و أخيرا عملت طهارة وليدي ..و مانسيتكمش جبتلكم التفاصيل

[أم آدم و دارين]

السلام عليكم ..
بعد عناء في التخمام و التطلاع و التهباط سهل ربي عليا و طهرت وليدي و الحمد لله فاتت خفيفة ظريفة و راح التعب و بقات الذكريات الجميلة الحاصول ما نطولش عليكم على بالي بلي راكم متشوقين تعرفو التفاصيل نبدأ على بركة الله
نبداو بالعشاء ما صورتش كلش لكن الشيء اللي قدرت نصورو شوفوه معايا بخلاف واش صورت الشيء اللي ما قدرتش نصورو هو لي بولات بالشونبينيون الشربة فريك و البربوشة مع اللحم على خاطر هاذو الأطباق لازم يتحطو سخونين و في الوقت اللي سارفيتهم غموني الضياف و ماقدرتش نصور


وهاذا التراميسو عملتو في السهرة مع التاي و الكاوكاو

و هاذي سينية الحنة و التارتة اللي عملتها لعيد ميلاد وليدي اللي جا مع طهارتو فرحو الأولاد بزاف و وليدي كان في قمة السعادة فرحاتو بزاف حفلة عيد الميلاد و خلاني صدرتو و درتلو الحنة و ما قال حتى شيء كنت خايفة بزاف لا يبدا يبكي و ما يخلينيش نصدرو و نحنيلو لكن بحسن تصرف مني و حيلة صغيرة طاوعني و هو أني خليت حفلة عيد الميلاد آخر شيء نعملو وهو يموت على حفلات عيد الميلاد و الهدايا بالخصوص السيارات كامل جابولو سيارات دخلتلو يجي 20 سيارة قريب يحل باركينغ ههههه


و هاذا واش عملت في القهوة أولا قدمت لي كانات نتاع العصير مع الميني بيتزا ثم قدمت القهوة مع المقروط و الغريبية في السنيوة و 4 موديلات في لي بوات و من بعد قدمت التاي مع القطايف و القريوش و الكاوكاو و من بعد سارفيت لي بوات نتاع الحلوى و الدراجي و أخيرا قدمت رفيس قسنطينة مع اللبن و ما نسيتش الصغار عملتلهم لي ساشي فيهم شوية حلويات مع لي بالون