزيد يتعالك شوية كيما الماكارون
هي الوصفة الأصلية بكريمة الفاني بصح أنا حبيت نضيف اللمسة نتاعي درتو بالنيسكافي جا أحسن اللي يحب ينحي النيسكافي ينحيها دون تغيير في الوصفة

ملاحظة الصفار خالتي تخدم بيه كريمة الزبدة بصح انا هنا ندير وصفتي الخاصة مانديرش فيها بيض وصفة سهلة وبسيطة

على بالي ضرك تسألوني على البلاطو راهو 35سم على 30 سم ( كولومبو يتحدث هههههههه )



قبلاتي للجميع خاصة القرعاجات ههههههههه

[الأمنيات]

انا اولى الي ترد تبارك الله خرجت هايلة بصح راني متاكدة بلي نينا دايره وحده
درك نسال وحده ونرجع الخبر
المهم خرجت لك تحفه خاصة كريمة القهوة يعطيك الصحة فوووووووووووووووووووووووور

[ام اماني77]

يسعدني ان اكون اول واحدة ترد
حلوى رائعة من الراااائعة الهام محبوبة الكل
جزاك الله كل خير غاليتي
احبك في الله

[serine alger]

يعطيك الصحة.يشهي

[rofia.sarah]

اعطيني هذاك الصحن و شكرا على الوصفة ان شاء الله غدا نجربها باينة بنينة

[سعاذ]

السلام عليكم
يعطيك صحة يا عمرية
نوت في هذي حلوة

[*بيتي مملكتي*]

امممممممممممممم يبان روعة يعطيك الصحة لهومة الشعنونة


تدي الصحن الأولى قبل ما تجي الجماعة

[إلهام07]

المشاركة الأصلية كتبت بواسطة الأمنيات

انا اولى الي ترد تبارك الله خرجت هايلة بصح راني متاكدة بلي نينا دايره وحده
درك نسال وحده ونرجع الخبر
المهم خرجت لك تحفه خاصة كريمة القهوة يعطيك الصحة فوووووووووووووووووووووووور

وععععععععععععع ياربي ماتلقايهاش هههههههه مانحبش واحد يجي يقلي سرقتيلي وصفتي
ربي يخليك ديما تشجعيني مواح

المشاركة الأصلية كتبت بواسطة ام اماني77

يسعدني ان اكون اول واحدة ترد
حلوى رائعة من الراااائعة الهام محبوبة الكل
جزاك الله كل خير غاليتي
احبك في الله

ياعمري والله العظيم نحل في عينيا ونعاود ماصدقتش باللي أنت اللي حاطة الرد شكرا شكرا شكرا والله طلعتيلي المورال
مواح نحبك ، مرورك شرف لي

المشاركة الأصلية كتبت بواسطة serine alger

يعطيك الصحة.يشهي

الله يسلمك

المشاركة الأصلية كتبت بواسطة rofia.sarah

اعطيني هذاك الصحن و شكرا على الوصفة ان شاء الله غدا نجربها باينة بنينة

هههههههه هاو ليك هذيك عينة فقط راهو مازال كاين يم يم كولي وكي جربيها أبعثيلي ههههههههه شد مد

المشاركة الأصلية كتبت بواسطة سعاذ

السلام عليكم
يعطيك صحة يا عمرية
نوت في هذي حلوة

شكرا سعاد على المرور والمتابعة تحياتي ليك

[ام لقمان02]

الله يبارك فيك ويعطيك ما تتمناي

[إلهام07]

المشاركة الأصلية كتبت بواسطة أم إياد أحمد أمين

امممممممممممممم يبان روعة يعطيك الصحة لهومة الشعنونة


تدي الصحن الأولى قبل ما تجي الجماعة

ههههه خفي مدام أميرة راهي لاتية ههههههههههه كون والله ماطيرلك فتفوتة ههههههه

[طهراوي ياسين]

روعة يعطيك الصحة

[إلهام07]

المشاركة الأصلية كتبت بواسطة ام لقمان02

الله يبارك فيك ويعطيك ما تتمناي

ربي يخليك ام لقمان

المشاركة الأصلية كتبت بواسطة طهراوي ياسين

روعة يعطيك الصحة

شكرا على المرور

[قاتلة الصهاينة]

تستاهلي 5 نجووووووووووووووووووم على الوصفة الرائعة عندي شحال وانا نحوس عليها

[coka setif]

يعطيك الصحة

[samasem 2]

يعطيك الصحة