قريوش سوريا.. قمّة القرمشة و اللذة

[lila z]

السلام عليكم و رحمة الله تعالى و بركاته
صح عيدكم .. كلّ عام و أنتم إلى اللهِ أقرب أسأل الله أن يعيده علينا بالخير و اليمن و البركات
من بين حلويات العيد .. قريوش سوريا وصفة رائعة شكلاً و ذوقًا

المقادير: - أنا في الصور عملت نصف المقادير-
* 1 كغ فرينة
* 2 م ك سكر عادي
* 2 خمارة
* 15 م ك مرغرين فلوريال ذايبة و باااااااردة
* قشور حبة ليمون
* 2 حبات بيض
* 1 م ص فاني
* كأس حليب

للتزيين:

* عسيلة

* بيستاش


طريقة التحضير:
* في جفنة ديري الفرينة+2 م ك سكر و خلطي ثم نضيف الخمارة و نخلط
* نضيف المرغرين ذايبة و باردة لازم تكون باردة ، نخلط .. بصح ماشي نبسس نخلط فقط، ثم نجيب السيار و نغربلها راح يدخل هكا ليدام كامل ف الفرينة، نخلطهم و ندير حفر ف الوسط
* ندير ف الوسط قشور ليمون+البيض+لافاني+كأس حليب و نخلطهم داخل الحفرة لازم تخلطي مليح البيض بالحليب
* نخلط مليح و نبقى نضيف الحليب و نعجن و نقطع العجين قيسما تتلم ، ما تجيش طرية شوية يابسة
* نحطها في ساشي ترتاح حوالي 10 دقائق
* كي نجي نخدم نجبد غير بشوية .. و الباقي يبقى ف الساشي ماشي ييبسلنا
* الآن المهم تبعو معايا مليح و الصّور إن شاء الله توضح
* نجبدو شوية من العجين.. نحلو شوية باليد و نديرو في الماشينة رقم 1 أو العريض عندك كل واحدة و الماشينة ديالها
* نحل ف الرقم 1 ثم نطبقها كالمحفظة على 3 و ندير بالر قم 1 حتى تولي ملساء ، خاطر من الاول مراهيش ملساء راهي خريطة هههه
* ثم ندير المايزينة من الجهتين ثم نزيد نحل ف الرقم 3
* ثم نزيد نحل ف الرقم 5 ثم الرقم 6 ثم ف الرقم 8 أي قبل الأخير
* هنا نرش المايزينة من الجهتين
* الآن نبدا نرولي العجينة ديالي حتى الاخير نقطع الزائد .. ندير ف الحافة بياض البيض بصح ماشي بزاف قليييييييل
* الآن نجو للمفيد نقطع الجانب بصح و كأنك تدبحي ماشي دايركت نتمنى راكم فهمتو هاد المرحلة
* ثم نقطع مقروطات
* الآن بالحلال نحل من الجهة الفوقانية يخرجلك التوريق و نفس الشي من الجهة الأخرى و زيدي حليها مليح
* سخني الزيت على نااااااااااااااار قليلة و طيبيه يطيب في غرضو ، و طبعا بالمغرف بش يزيد يتورق مليييييييح
* من الزيت مباشرة للعسيلة ثم للشبك و زينيه بالبيستاش المرحي و تمتعي بأروع قريوش سوري على الإطلااااااااااق

تفضلن الصّور

برجاء دعوة لوالدي بالرحمة