الوصفة السحرية للبيتزا خفيفة وبنينة

[أم محمد علي]

سلام عليكم ورحمة الله وبركاته
كيف أحوالكم خياتي إن شاء الله تكونوا بخير وعافية
هذه بيتزا جربتها عندي يومين وعجبتهم بزاف قلت نفيدكم بيها

بسم الله
2 كيسان ماء +2 كيسان فرينة + الملح +ملعقة كبيرة سكر +ملعقة كبيرة خميرة الخبز خلطي الكل تتحصلي على عجنة كيما اللبغرير غطيها وخليها تخمر 20 د في الصيف تخمر بسرعة عكس الشتاء يلزم ساعة ,
بعد مرور 20د أضيفي 3 ملاعق لحظة +نصف كأس زيت وأضيفي الفرينة حتى تصبح طرية بزاف والعجنة تشبه خبز الفرينة ولكن دخلي الزيت مليح في العجنة وشكليها كويرات صغيرة على حساب الصينية تاعك وخليها تخمر من جديد

بالنسبة للصلصة حقيقة بنينة ومميزة :حبة بصل (أقسميها على 4 )+كيلوا طماطم(أقسمي كل حبة على 2 ) +جبة جزر(قسميها قطع صغيرة ) +نصف حبة فلفل حلوا حمراء +2سنينات ثوم +ملح +م ص عكري +م ص حار مرحية أو الهريسة + الرند (ورق الغار )قسميه على 2 والفائدة يطلق بنتوا +رشة زعتر ( يعطي ذوق مميز في الصلصة الحمراء )+زعيترة فتتيها ما بين يديك حتى تعطي ذوق +الزيت وطيبيها على نار قليلة بدون إضافة الماء لأن البصل والطماطم يطلق الماء وعند نضجها أرحيها تتحصلي على صلصةخفيفة و بنينة وماشي قارصة بدون إضافة السكر لأن الجزر حلو .

ملاحظة :الفلفل الأسود لا يوضع في الصلصة الحمراء لأنه يغير طعم الصلصة كليا .

تكون خمرت العجنة والصلصة طابت :حلي العجنة بالحلال ولكن استعملي الزيت باه تقدري تتحكمي فيها ولا تستعملي الفرينة وشكليها على شكل دائرة مثلا وضعي فوقها الصلصة الزيتون الفلفل حلوا أحمر وأخضر الطن جبن موزاريلا ......إلخ (حسب الرغبة ) وطيبيها في الفرن من التحت ثم الفوق
وشهية طيبة حقيقة بنينة وخفيفة بزاف