السلام عليكم و رحمة الله و بركاته
بسم الله
الكمية تكفي لصحنين كبيرين.
المقادير : 5 فلفل حار 2 فلفل حلو, 3 طماطم, 2 سنون ثوم, 1 م ص تابل (كزبر ناشف أي حبوب الكزبرة الناشفة (بذور الكزبرة الناشفة)) و كروية. ملح و شوية فلفل اسود. زيت زيتون.
للتقديم : تن, 1 بيض مسموطة, زيتون.
الطريقة : اصمطي الطماطم في الماء و شوية ملح و حطيهم يستقطرو. و بعد اعصريهم بيدك في كسكاس أو صفاية واسعة. راح تلاقيه الكل هبط إلا القشور و العروق الخشينة. (تقدري أيضا تشويها الطماطم)
اشوي الفلفل و الثوم , حطي الفلفل في كيس بلاستيكي لسهولة التقشير.
هرسي التابل و الكروية و الملح و شوية فلفل اسود , بعد زيدي الثوم و هرسيه, و بعد قشري الفلفل ( اذا تحبي نحي البذور) و هرسي بالواحد بالواحد و خلطيهم مع الطماطم.
في التقديم حطي السلاطة في صحن , صبي عليها زيت الزيتون و زيني حسب الرغبة.
أترككم مع الصور للتوضيح أكثر :
![](https://a2.sphotos.ak.fbcdn.net/hphotos-ak-ash3/548380_2843323896779_1669812500_1668609_395578455_n.jpg)
![](https://up.djelfa.info/uploads/13555887771.jpg)
![](https://up.djelfa.info/uploads/13555889471.jpg)
![](https://up.djelfa.info/uploads/13555887291.jpg)
![](https://a7.sphotos.ak.fbcdn.net/hphotos-ak-ash3/548380_2843324216787_1669812500_1668613_1702006210_n.jpg)
![](https://up.djelfa.info/uploads/13555888351.jpg)
![](https://a2.sphotos.ak.fbcdn.net/hphotos-ak-ash3/522192_2843328856903_1669812500_1668621_1816526734_n.jpg)
![](https://up.djelfa.info/uploads/13555889091.jpg)
![](https://a3.sphotos.ak.fbcdn.net/hphotos-ak-ash3/548380_2843324056783_1669812500_1668611_1325154553_n.jpg)
نصيحتي لرمضان :
أول ما يتواجد الفلفل بكثرة و يرخص, (في الصيف), اختاري نهار فيه النسمة
, و اشوي كمية كبيرة من الفلفل , قسميها في اكياس من غير ما تقشري الفلفل (حوالي 8 حبات في كل كيس), و حطيهم في الفريزر.
![](https://a5.sphotos.ak.fbcdn.net/hphotos-ak-ash3/548380_2843323976781_1669812500_1668610_411028127_n.jpg)
![](https://up.djelfa.info/uploads/13555889991.jpg)
في رمضان , كل عشية هبطي كيس , اول ما يتنحى التثليج قشريه و اسمطي شوية طماطم و كملي نفس المراحل الي حطيتهالكم قبل, و الثوم من غير ما تشويه. و الا من غير طماطم قشري الفلفل و هرسيه و على النار قليه في شوية زيت مع بيضة و ملح و فلفل اسود : تكوني حضرتي عجة في دقيقتين!
و الفلفل المشوي يصبر حتى عام كامل في الفريزر, يعني في الشتاء القادم وقت اللي أسعاره تغلى , تقدري تحضري سلاطة مشوية في كل وقت!!
دعواتكم.
ملاحظة : اللي ما عندها مهراس تقدر تستعمل ماكينة السلاطة هذه :
![](https://up.djelfa.info/uploads/13555886781.jpg)