تارت التفاح طريقة مختلفة تفضلو شوفو

[lمنال]

بسم الله الرحمن الرحيم السلام عليكم ورحمة الله وبركاته
انا من متتبعي منتدى الجلفة ومعجبة كثيرا بالوصفات اللي يحطوها الاخوات ربي يجعلها في ميزان حسناتهم المهم اليوم جربت تارت بالتفاح بطريقة مختلفة عن العادة شفتها في واحد السيت فرنسي وعجبتني خاصة انه فيه القرفة وانا من محبي القرفة في الحلويات حاولت اني انصورلكم المراحل زعما كيفكم ههههههه الان انخليكم مع المقادير و الصور

المكونات / ل8 أشخاص:

بات بريزي
4 التفاح
120 غرام من السكر
35 غ نشا الذرة
3 صفار البيض
250 مل من الحليب
2 ملاعق قهوة من القرفة

للتزيين من فوق;

60 غرام لوز ايفيلي
20 غرام من الزبدة
2 ملاعق طعام من السكر

انا لا بات انتاعي درت فيها
300 غ فرينة
150غ زبدة تكون مثل البوماد اي كالمرهم هشة
ثلاث ملاعق كبار سكر
قرصة ملح
ماء او حليب تلمي بيه العجينة شويا برك
لميها و خليها ترتاح من بعد قرصيها في المول انتاعك تاع لاتارت و اثقبيها بالشوكة لكي لا تنتفخ اثناء الطهي



نرجعو للطريقة

اخلطي صفار البيض مع السكر و النشاء و القرفة و الحليب و خليه في جهة
قشري التفاح وقصيه شرائح رقيقة ووزعيه فوق العجينة انتاعك ثم صيي فوقو هاداك الخليط السائل و ضعيه في الفرن حتى يحمار يقعد ما بين 30 -35 د و كل واحد و الفرن انتاعها






الان بعد ما تنضج التارت انتاعنا ناخذ الزبدة 20 غ نذوبهم في مقلاة ثم نضيف السكر فوقهم و اللوز ايفيلي على نار قاوية و ننحرك حتى يصبح لونو اكاجو ونوزعها على التارت مباشرة و نخليها تبرد





ان شاء الله تنال اعجابكم وتجربوها بالصحة و الراحة