اطباقي اللذيذة و الصحية **الجزء الاول **

[زينب 83]

السلام عليكم و رحمة الله و بركاته

في الموضوع راح نحاول نحط اطباق صحية و في نفس الوقت لذيذة و بريزانتابل ، ردا على طلب أخوات (خاصة اختي و صديقتي ايمان )بزاف كاين عندهم مشاكل كولون و معدة و كولسترول وزن زائد .
مع انو هاذي الاطباق للناس كامل لانها لذيذة و جميلة
يا رب تعجبكم

هاذي الاطباق أساسها مرق ابيض محضر كالتالي
بصل مفروم دجاج ، كفتة اختياري ، فطر مقطع ، حمص مشمخ ، ثوم مفروم ، كسبر مرحي ، كركم ، ثوم يابس مرحي ، نصف ملعقة موتارد و نصف ملعقة نشاء ، و ملاعق ماء
نقلي كلشي مع بعض و نمرق بالماء مانكثرش بزاف ، المرق مليح يكون شوي خاثر


اولا طبق الشوفلور الممحشي

هذا الطبق لذيذ جدا و فوقها صحي جدا
اولا نفورو الشوفلور بعد مانغسلوه في ماء الخل ، انا نحب الطهي على البخار لانه يحفظ الفيتامينات

نوجدو الحشو انا درت لحم مفروم و كل واحدة واش تحب ، تبلتو بملح ر كسبر و دبشة مقطعة و ثوم

قسمت زهرات الشوفلور على حسبت المول لي عندي و قسمت كل واحدة على اثنين و عاودت جمعتهم بالحشو
ضربت بيض مع شوي حليب و ملح وو شوي بهارات
سكبت في كل مول كمية من البيض حتى للنصف و حشيت فيها زهرة الشوفلور و دخلتهم فرن سخوووووون

بعد ماطاب البيض زتلهم الجبن المبشور و دخلت غير ذاب فقط و في الاخير لحتهم في صوووص خاثرة

و النتيجة امممممممممممممم

الصراحة هذه الطريقة سهلة و ممكن نديروها من دون حشو و لحم مفروم و راح نتفاداو الزيوت و القلي لي في طبق الشوفلور العادي

















ثانيا بطاطا مفورة بالسلق و وورود الدجاج المفروم و الله بنييييين ياسر

نجيبو حبات بطاطا نقشروهم و نغسلوهم و نفرغوهم من داخل و نحطوهم يطيبو على البخار
نغسلو السلق مليح بماء و خل و نقطعوه رقيق

نقليو بصل مقطع مع ثوم و بهارات و ملعقة زيت و شوي لحم مفروم كمية صغيرة فقط علاجال البنة كي يطيبو مليح نزيدو السلق ر نغطيوه راح تمتم يطيب

نزيدلو شوي جبن مبشور ملعقة فقط او جبن قطع و نحشيو البطاطا و نزيد فوقها شوي جبن و ندخلوها الفرن مع شوي صوص بيضاء حتى يذوب الجبن
و الجزء الثاني من الحشو نحشيو به كفتة الدجاج المتبلة بملح و بهارات و ثوم و دبشة و نطيبوها في مول السيليكون في حمام مائي كي تحتفظ بشكلها
نقدمو الطاجين مع مرقة بيضاء و خاثرة و البنة من اروع مايكون






















ثالثا دولمة سلق
هذا الطبق لذيذ و سهل و صحي و يناسب الحوامل خاصة في الأشهر الاولى لانو غني بحمض الفوليك

نغسلو اوراق السلق بماء و خل و نفوروها قيس ما تذبال فقط

نتبلو اللحم المفروم بملح و بهارات و دبشة مقطعة و ثوم و ممكن نزيدو شوي سلق مقطع

نحشيو الاوراق و نستفوها في مول خاص بالفرن و نفرغو فوقهم لاصوص البيضاء

و نغطيو الطبق بورق ألمنيوم او زبدة و ندخلوه للفرن سخون ممكن 20 دقيقة
ممكن لي تحب تزيد جبن مبشور او بيشامال او صوص الجبن ، انا حبيتو هكذا صحي اكثر













ان شاء الله هاذي الاطباق عجبكم هذا جزء اول فقط و راح تكون اطباق أخرى بإذن الله