مشاركتي في مسابقة احسن طبق تقليدي ما بين الولايات "ثعصvانت من تيزي وزو "

[انا هي رزيقة]

نهاركن سعيد فحلات الجلفة واقيلا راكم تستناو حتى نحط مشاركتي باه تعاندوني ...... خخخخخخخخ اوكي حبيباتي يشرفني ان اشارككم احد االاطباق التقليدية الكثيرة الحبيبة على قلبي و ذلك بفضل هذي المسابقة الجميلة التي اتاحت لنا فرصتها مشرفتنا المبدعة زينب شكرا اختي زينب ... في الحقيقة احترت في اختياري لاني عندي وصفات تقليدية كثير لكن بضعها يتطلب جهدا و وقتا لا امتلكهما للاسف ..... لهذا اخترت هذا الطبق السهل و البسيط جدا جدا بصح بنين اكيد ..... خخخخ طبق من تراثنا القبائلي العريق و من ولاية تيزي وزو بالتحديد بصح بطريقة عائلتي لانو فيه وصفات كثير لنفس الطبق . انه طبق ثعصvانت انطقيها كيما راكي تشوفيها ...... خخخخخ او عصبان السميد... و جيراننا في بجاية يقولولها تيكرvاvين ....خخخخخخ حبيت نعلملكم تنطقوها على اصولها ...... خخخخخخخ

هذا الطبق علمتهولي جدتي من ابي ربي يرحمها و يجعل مثواها الجنة . حضرتو على طريقتها الخاصة بصح للامانة أضفت لمسة من عندي و هي زيادة قطعة دجاج و كمشة صغيورة عدس كاين كثير يضيفوها بصح هي متحبوش الله يرحمها .كيما قلتلكم الجدات القبايليات يحبو البساطة و عدم تكليف انفسهن في حياتهن اليومية و هذا طبق تع كل يوم بصح مشبع و غني الى ابعد الحدود و شتوي بامتياز

نبدا على بركة الله قاعدة الطبق سميد متوسط و زيت زيتون و نعناع يابس و بطاطا و بصل و ثوم و فلفل عكري و راس الحانوت و فلفل اسود و قصبر مطحون و ملح و شوية طماطم مصبرة و قطعة صغيورة جدا من شحمة العيد صدقوني متبانش خلاص بصح تعمل اختلاف في الذوق و قرن او 2 فلفل حار يابس او لا لك الاختيار . و اضافاتي الخاصة هي الدجاج و شوية فقط عدس و حشيش قصبر.

نبدا اولا بالصوص نحط البصل مقطع رقيق يتقلى مع الدجاج و الثوم و التوابل و حوالي ملعقتين او 3 زيت عادية و كمشة صغيورة عدس مغسولة مليح و ملعقة صغيرة طماطم مصبرة نقلي الكل مليح ثم نزيد حبة طماطم صغيرة مقطعة رقيق و نزيد نقلي ثم نمرق بكمية مليحة من الماء (حوالي 5ر1 لتر) لانو رايحين نستعملو الصوص للم عجينة كريات السميد و ثاني الكريات لازملها صوص باه تطيب و لازم يبقى شوية صوص باه ناكلو الكريات معاها . بعد 10 دقائق من غليان الصوص نرمو فيها البطاطا مقطعة مكعبات و نزيد قرن الفلفل الحار . اذا مدرتيش دجاج قلي البطاطا تاعك من البداية مع البصل و الثوم .

نروحو لكريات السميد تاعنا في صحن عميق نحطو السميد متوسط مع قرصة ملح متكثروش لانو رايحين نلموه بالصوص لي هي مالحة زيدي شوية فلفل عكري لي تحب الحار تستعمل عكري حار و نفتتو فيه هذيك الشحمة بصباعتينا حتى نذويوها كامل في السميد تولي متبانش خلاص ثم نزيدو نفتتو النعناع اليابس في السميد نطحنوه ما بين صباعتينا مليح و نخلطو لازم تشوفي النعناع باين فيه ثم اضيفي كمية من زيت الزيتون هنا لك الاختيار لي تحب روحها مليح تدير غير زيت الزيتون و لي تحب روحها نص نص تدير نص زيتون و نص زيت عادية و لي متحبش روحها خلاص تدير غير زيت عادية ...... خخخخخخ نبسسو السميد حتى يولي شغل مقروط هذ الخطوة مهمة جدا لانها هي لي راح تعطيك كريات طرية و مبسسسة امممم ...زيدي شوية حشيشة قسبر مقطعة رقيقة ثم لمي العجينة بالصوص لي راهي تغلي كي شغل راكي تلمي في المقروط او المبسس لازم تستعملي يدك باه تحسي بالقوام المطلوب و متخافيش مش رايحة تنحرقي في الاول خلطي بملعقة ثم استعملي يدك . شكلي الكريات تاعك على ذوقك (سواء شكل دائري او بيضوي) ثم ارميها في الصوص بعد متكوني نقصتي النار (لازم الدجاج يكون طاب) و كي تكملي كل الكريات احكمي المرميطة تاعك من يديها و دوريها شوية باه الكريات يسقمو رواحتيهم و يحكمو مليح بلايسهم .....خخخخخ زيدي رشة نعناع يابس من فوق ودوقي الملح و خلي الكل يطيب على نار متوسطة حوالي 10 دقائق او 13دقيقة اقصى حد على حساب كمية الكريات . هاهو قوام الطبق كي نطفي عليه الكريات يكونو طابو كي تحكمي وحدة و تقسميها تلقياها ولات صفراء من الداخل و حاكمة روحها كيما هك. و خلاص .... تم بحمد الله و لك اختي الاختيار في تقديم طبقك تاكليه بالصحة و العافية هنا صورة مقربة ......خخخخخخ

و هنا بدون لحم و