رسالة ...........

[bis kou]

السلام عليكم ورحمة الله وبركاته

أتمنى أن كل أموركم على ما يرام

لكل من لا يعرفني أنا صاحبة هذه القصة

https://www.djelfa.info/vb/showthread.php?t=2260263


حسنا........ أدري وأعرف ما يعانيه البعض منكم
أشعر بما يشعر الكثير منكم
أتحدث عن أولئك الأبطال الذين لم يحالفهم الحظ في معركة بكالوريا 2020 لكن على الأقل كان لهم شرف المحاولة وهذا يكفي

راح نهدرلكم بأسلوب أخوي
ديروني ختكم جاية تنصح فيكم
لأنو مريت بهاذ الفترة وشفت انو من الواجب نوقف معاكم

شوفو علابالي كاين بزااف منكم لي تعب تعب وملحقكش لوين راه حاب سواء كان اجتاز البكالوريا لأول مرة أو اعاده حرا لكن محالفوش الحظ
خاصة مع ارتفاع معدلات القبول علابالي الكثير منكم طاحلهم المورال وفشلو وكرهو خاصة كي عادت 15 16 متوصلكش لوين حاب فهنا كان الله في عون الجميع .............. راني حاسة بيكم والله

مراحش نقولك مباشرة لا تياس وكن قويا ومنعرف شاهي ...... نقولك هاذ الفترة علابالي راح تلقى روحك دور في دوامة متعرف البدية تاعها من نهايتها

رح تصيب روحك عايش غي في احداث هاذ العام وتتفكر بلي في التالي تجيك نتيجة جامي جات في بالك ولا مجهوداتك متتناسبش مع واش قدمت

ايه انا حسيت بهذا الشعور بشكل أسوأ بكثيير مما تتخيلونه
خذو العبرة مني ....... أنا في بكالوريا 2019 وهي ثاني كانت ظروفها نوعا ما استثنائية خاصة مع الحراك وين كانت الدراسة متوقفة وكامل .....كنت ديما نسمع هاذيك الهدرة تاع لي ما يجيبش باك 2019 ميزيدش يعاود الباك ويبطل وووو.........ونزيدكم بلي كنت أنا الوحيدة ...الوحيدة في كل الدفعة تاعي من بين المجتهدين لي داو فوق 15 ومجبتش معدل مليح ومنحكيلكمش كيفاش غاضتني وقعدت نقول علاش غير انا وتمنيت لو أن الارض تنشق وتبلعني ومنعيشش هذاك الشعور لأانو صراحة عدويا ومتمنيتش يعيش هاذاك الشعور
وجاتني صح صعيبة بزاف هاذ الفترة وكي رحت للجامعة وقاع عشت صراع نفسي رهيب جدا ومتقبلتش فكرة نعاود الباك بسك كنت خايفة بزاف بزاف من حكاية ظلم الأحرار وخفت نضيع عام من حياتي باطل خاصة انو قررت يا الباك يا لافاك وزيد كاين ظلم الاحرار سما واش انا ندي بيدي للهلاك ؟؟

واش قررت ندير ؟

أول حاجة بديت بيها هي في هاذ الفترة قوي صلتك بربي ...ادي الصلاة في وقتها واكثروا من الذكر خاصة الصلاة على النبي عليه الصلاة والسلام والإستغفار والحوقلة وايضا انصحكم بالمداومة على قراءة سورة البقرة....بعدوا عن كل ما يغضب الله عزوجل سواء من صوالح تشاهدوها ولا أغاني ...الخ يعني صوالح الي ميرضوش ربي

ثانيا ابداو تصفو المحيط تاعكم....اي شخص يظل يطيحلكم في المورال وقاعدين يحطولكم الملح على الجرح خرجوهم من حياتكم بدون أي مقدمات متخموش ها قادرة يزعف وبلا بلا خاطش لي يحبك ويبغيلك الخير جامي لا يدير فيك هذوك الامور

ثالثا ننصحكم انكم متظلوش تخبرو قاع الغاشي بلي راح تعاودو الباك بسك مشي كل الناس تحبلك الخير
وصلو استخارة ......لربما كاين الكثير ممن يريد مدرسة عليا ولا الطب بصح ربي شافلهم الخير في امور اخرى بلاك يلقاوه في تخصص آخر ويلقاو فيه خدمة ويخلص غايا .... متظلوش دايرين في بالكم بلي كون منديرش طب ولا شبه طبي ولا مدرسة عليا للاساتذة معناها مستقبل ضاع لالا ابدا
الرزق راه أشد طلبا للانسان من الموت يعني كون ربي كاتبلك تدي 10 ملايير تديها تديها الوظيفة ماهي إلا سبب وأصلا راكم تشوفو كاين بزاف لي اختارو هاذ التخصصات وللأسف راهم يعانو البطالة كغيرهم من التخصصات الأخرى
أهم حاجة احرصوا انكم تبعو ميولاتكم والتخصصات لي راكم صح حابينها من قلبكم مشي علا جال خدمة مضمونة ولا بريستسج
شوفو الاجابة في هاذ الموضوع باش تفهمو كثر
https://www.djelfa.info/vb/showthread.php?t=2261400

اطلبو ربي يبينلكم الطريق الصحيحة وألحوا في الدعاء وناجوه وحبذا كون تقوموا الثلث الأخير من الليل ودعوه فيها لأن فيها الدعاء مستجاب....

ونأكدلكم على حاجة خااااااااااااصة الي راح يعاودو الباك أحرار هاذ الملاحظة ديرها في كل بلاصة عندك ودير عليها ألف خط احمر
كونوا على إطلاع بكل التغييرات لي راه صارية في البرنامج ونوصي ثاني ونعاود المنهجية ثم المنهجية ها بالاكو المنهجية

تعلمو تنظمو الورقة تاعكم وتضبطوا اجاباتكم وفق المنهجية .... ومتلعبهاش قافز بلي راك قريت البرنامج معناها راني حاكم وتولي تهمل مادة على مادة ولا تخلي الحفظ للتالي .....كلشي يتبدا من الأول بالحفظ بالمات بالفيزيك بكللللللللش
وقضية ظلم الأحرار متظلوش معمرين راسكم بيها............ صح الكثير اشتكاو من الظلم بصح لي صح صح تظلم نقولو حاجة الدنيا راهي قصيرة والقدر يبدع في تصفية الحسابات معناها لي ظلمك شئت أم أبيت راح يذوق واش ذوقك ملا ديرو ربي في بالكم ومتخافوش ورح نهدرلكم حاجة
كاين بزاف احرار للأسف ميكونش قاع جايب خبر لواش راه صاري .......ياو سموك تكون على اتصال مع كل الاساتذة في كل المواد باش يخبروك بقاع وش راه صاري باش مشي في التالي لربما كانت هناك ملاحظة مهمة في الدرس ولا في المنهجية ذوك نتا تضيعها بعدا تقول ليسوجي صعاب وظلمونا ومنعرف ........... هيا صح كاين لي بلاك تظلمو بصح نتا تاني قدم أسباب صحيحة

وتاني كي تخلي كلشي بيد الله سبحانه سترى التسهيل في كل امورك ما تقلقوش قاع مادام كاين ربي متخممش قاع غي لي كاتبهالك تديها وتفكروا التوفيق راه بيد الله سبحانه يعني تدي 16 17 18 ميعنيش انك خارق الذكاء ولا حاجة انت مجرد طالب قدم الأسباب ووفقو ربي وكاين بلاك ربي شافلهم الخير في انو يعاود ولا يدير حاجة خلاف وش راه حاب

خلاصة الموضوع راني حاسة بيكم بزاف وبلاك راح تقولو بلي حنا دفعة معندناش الزهر ووو ...نتوما مشي معندكمش الزهر نتوما صح دفعة ابطال ونقولها ونعاود لأنو مشي اي شخص تجيه الصعاب في هاذ الحياة

مادام راك تواجه الصعاب تأكد بلي نتا أقوى بكثير مما تتخيل لأانو ربي اصلا لا يكلف نفسا إلا وسعها ....إلا وسعها تمعنوا فيها مليح

وجامي تقول فشلت وانا فاشل ولا ابدا ....... لأنكم صح أبطال وراكم خذتوا معركة ...... الجبناء ميخوضوهاش اصلا فهمتو

وميشقاش تسمعو الهدرة السوقية وتاع الفيسبوك لي مجابش باك 2020 غي يبطل ولا لي دا 9 يروح يحرث وبلابلا ...... نتوما ديرو هدف في حياتكم وخدمو عليه وبقاو تقاتلو على جالو لانو هذي حياتكم ليكم برك إما تعيشوها كيما حبيتو ولا تبقاو تسمعو غي الهدرة الفارغة ومديروا والو راني قلتهالكم لأني سمعت نفس الكلام سنة 2019

وخلو كل حاجة تصرا في حياتكم درس وتعلمو منو الحياة راهي مليئة بالصعاب والتحديات ومكاش حاجة تلقاوها بالساهل كلشي ليقلو التعب والدنيا هذي هيا أخذ وعطاء ... ورح تكتشفو الحكمة من الامور لي تصرالكم دايمن حتى لو طال بيكم الحال

وفي الأخير أقول لكم

لا تيأسوا ائا أخر الله ما تحبون ولا تتأذوا من مرارة القدر ولا تحزنوا اذا اجبرتم على تعايش مع وضع قد يؤلمكم ....... بل اصبروا وابتسموا فالله سبحانه قال بكل رحمة "إن مع العسر يسرا" ....... الله يدبر لكم في الغيب أمور لو علمتموها لبكيتم فرحا فهونا على قلوبكم وأبشروا

والتوقيع تاعي إن شاء الله راه يبعث فيكم نوع من الأمل
معذرة راني طولت الموضوع لكن شفت انه واجب علي اني نساعدكم لأني صح حاسة بالكثييييير منكم
اي استفسار ولا اي حاجة حابين نعاونكم فيها تفضلو

لا تنسوني من صالح دعائكم .......... دمتم بخير والسلام عليكم