حابة نتزوج

[مشكلتي]

سلام عليكم

انا طفلة يتيمة عندي 23 عام، لا اب لا ام لا اخوة لا اهل. كنت عايشة مع جداتي مربيتني من لي كان عندي خمس سنين و توفات ربي يرحمها من عامين. وليت عشت عند عمتي الوحيدة مع العلم ما عندي لا خالات لا اخوال لا اعمام لا جدود لا والو. كانت عندي جداتي ربي يرحمها ام ماما و عندي عمتي هذي. عمتي مريضة نفسية و لا عقلية مابقيتش نفرق و تجيها نوبات جنون في ليل تحاوزني من دار و نوبات هاذي تجيها في أي وقت و قادرة فيهم دير اي حاجة. يعني تكون خطر على روحها و على الناس. بلا هذا و هذا مدايرة مشاكل مع الجيران تاعها و كامل متحلفين فيها. مرة رمات مزهرية من طابق الرابع على جارها كان يمشي في امان الله و الحمد لله ماصاباتوش و مرة قطعت اسلاك النت على جارها لمقابلها بحجة الخوف من التجسس!!! و مرة دخلت الحمام و قفلت الباب على روحها بالمفتاح و رمات المفتاح من النافذة و بقات تعيط خرجوني خرجوني روحت لقيت لجيران ملمومين قدام الدار ما حبوش يكسروا لباب و يدخلوا. المهم حالتها حالة. و حاليا رفعوا عليها قضية راهي مهددة بالسجن. و طبعا وسط هاذي المشاكل كل الموضوع ما يخلاش من الانتهازيين. نتعرض للتحرش بشكل يومي من طرف شباب الجيران و لي خلاني نكتب هاذ المشكلة هي تمادي تاع واحد فيهم لدرجة وين عرض عليا نبيع روحي ليه مقابل يتولى هو موضوع عمتي بحكم انو مرفه و عندو معارف. راني خايفة عمتي تدخل للحبس و نبقى وحدي. هي صح تاع مشاكل بصح ساترتني و خايفة لكان ما يدخلوهاش لحبس يدوها لمصحة امراض عقلية ثاني كيفكيف نبقى وحدي وسط الوحوش هاذو. حاليا راني نكمل ماستر تاعي و نخدم نصف دوام موظفة استقبال في مكتب. تعبت نفسيتي و الحمل زاد عليا. حابة نتزوج براجل يهز معايا شوي نكون في ظلو. راح تقولولي واحد ما خطبك نقولكم خطبوني بزاف بصح لي يسقسي على عمتي و يعرف خدايمها يهرب ما يوليش. بصح انا وش ذنبي؟؟؟؟ راني متأكدة غير تروح عمتي راح نتعرض لكل شيء اصلا مع جبروتها و ما منعتش.