خرجلك الدلاع أو البطيخ ما فيه حتى بــنـة ... أمنية عندها الحل

[أمنية غفران]

السلام عليكم أخواتي و رمضان كريم

اليوم فقت على الزغاريد الله الله ما أحلاهم ربي يدوم الأفراح لكافة العائلات

نحب نقدم تبريكاتي لكل الأمهات بمناسبة نجاح وليداتهم في شهادة التعليم المتوسط

ألف مبروك و العاقبة لشهادة الباكالوريا

ألف مبروك لأبنائنا للناجحين في شهادة التعليم المتوسط


.................................................. ..........................

كثيرا ما تصادفنا دلاعة او بطيخة الشكل ما شاء الله
بصح صامطة و العائلة ما تحبش تاكله و انتي تبقاي محتارة كيفاه
و الزوج يجيب هاداك الموال خسارة الدراهم و كله حسرة تقول غرقوله السفن و لا تقول خسر في التجارة ههههه

الفكرة انه تديريه عصير طبيعي منعش اممم

بعد ما تنقي الدلاع من عليفاته و مادابيك خلي وليداتك يساعدوك ولا احد افراد العائلة علاخاطرش راهو ممل باش تنحيه هههههه
انا هنايا استعملت الدلاع و البطيخ خرجو صامطين بزاف بزاف و يومين كل ما نفتح الثلاجة نلقاهم غاضوني حتى واحد ما دار بيهم
جربت بكمية قليلة باش نشوف ردة الفعل نتاع العائلة و خرج هايل ياودي روعة

ميكسيتهم و من بعد ضفت باطة ياورت الي كان عندي مخلط مع ثلاث ملاعق كبيرة سكر و خلطتهم مليح و الى الثلاجة

على فكرة ما ضفتش الماء اطلاقا هاداك كله من الدلاع و هاكة أحسن يجي خاثر اممممممم


قدميه بالصحة و الراحة و العافية

تفضلو الصور











هادا الكأس لكل أم سهرت و تعبت باش ينجحو ليها وليداتها ربي يحفظها و يهنيها



السلام عليكم و صحا فطوركم و رمضان كريم