قوارب البطاطا المحشية بالدجاج والجبن بطريقتي

ninafret · 2013-05-16, 20:18

السلام عليكن حبيباتي وحشتوني وحشتوني
كيما علابالكم جاية السخانة وجاي شهر رمضان عما قريب بحول الله وماينفعو غير الاطباق الخفيفة والساهلة راح نقدملكم طبق خفيف من مطبخي وعلابالي يعجب عائلتكم وخاصة اولادكم

كمية من البطاطا حسب افراد عائلتك من الافضل تكون متوسطة ماشي كبيرة وتكون كلها من نفس الحجم تنقيها وتقسمي كل حبة على 2 عرضيا وتخويها من الداخل بملعقة حتى تولي طبقة رقيقة حتى تطيب بسهولة مالازمش تخليها خشينة

ماترميش هاد البطاطا انا نحطها في كيس وندخلها للكونجي لاتور وكي نجي نعمل لاسوب نحطها مع باقي الخضار ولا ممكن تستعمليها للحشو نتاع القوالب كيما عملت انا في آخر الصفحة

اقليها في زيت غزير على نار متوسطة حتى تطيب من الجيهتين وديريلها شوية ملح وحطيها فوق ورق طبخ تتقطر

تحضري صوص بلونش ببصل وثوم وشوية معدنوس مقطع وفلفل اسود وملح وشوية كسبر مرحي وتقليهم مع كمية من صدر الدجاج وتمرقي بالماء وتزيدي حفنة جلبانة ولا زيتون اخضر ولا حمص حسب الرغبة انا عملت جلبانة تخلي الكل يطيب
كي يطيب الدجاج خليه يبرد وفتتيه

زيديلو حبة طماطم كبيرة مقطعة مربعات ومعدنوس وحشيشة مقطعين وملح وفلفل وزيدي البيض حتى تتحصلي على خليط كيما الصورة مالازمش يكون ناشف وممكن تضيفي خضر حسب الرغبة ممكن بيضنجان او بصل او قرعة

عمري القوارب نتاع البطاطا وحطي في وسط كل قارب قطعة جبن طرية ودري على الوجه شوية جبن مبروش انا عملت شيدار

في مول نتاع فرن حطي كمية من الصوص وستفي فوقها القوارب

ودخليها للفرن على 180 من 20د الى نصف ساعة حتى تستوي حبات البطاطا مليح من تحت مع الصوص ويتحمر الجبن من فوق

وقدميها مع رشة معدنوس وليمون

زووووووووووووووووووووم

هادي عملتها بزيتون اخضر في مكان الجلبانة والحشو زدت فيه البطاطا اللي نحيتها من الوسط فورتها شوية وخلطتها مع الدجاج والبيض وماعملتش الطماطم ماكانتش عندي والوجة ماعملتلوش الجبن المبروش دخلتو مباشرة للفرن

نتمنى ينال اعجابكم وراني نستنى رايكم وتقييماتكم وبلا ماننسى تطبيقاتكم

oum ibrahim · 2013-05-16, 20:23

الله الله عليك نينا راكي كما البدر المنور تطلي علينا بنورك اطباقك روووووعة تشهي بارك الله فيك على الابداع واصلي الافادة في ميزان حسناتك ان شاء الله

ninafret · 2013-05-16, 20:25

اقتباس:

المشاركة الأصلية كتبت بواسطة oum ibrahim

الله الله عليك نينا راكي كما البدر المنور تطلي علينا بنورك اطباقك روووووعة تشهي بارك الله فيك على الابداع واصلي الافادة في ميزان حسناتك ان شاء الله

ربي يحفظك حبيبتي ام ابراهيم دائما سباقة بردودك النيرة
العفو حبيبتي والله الافكار والاطباق موجودة لكن ماعنديش بزاف الوقت سامحوني حبيباتي انا مادابيا نكون ديما معاكم
نورتيني حبيبتي

linat · 2013-05-16, 20:26

الله يبارك شاطرة...جوعتيني يعطيك الصحة

rofia.sarah · 2013-05-16, 20:28

وصفة رائعة يعطيك الصحة و امتعينا بالمزيد من وصفاتك التميزة

ninafret · 2013-05-16, 20:34

حبيباتي لينات وروفية سارة نورتوني بردودكم الطيبة ونوعدكم بالجديد

faizarbh · 2013-05-16, 20:38

ما شاء الله يعطيك الصحة حقيقة وصفاتك تفتح النفس و الشهية ربي يخليك لينا

HADIL2044 · 2013-05-16, 20:57

امممممممممممممم تشهي
يعطيك الصحة

اميرة في دنيا حقيرة · 2013-05-16, 21:01

ممممممممممممممممممممم جاوك روعة راني دايما نديرهم بصح نقلي البطاطا و هي محشية

ام مريم اسراء · 2013-05-16, 21:04

ممممممممممم بنان عجبني لونهم الدهبي يشهي بصحتكم وو شكرا على الفن الرائع

ساندي 28 · 2013-05-16, 21:56

شكرا اختي طبق يشهي ربي يحققلك يلي في بالك

الجزائرية80 · 2013-05-16, 22:03

الله يبارك ديما شاطرة

فوزية1975 · 2013-05-17, 07:44

شكرا لكي رائعة

غزة في عيوني · 2013-05-17, 08:08

ما شاء الله عليك يا الفحلة ومشكوووووووورة على الاطباق الشهية

أم ياسين الزهراء · 2013-05-17, 08:26

امممممممممممم سخفتيني هايلة

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري