تفضلوا: اقتراحات في اللغة العربية

[وَحْـــ القلَمْ ـــيُ]

السلام عليكم ورحمة الله وبركاته
هاذي مجرد افكار اقترحتها هنا قبل قليل لاحد الاخوة) قلت بالاك تفيدكم في الادب
وراهي بالعامية
***

كل ما في الامر انك تفهم ماشي تحفظ
مثلا في الاعراب من الابتدائي وحنا نقراو في المبتدا والخبر والفعل والفاعل
أول شي قرا الجملة وشوفها هل هي اسمية ام فعلية؟؟
اذا كانت اسمية دوح على المبتدا اللي بدينا الهدرة بيه وزيد دوح على الخبر لي ينحي الغموض تاع المبتدا
اذا كانت فعلية دوح على الفعل ، اطرح السؤال: واش صرا ؟ تلقى الفعل اللي صرا
وشوفو لاكان صرا في الماضي ولا المضارع ولا امر
وقاعدة: لكل فعل فاعل
روح دوح على الفاعل، اطرح السؤال: شكون خدم الفعل هذا؟ تلقى الفاعل
زيد دوح على المفعول بيه لاكان كاين، اطرح السؤال: شكون صراتلو هاكذا؟
تلقى المفعول به
-
اذا عطاوك كلمة عرف بلي قريتوها من قبل
حللها : اسم ولا فعل- نكرة ولا معرفة - مجرورة ولا مرفوعة
وتفكر واش الدروس لي تنطبق عليها

***
الوضعية دوم يجيبوها ساهلة وقرينا اللي كيفها في الدروس
خصوصا العلميين تكون ساهلة
اذا ممكن يجيبلك قصيدة تاع ابي العتاهية والوضعية ممكن يقولك تحدث عن الموت ووجوب العمل الصالح استعدادا للاخرة
ممكن يجيبلك : لديك صديق منحرف انصحه للتفكر في دينه
-
ممكن يجيبلك قصيدة تاع ابي نواس تاع الخمرة ويقولك في الوضعية اذكر اسباب انتشار هذا النوع في العصر العباسي
-
شوف في الموقع الاول للدراسة في الجزائر
ممكن يجيبلك قصدية زهد ممكن يجيبلك تهدر في العضوية على على دور العلم
المهم شيء مرتبط : الاخلاق الصلاح الموت الفساد الظلم ....
***
بالنسبة للمقامة ما تخلعكش راهي نص عادي
والوضعية رايحة تكون قريبة للنص
ممكن يحكيلك في النص على الشهرة والوضعية يقولك : اخترت مهنة التعليم فحذرك اهلك منها لانها ليس فيها شهرة...
ممكن يتكلم على التواضع
مواضيع عادية جدااا من الحياة

ومنهجية الاجابة في الوضعية:
اولا فهم واش طلب منك قبالا
مقدمة من زوج سطور مثلا تقدر تكتب فيها تعريف (الطيبة، التواضع، الظلم...) المهم تكون مدخل صغير مناسب باش تبدا تحكي في الموضوع المطلوب
العرض: تحط فيه واش قالك في الموضوع
كتب جمل قصيرة وصحيحة: فعل اعل مفعول به.مبتدا خبر
اكتب الاملاء صحيح
حاول توظف الشي لي طلب: (اغراء تحذير...)
ايلاكان حافظ ادلة استشهد بيها في الموضع المناسب
حفظو ايات واحاديث
مثلا احفظ هذا البيت الشعري:


هوَ المَوْت الذي لا بُدّ منْهُ،*****فلا يَلعَبْ بكَ الأمَلُ الكَذوبُ

وايضا: استعملوا كلمات الاناشيد اللي تحفظوها

الوضعيات ساهلين وحاول تحط شوية صور بيانية ومحسنات بديعية
لاكان حافظ شوية من بيت شعري حطو اقتباس كانك نتا للي كتبتو وبدل فيه الشي الي نسيت
حط الجناس ولا السجع
مثلا: الانسان تكبله الذنوب، وفي كل مرة يرجع ويتوب حتى يعفو الله عنه ويقبل العذر منه.


استعمل التشبيهات اللي تعرف:
مثلا اذا كانت عندك وضعية في نصح صديق تقدر تقول :
فاتجهت اليه انصحه بالحسنى والرفق واللين ، لأن الكلمة الطيبة كشجرة طيبة تؤتي أكلها كل حين

استعمل الحكم اللي تعرف: مثلا في وضعية حول العفو :
تقول: على الانسان ان يقابل اساءة الجاهلين بحلمه وعفوه فليس من الحكمة ان أعض كلبا عضني
استعمل الترادف: الجهل والسفه- الحلم والعفو- المشاكل والخطوب - الذنوب والخطايا
حافظ على علامات الترقيم والخط المفهوم يعطي انطباع حسن عند الاساتذة:
خاتمة: تقدر تحط فيها وجهة نظر اخرى ولا ملخص ولا حكمة تخلص بها ولا نصيحة
وربي يكون معاكم
ايلاكان عندكم مشكلة في اعراب معين ولا في التفريق بين المحسنات والصور البيانية ولا اي اسلوب بلاغي حطو وضوع وان شاء الله نعاونكم

(اسفة على الاطالة)

هذا موضوع محلول فيه المنهجية عموما على هذا النوع وشوفو في الكراس ممكن يكون ناقص:
https://up./downloadf-3372ywvz1-docx.html