وفقكم الله

[nr.houda]

السلام عليكم ورحمة الله وبركاته .
كيف حالكم اخوتي و أخواتي .
...
إن شاء الله تكونوا قريتوا مليح في الأسبوع لي فات ، وحتى لو قريتو غي ساعة في النهار فيها بركة .
حضروا أنفسكم ، نشفى هذا الوقت ، كنت نقول ماباقيش الوقت ، كان كاين إضرابات بعد الاختبارات مباشرة
، نعقل الناس الكل ولات ترتاح من تعب الاختبارات حسب قولهم ، انا ولين تصحح أخطائي و نخدم على نفسي و نحل التمارين ، ونراجع دروس الفصل الأول.
العبرة اغتنموا كل فرصة و أرجوكم أرجوكم أرجوكم نصيحة من أخت تبغيلكم الخير تعبنا نفسكم جسديا ، اسهروا، نوضوا بكري ،كافحوا، حوسوا تفهموا ، مانيش عارفة ضحيو بكلش في سبيل تفرحو ا والديكم تردولهم وكان شوية من الجميل ،تعبوا عليكم ، سهروا معاكم ، يحوسوا يديرلكم دروس خصوصية ، يستناو فيكم باش يفتاخروا بيكم .
لكن 🚫 حذاري والله صدقوني ، التعب النفسي ، الأفكار السلبية ، القلق ، الخوف ، اتركوه جانبا ، والله شاهد على ما أقول التعب النفسي و هذاك القلق والله ما يروح تريح الصيف و تدي الباك و تفرح كل شيء يولي عليك ،انت راك تفكر في في الباك، لكن هذا مجرد امتحان كنت كيفكم كي نسمعهم يقولو مجرد امتحان نقول Pask فاتو و تهناو والله غي راح يجيكم ساهل إذا كنت محضر ، و نخدموا بإذن الله لي عنده معلومات و حافظ صايي ملازمش القلق ، ياك ربي راه كاتبنا كلش و ربي ميضيعش تعب عبد من عباده هذي مستحيلة.
الخلاصة من كل هذا ، راني نشوف فيكم ناشطين مشاء الله تبارك الله عليكم ، نتمنى من كل قلبي ، يوم النتائج نفرح معاكم ، اعتبروني اخت ،فاتت بتجربتكم، بكات، جاها شعور تاع نسيت، فشلت ، طحت ، مديتش مليح في الاختبارات ، بزاااف حاجات، لكن في كل مرة كنت نوقف من جديد و ناضل في سبيل الحلم .
المهم، دائما نبغي ننشر كلام من قلبي يالوكان نكون في قمة اليأس نبغي نحفز غيري لأنو كلمة وحدة قادرة تفيقك و كلمة صغيرة قادرة تهدم أحلام .
نتمنى كلامي يكون فادكم يالوكان شوية .
و نفكركم ثاني ، تعبوا نفسكم يجي الصيف و تريحوا ترقد نهار تريح من تعب عام ، بصح التعب النفسي صدقوني متريحوش منه و يكون عنده أثر سلبي سلبي سلبي على حياتكم ،الحياة متكملش عند الباك ، ديما خمموا لبعيد .
وفقكم الله
دعوة في ظهر الغيب