هو المكتوب بكل بساطة ، المكتوب ما لحقش ؟
كي يجي مكتوبك تديه و أنت تبكي و تضحك ، أنا رفضت بزاف حتى قالولي راكي تتكبري و راكي تحوسي على الزين وووو و قالولي درك طيحي على راسك و تدي عرة الرجال و يخلصك ربي وووو عندي ما سمعت لكن أنا ما تمسخرت بحتى واحد من حقي نقرر مع من نعيش لي يجي يخطبني نشوف و نقرر إيه أو لالا ؟
الأول بعد ما كملت دراستي قاتلي اختي صاحب راجلها أنا رفضت بسبب يكبرني قريب ب 20 سنة و أنا كنت حابة نخدم نرفد روحي شويا علاجال كنا ماديا شويا الحمد لله.
الثاني جارتنا قاتلي على واحد فاميلتها يخدم في الصحراء أنا رفضت علجال ضروفو ما تساعدنيش يخدم شهرين و يجي 20 يوم و نسكن مع أهلو عندهم ديور عرب و عندو واحد 7 خاوتو و أخت وحدة متزوجة و مطلقة و عندها طفل قلتلهم لوكان نحبس الخدمة و نروح معاه للصحراء ممكن لكن نقعد أنا هنا و هو لهيه هذي ماشي معيشة حسبتها في العام كامل يكون شهرين برك في الدار ؟؟؟ قلتلها ليما أنا ما نقدرش لهاذ المعيشة ؟؟؟
الثالث وحدة في الطريق سقساتني و قاتلي اعطيني الرقم تاعك رانا نحوسو نخطبو لخويا هو بوليسي و كيما كان الحال جاو للدار و هذا ما قدرتش نقول ايه لأنو هذاك الشخص ما عجبتنيش الخزرة تاعو مام الهدرة تاعو كاش بحر ؟ و إذا عندك خوك أخينا وووو يعني ما حملتوش 5 دقائق ما قدرتش حسيتهم 5 سوايع طلعت عمري كي قلت لالا ما حبوش في الدار قالولي سقسينا عليه وليد فاميليا و كامل شروطك قبلهم واش راكي تحوسي ؟؟؟ أنا قلتلهم ما تقبلتش مليكاتو ما علاباليش كيفاش نفهمكم بصح ما نقدرش نقول إيه ؟؟؟ هاذي ماشي لبسة أو ماكلة ممكن نحتمها باش نرضيكم ؟
في الأخير ديت راجلي شكلو عادي ماشي جميل و خدمتو عادية و دراهمو عاديين ، لكن في نظري الأجمل نوض الصباح نقول الحمد لله نرقد العشيا نقول الحمد لله راجلي انسان طيب و متفهم و متواضع و الناس كامل يحبوه الحمد لله
للآن ما علاباليش علاش قلت إيه بالاك كي شفتو حشم و هبط عينيه نهار جا يشوفني والله نموت عليه و ما نتصورش حياتي بلا بيه ما تزوجتش عن قصة حب أو ما شابه بصح نحس بلي نعرفو من بكري كي تخطبت قلتلهم دركا راني فرحانة و راني حابة نجهز و نوجد لحياتي الجديدة.... الحمد لله يا ربي.