مهزلة عرض السيارات 2016

[صقر 19]

اليوم رحت لمعرض السيارات حبيت نحكيلكم شوية على الأسعار والسيارات الكثيرة الطلب في السوق من قبل المواطن، مثل
سامبول الجزائرية ° معجزة القرن 22 في الجزائر °1.199.000 دج فمافوق يعني حسب لي زومبسيون والموتور
لوقان حاشاكم لاتوتوأوبسيون 1.420.000 دج موتور 1.2
سانديرو ستيبواي ° السيارة الملقبة ب كبير وجايح° 1.580.000 دج بجميع الرسوم موتور 1.6 وماشي لاتوت عمر راسك
بيكانتو °السيارة لي كبيرة على عمرها° 1.810.000 دج النوع بيكانتو سبورتيوم
كليو 4 °مزوقة من برا واش حوالك من الداخل° 1.720.000 دج وماشي لاتوت حير ولا دير جناح وطير
أكسنت ° السيارة لي ماتفناش° 1.520.000 دج زادولها لابياس + 2 إيرباق+ موتور 1.5 مي الصالون ماتغير فيه والو و لكراسي تقول راك قاعد على حجرة
السعر تاع ماشي بلعاني والنوفالا حشمت نسومها مادام لونسيا تسوى كمن هاك
الياريس° قوة وفخمة° 1.980.000 دج موتور 1.3 بوات أوتو وماشي لاتوت السيارة فن والسعر عفن
208 ° سيارة الموت ° النوع جيتي 2.620.000 دج الله يبقي الستيرة
أما السيارات الفخمة ° الماتريال لخشين والقراج لمتين° رفقا بذوي القلوب الضعيفة ماتنتحدثش عن السعر ماندي ذنوب حتى تاع واحد.
وياجماعة اسمحولي بزاف بزاف كاين واحد السيارة حشاكم عافاكم اسموها نيسان ميكرا° قابسة شمة° دارولها سومتها بلاحشمة 1.990.000 دج
كما أن هناك سيارات ماعرفتش نقرى اسمها ههههههههههه مي ياجماعة صدقوني والله غير تقول أشغال يدوية مخدومين عند سيروري تاع بريكول تابعين لسيما موتورز، قالك راح يكون شراكة بين سيماموتورز و شركة إيرانية السعر ديالها 780.000 دج فما فوق.
وفي الأخير كل هاته المهزلة في الأسعار.... لاتوجد السيارات بجميع أشكالها وانواعها و أصنافها أي غير متوفرة على مستوى جميع الوكلاء المعتمدين يعني بدراهمك وماتشريش يامواطن