السلام عليكم
أنا شاب متزوج حديثا من فتاة دامت بيني و بينها علاقة لمدة عام, مشكلتي قبل ما نتزوج كنت نحب بنت خالتي و خطبتها مرتين , مرة من يماها كي كانت تعقب الباك و مرة من خوها كي طلعت للجامعة, وقتها حاولت نتواصل معاها على انفراد بصح ماحبتش و غلقت كل الطرق في وجهي يعني ماخلاتلي حتى امل بش نزيد نصبر عليها, من غضبي وليت نتصرف تصرفات غريبة غير باش نبينلها بلي صاي خرجت من راسي و مانيش سامع بيها بصح ماكنت نسمع والو من جيهتها و لقيت بلي هي لي مش سامعة بيا و مش مهتمة أصلا بالموضوع . قلت بلاك عندها واحد في حياتها و بديت نراقبها و نعسها من تخرج للدار حتى ترجع و جبت تلفونها و فيسبوكها و شفت مع من تحكي لقيتها ملتزمة مليون في المية وخاطيها كلش...كنت معول نعاود نخطبها بصح كرامتي ماخلاتنيش خفت تزيد ترفضني مالا قررت نكمل حياتي و نشوف طفلة اخرى و تعرفت على بنت من العايلة و تعلقنا ببعض و تزوجنا ... . البارح كنت مع خوها و فتحنا موضوعها فجأة و سقسيتو علاه ختو رفضتني خاصة انها مازالت ترفض كل الخطاب لي يجيوها. قالي خطبتها في وقت ماكانتش مستعدة تتزوج و كانت تقرا و هي طفلة تحب قرايتها بزاف. و حاليا راهي توجد للدكتورا تاعها ....روحت للدار مقلق و وزنت كلامو في راسي لقيت بلي أنا زربت روحي و تزوجت و خليت الطفلة لي خاطيها و رحت تزوجت بنت كنت مصاحبها و بديت ندخل في مقارنات هذي قارية لخرا ماشي قارية هاذي تصاحب لخرا ماتصاحبش هذي هك لخرا هك ....... و ماتهنيش حتى رحتلها للجامعة بش نحكي معاها...كي شافتني تجاهلتني ماحبتش تحكي معايا بصح أصريت عليها و قلتلها تجاوبني برك علاه رفضتني؟ قاتلي عيب تفتح سوجي هذاا و نتا متزوج و بلي السبب مهما كان فات وقتو و الخلاصة ماكانش مكتوب و راحت.
فات شهر على هاذ الهدرة و من يومها مانيش في حوالي. حاس روحي وليت حابها كثر من لول و ندمت بزاف لي تزوجت و ماصبرتش عليها كثر باسكو تستاهل نصبر عليها . قولولي وش ندير و أنا عارف مليار بالمية بلي مستحيل تقبل تكون زوجة ثانية و مستحيل حتى تقبل بيا لوكان نطلق مرتي. رايح نهبل