بسبوسة روووعة من عند صديقتي جزاها الله خيرا

[RIMA.87]

كيف أحوالكم أخواتي في الله إن شاء الله تكونوا بصحة و عافية
اليوم جبتلكم البسبوسة لي الكل يعرفها و أكيد هنالك وصفات عديدة و ناجحة ،


بالنسبة ليا ما جربتهاش من قبل حتى ذقت بسبوسة صديقتي ربي يحفظها و كانت بنتها روووعة و خفيفة و معسلة ،عطاتني الوصفة لاحظت انو المقادير نفسها المتعارف عليها في البسبوسة لكن طريقة التحضير فيها اختلاف بسييط و هو لي صنع الفرق في الذوق و جربتها و الحمد لله النتيجة كانت ما شاء الله روووووعة ،





جربوها و اعطيوني رايكم اخوات و دعوة في ظهر الغيب لصديقتي ربي يحفظها و يرزقها الذرية الصالحة التي تقر بها عينها و يرزقها من خيري الدنيا و الآخرة .

ملاحظة:
المقادير التي في الصور هي نصف مقادير الوصفة الاصلية لي عطاتهالي صديقتي و المكتوبة في الاسفل ،لاني استعملت صينية فرن صغيرة مقاسها 30سم /25سم.


التحضير المسبق للقطر او الشاربات :
لازم القطر يحضر مسبقا حتى
نشربو البسبوسة مباشرة بعد ما طيب ،
كل أخت عندها طريقتها في التحضير
و طريقتي كالآتي : كيلة سكر مع 2كيلات ماء و نصف حبة ليمون
نحطهم فوق النار نحرك حتى يذوب السكر،
و نتركو يغلي من 10الى15دقيقة حتى يثقال شويةوعندما دير فقاعات كيما نشوفوهم في الصورة يكوون واجد و نطفي عليه النار.و لي تحب نكهة ماء الزهر تضيفلها ملعقتين ا اكثر حسب الذوق بعد ما طفي عليها بالطبع .



هذه مقادير الوصفة الاصلية كيما عطاتهالي صديقتي و تتلاءم مع صينية فرن كبيرة.
نبدأ بسم الله : نشعل الفرن على 180درجة
و نحضر المقادير التالية
8 بيض ،
كاس سكر مبلور ( عادي)،
كاس زيت ،
كاس حليب سائل،
بشر حبة ليمون ،
فانيليا
2كيسان سميد متوسط
( مولة أو سيم)
2كيس خميرة كيميائية

طريقة التحضير
أولا:
* نخلط السميد مع الخميرة الكيميائية و نتركه جانبا
نفصل صفار البيض عن البياض،
*باستعمال الخلاط الكهربائي :
نطلع البياض حتى يولي كالثلج و نتركه جانبا،





ثانيا:
نخلط صفار البيض مع السكر ثم نضيف الزيت
تدريجياو نخلط أي على 4أو 5دفعات و كل مرة نخلط
،بعدها نضيف الحليب على مرتين أو ثلاث مرات ،
و أخيرا نضيف الفانيليا و بشر الليمون و نخلط،





ثالثا :هذه هي الخطوة المختلفة و المهمة في هذه الوصفة ،
الآن نوقف الخلاط الكهربائي و نستعمل سباتولا و نضيف السميد و بياض البيض بالتناوب ، نبداو ببياض البيض ندخله جيدا من فوق لتحت ثم نضيف السميد و هكذا على 3أو 4 دفعات و ننهي ببياض البيض كيما بدينا بيه،و نحطها في صينية الفرن مدهونة ،
بعد ما طيب نخرجوها و نتركوها 5دقائق ترتاح فقط
و بعدين نسقوها بالقطر و نتركوها تتشرب.





و في الاخير هذه النتيجة ،بسبوووسة من اروع ما يكوون



بالنسبة للسميد استعملت هذا