|
قسم الأطباق الرئيسية الأطباق الرئيسية حصرية لأعضاء المنتدى |
في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة ( تقرير عن مشاركة سيئة )، و الموجودة أسفل كل مشاركة .
آخر المواضيع |
|
la purèe .....تشكيلة متنوعة بلمسة مختلفة
|
أدوات الموضوع | انواع عرض الموضوع |
2016-05-31, 11:30 | رقم المشاركة : 1 | ||||
|
la purèe .....تشكيلة متنوعة بلمسة مختلفة
السلام عليكم ورحمة الله وبركاته حبيباتي رانييييي جيت واكيد جبت معايا الجديد نتمنى نتمنى يعجبوكم كل مرة نحاول اني نقدملكم حاجة جديدة ومختلفة وممكن كاين وصفات معروفين لكن اكيد هنا راح نقدمهم بلمسة مختلفة الإختلاف في الأطباق والأذواق والبحث الدائم على البنة المختلفة هاذا هو هدفنا اليوم راح نقدملكم أطباق ووصفات بلابيري ( البطاطا مغلية ومرحية) حقيقتاً وصفات اكثر من رائعة بنة وشكل وذوق خيال على بركة الله وبسم الله بطاطا بيري محشية بالدجاج قشري حبات بطاطا وقطعيهم ثم غليهم بعد ما طيب ارحيها في الرحاية اليدوية اضيفي ملح فلفل اسود و القليل من الزبدة خلطي مليح وخليها تبرد من جيهة تكوني تبلتي قطع من صدر الدجاج مقطع رقيق بالملح وفلفل اسود زنجبيل ولفاح وثوم بودرة خل او عصير ليمون موطارد هريسة وخليها مدة اربع ساعات في الثلاجة او اكثر قليه في شوية زبدة وزيت مليح مع التقليب المستمر طفي عليه بعد ما يطيب وأضيفي شوية فرماج رابي (مبشور) خذي مول نتاع مسكوتة غلفيه كلو بالورق البلاستيكي وزيدي ادهنيه بالزبدة الذائبة فرغي البطاطا المرحية فيه واعدليها على الجوانب عمري الوسط بالدجاج وأغلقي بالبطاطا اللي بقات وزيدي اغلقي بالبلاستيك لوحيها في الفور مدة نصف ساعة ونحيها خليها 5 دقائق واقلبيها في طبسي ثم زيني بالشكل اللي حبيتي اللذة روعةةةةةة انا زينتها بالمايونيز والكاتشب امممممممم ما تتشبعش البعطوش باللحم المرحي والبطاطا بيري ذوق جديد وأكثر اكثر من رااااااائع في منطقتي نسموه البعطوش لكن ما نعرفش اسمو في مناطق اخرى اي اخت تعرف اسمو تحطهولي ولها مني الشكر هو اللي في الصورة نقي لبعطوش نتاعك من الشوك اللي فيه والأجزاء اللي تكون ذبلانة ثم اغسليه حطيه في ميكسور وحطي معاه شوية فلفل حار دبشة 1 م ص طماطم مصبرة انا هنا زدت معاه هاذاك الذيل اللي يجي مع القرنون نقيتو وقطعتو ورحيت الكل مع بعض هاذ الخليط خلطيه مع كمية من اللحم المرحي 1 م ص نشاء زنجبيل مرحي فلفل اسود ملح لفاح تكوني موجدة بطاطا مغلية وارحيها غير بالفرشيطة ضيفيلها شوية دبشة فلفل اسود وفرماج مرحي وخلطي خذي كمية من خليط اللحم اطرحيه بالطول وضعي حشوة البطاطا في الوسط بالطول وأغلقي عليه وجدي لي مول نتاعك انا استعملت هاذ لي مول اللي يكون الوسط نتاعهم عالي شوية دهنتهم بالزبدة وفرغت شوية طماطم مصبرة كنت حليتها في شوية ماء شكلت اللحم المرحي شغل حربوش ووضعته في ليمول وزدت فرغت عليه شوية صوص نفس الطريقة حتى كملت كامل لي مول اللي عندي درتهم في حمام مائي وطيبتهم وجدت صوص حمراء وطيبت فيها البعطوش اللي بقالي وكويرات من اللحم المرحي اللي بقالي وخليتهم حتى طابو مليح وخثار المرق نتاعهم وقدمتهم بهاذ الطريقة جربيه اختي والله ما تندمي بإذن الله على خاطر روعةةةةةةةة بكل ما تعنيه الكلمة بيري محشوة باللحم المرحي والفلفل المرقد تخيلو الذوق معاية بلا ما نقوللكم عليه التجربة خير برهان بصح امممم واممممممم قشري البطاطا عادي واغسليها قطعيها مكعبات وغليها ثم ارحيها مع اضافة شوية فلفل اسود وملح وشوية زبدة ونكهتها بالثوم بودرة يعطيها ذوق رااااائع وجدي اللحم المرحي نتاعك وتبليه عادي بالتوابل اللي متعودين عليها ومن جيهه اخرى وجدي فرماج شاف او بربار خلطي معاه معدنوس وفلفل مرقد مقطع رقيق شكلي كريات من اللحم المرحي يكونو شوية كبار واحشيهم في الوسط بالفرماج والفلفل ثم هاذوك الكريات غطيهم ( غلفيهم) بالبطاطا المرحية ( لابيري) في مول نتاع الفور صبي كمية من صوص الطماطم تكوني حضرتيها من قبل ضعي الكريات نتاوعك بعد ما تخليهم مدة نصف ساعة في الثلاجة ضعيهم فوق الصوص وزيدي فرغي عليهم الصوص ومن بعد فرغي عليهم لابيشاميل والفرماج المرحي والى الفور حتى يحمارو من فوق وبسسسسسس بلا ما نحكي بزاف جربي وأحكمي بنفسك بيري محشية باللحم المرحي غلي البطاطا بعد ما تقشريها وتغسليها وتقطعيها ثم ارحيها في الرحاية اليدوية اضيفيلها الملح الفلفل الاسود ثوم بودرة طرف زبدة وحبات فرماج مثلثات او بربار خلطي مليح وهي سخونة خليها بجيه ثم اضيفي صفار بيضة وخلطي وجدي اللحم المرحي نتاعك تبليه بالملح والفلفل الاسود ولفاح وثوم وشوية فلفل احمر مرحي وشوية بصل وذبليه مليح في المقلا حتى يدخلو الطياب خذي مول اللي يدخل للفور ادهنيه مليح بالزبدة حطي اول طبقة من لابيري ( البطاطا المهروسة) ثم طبقة مليحة من اللحم المرحي اللي طيبتيه ثم طبقة اخرى من لابيري وأعدلي السطح بضهر الملعقة اللي كل مرة تغطسيه في الماء ذرذري الفرماج رابي وأدخليها الفرن حوالي 20د حتى لنصف ساعة طفي الفور نحيها وخليها ربع ساعة ومن بعد اقسميها وقدميها بالصحة على قلوبكم بنينة بزاف وراح يموتو عليها اولادك وعايلتك بيري من نوع خاص ذوقها والله رااااااائع رااااااائع والشكل جنااااااااااان غلي البطاطا نتاعك ومن بعد هرسيها بهاذ الاداة اللي نهرسو بيها البطاطا او بالفرشيطة ثم تبليها بالملح والفلفل الاسود والثوم البودرة وشوية زبدة وحبات فرماج وخلطي مليح وجدي في مقلا طماطم مرابية او مقطعة مكعبات صغار ودبشة وثوم وملح وفلفل اسود ولفاح وشوية كمون وزنجبيل وهريسة وشوية طماطم مصبرة وطيبيها في المقلا نحيها من على النار واضيفيلها جريوات ( القرعة) تكوني قطعتيها من قبل حلقات وقليتيها وايضاً زيديلها حبات مرقاز مقلي ومقطع رقيق وشوية لحم مرحي طايب ( ممكن حتى تعمليها بالدجاج الاختيار يرجع ليكي ) خلطي كلش مع بعض ثم خذي بلا مدور وستفي البطاطا وخلطة اللحم والطماطم بهاذ الطريقة ذرذري الفرماج المرحي والى الفور وامممم وامممممممم وتمتعي بألذ بيري في الفرن بيري مع ذوق الطماطم هباااااااااااال بيري الفراميج بنينة بنيييييينة بنيييييييييينة فوق ما تتصوري واكيد تجي بنينة مليانة بالفرماج قطعي بطاطا حلقات ملحيهم واقليهم من جيهة حطي حبة بطاطا تغلي وبعد ما طيب ارحيها وتبليها بالملح والفلفل الاسود والثوم بودرة والزبدة وحاولي تجريها شوية بخليط من الحليب والاكرام فراش في مول حطي طبقة من البطاطا المقلية ثم طبقة من الفرماج انا هنا استعملت عدة انواع فرماج طري فرماج احمر فرماج قريار فرماج كومونبار وفرماج رابي يبانولك بزاف لكن ماش را ياخذو منك كمية بزاف المهم خطي البطاطا بالفرماج وزيدي طبقة اخرى بطاطا ( ممكن تعملي عدة طبقات كيما تحبي المهم اخر طبقة راح تكون بطاطا ثم غطينا بلابيري اللي كنتي وجدتي من قبل ذرذري عليها الفرماج رابي مخلط مع البيض يكون مغلي من قبل ومرابي دخليها الفرن حوالي نصف ساعة جات ما نحكيلكش البلاطو قريب كلاوه ههههههههه تمنى وصفاتي البسيطة يكونو عجبوكم ويارب جربوهم وينالو رضاكم في أمان الله حبيباتي
|
||||
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc