أمك هي السبب في طلاقك

[سيرين 5]

المشاركة الأصلية كتبت بواسطة rahma nour

اخت سيرين5 ربي يكون في عونك باين عليك ناس ملاح من هدرتك و باين راكي تسوفري مي ما قلتيناش راي راجلك في كل هذا الحالة الي راكي فيها

راجلي غاضني علاجال راه ضاع بيناتنا كي قلتلو يماك حاوزتني مدتلي المحاجب و قاتلي هاكي و بالسلامة ؟ قالي واش ندير دوك نهبط يحكولي فيرسيون وحدوخرا ؟ قلتلو ما حكيتلكش باش تهبط تقولهم أنا وكلت عليهم ربي سبحانو . باش برك كي تقولك يماك ما رانيش نهبط لعندها تكون علابالك علاه ما رانيش نهبط ؟
و كنت نحكيلو كلش مام هو كي يجي يلقاني ماشي مليحة يسقسينس يقولي واش بيك أحكيلي كي ما تحكيليش ليا لمن تحكي ؟ كان يدافع عليا بصح مع الوقت عادو يشدوه و يعمرولو راسو و يقولولو هي لي تزعف من كل حاجة و موسوسة وووو ... وبالاك حاجات وحدوخرين ما علاباليش بيهم
وليت ما نحكيلوش غير كي تكون حاجة كبيرة و ماشي باش يهبط يحاسبهم ولا يجيبلي حقي اصلا هو كره و عاد غير يقولي أصبري أصبري أصبري ... مالا راني صابرة علاجال شفت بلي كي راجلي ياخذ موقف كي يحقروني و ما يحبش عليا يماه تلعبها مريضة و ما تحبش تهدر معاه هو يولي مقلق و حزين (علاجال راجلي ضحايكي يبقى غير يقصر و يضحك و كي يزعف يتكمش و يبقى ساكت والله يغيضني) نطيب كاش حاجة و نهبطهالها غير باش ترضى عليه و ما يحزنش ما وليتش نحكيلو غير للضرورة أو بالأحرا وليت نتصرف مثلا من قبل صرالي مشكل معاهم علاجال قلتلو بلي راهم يطلعو في غيابنا و يقلبو نلقى الآثار و لقيت حاجات ناقصين و حاجات ماشي في بلاصتهم ... هو هبط قالهم نكرو و دارتلي حالة يماه كيفاش لي اتهمتهم بحاجة كيما هاذي؟؟؟ أنا راني متأكدة بلي راهم يطلعو و ما اتهمت حتى واحد و عندي الأدلة بصح أنا ما كنتش حابة و نواجههم غير راجلي لي راح يهدر و وصيتو ما تهدرش ديرلي مشكل معاهم ؟ بصح هو هدر و طلعت أنا الغالطة مدة قصيرة بعدها ما مسو حتى حاجة بصح لي فيه طبيعة ما ينطبع ؟ عاودو ولاو يقلبو ، يرفدو، يمسو الحاجة لي خاطيهم رفدت كل حاجة تحت البوطاجي فرينة ، سميد ، سكر .... و درتلهم بلاصة في البلاكات تاع الفراش في الكولوار و زدت بعد الضربة تاع المعجون لي خدمتو هذاك النهار بالجمعة غسلت الفريجيدار و سيقت الكوزينة و طيبت الفطور و طيبت المعجون تاع الفريزة و مور الجمعة خرجنا أنا وراجلي و كي ولينا العشيا لقيت الأرض تتلاسق حليت الفريجيدار لقيت الباب معمرة معجون و زوج بلارات ناقصين و الثالثة ماشي هي مبدلة ؟؟؟ زعفت زعفت زعفت باسكو ظهري تقسم في الشغل و حتى واحد ما يعاوني و نزيد نلقى الدنا تتلاسق و واحد ما قالي كاش حاجة كي شغل أنا بهلولة ما نعرفش البلارات لي فرغت فيها المعجون ؟؟؟؟ قلتلو لراجلي أرواح تشوف بعينك ياك شفتني سيقت و غسلت الفريجيدار قبل ما نخرج علاش يدناو لحاجة لي خاطيتهم ؟؟؟ هو تبهدل في بلاصتهم والله العظيم ؟؟؟ قلتلو ما تروحش تقولهم يا رحم باباك خليني أنا ندبر راسي ؟؟؟ من داك الغدوا خرجت الصباح و كي عاودت دخلت عندهم للكوزينة لقيتهم حاطين المعجون يستقهواو بيه ؟؟؟ حشمت نهدر أقسم بالله غير حشمت نهدر ؟؟؟ سنيتهم هوما يهدرو ما هدروشجابت هدرة على الحاجات لي ما تلقوش في الدار انسرقو يعني ؟؟؟ ضحكت و قلتلها الدار هاذي راهي تبلع ؟؟؟ خزرت في بنتها على الهدرة تاعي ما عجبتهمش ؟ من بعد و حتى خلاصت الهدرة باش قالتلي العجوزة البارح الدراري طلعو سرقولك شوية معجون تاع الفريزة ؟؟؟ قلتلها ما صبروش حتى نبعتلهم ؟؟؟ الخدمة هاذيك ماشي تاع دراري صغار خدمة تاع دراري كبار ؟ كي سقساني راجلي اذا هدرتلهم قلتلو ما قدرتش نسقسي ؟ المهم جيبلي زوج كيلو فريزة ، خدمت ليا كيلو وحداخر و خدمت للعجوزة كيلو ليها و للدراري سواء صغار أو كبار ؟؟؟ و من هذاك النهار وليت نغلق الثلاجة بالمفتاح. و ان شاء الله ما نطولش و ندير باب في الكوزينة و نبدل مفتاح بيتي ان شاء الله. قررت ما نزيدش نهدر كل ما تصرالي حاجة نتصرف ؟
البارح برك كنت طالعة لداري لقيت لوستي هابطة من الطابق تاعي مستها بالخير خزرت في الكوزينة لقيت السناسل لي الباب يتحركو يعني خرجت منها ؟ واش كانت دير تما ؟؟؟ كانت تحوس كاش حاجة تاكلها ؟ ولا توقب واش كاين في الزبل مثلا ؟ واش شرينا و ما شريناش ؟ نقيت داري ولا لالا ؟؟؟ والله لوكان كانت ماشي متزوجة نعذرها ؟؟؟ متزوجة و عندها طفل و طفلة و عايشة عند يماها و راجلها يجي كل يوم ؟؟؟ ياك عندها حياتها الخاصة علاه لاتية بيا ؟؟؟؟ لحقت راحت لراجلي قاتلو قول لمرتك تسيق الأرض مغبرة ؟؟؟ و راجلي ما قاليش ؟؟؟ والله و قالي غير نوريلها و نحطها عند حدها لا عمباتلها حشمت منهم ما هدرتش عباتلهم يعفسوني ؟؟؟ بصح تزيد تجيب هدرة فهاد السياق نسمعهوملها أقسم بالله غير نحطهوملها ؟؟؟ أنا الحمد لله نعرف روحي واش نسوا إذا كنت معفونة ولا نقية ؟ حكمت عليا و أنا أونسانت قريب أجهضت حتى ضربت البروجيستيرون و عطاتني الطبيبة مالادي غير كملتهم زدت طحت مريضة بالحمى من المرض ما خرجتش من لي رفد و أنا طايحة فراش كل شهر على الأقل نروح للطبيبة مرتين ؟ و ما طلبت مساعدة من حتى وحدة فيهم دبرت راسي وحدي طيبت و أنا نتوحم و خدمت شغلي و يما كل ما نروح لدارنا تعمري الماكلة بالزيادة تقولي باش طيبيش ريحي، مرة جات العجوزة و قاتلي كون حبيت فيك ما نخليكش تجيبي لوليدي ماكلة من داركم دبري راسك كيفاه ديريهالو هنا ؟؟؟ و هي نسابها داخلين خارجين وخلي حق فلان و حق فلتان و هوما والله والله والله ما يمدو غير نشم برك و كل يوم نعرف واش طيبو من ريحة الماكلة شميت ريحة الحوت، شميت ريحة الكبدة، شميت ريحة الخفاف ... والله ما طاحتلي غير الخفاف بعت راجلي الصباح هبط جابنا زوج حبات و كي كنا رايحين للخدمة قلتلها يعطيك الصحة الخفاف جا على قلبي بعد مدة تمننت عليا قاتلي حبيتي الخفاف درنالك الخفاف ؟؟؟؟ والله راسك يحبس معاهم ؟؟؟ كيما تجيهم يجيوك ؟؟؟ عييت ما رحمونيش كي نتوحم و ما رحمونيش كي قريب أجهضت و ما رحمونيش كي راني بلاطونسيون و راهي هددتني قاتلي راكي تولدي و تقعدي وحدك ؟؟؟ علابيها لقيتيني نخمم نروح لدارنا نهار نزيد بربي ان شاء الله . نخاف نبقة وحدي تما يمرضوني في نفاسي تاني . هو وليدهم بصح أنا نطلع للسما نهبط للأرض نبقى بنت الناس لازم تطلع ترخسني تهبط ترخسني و ما لازمش نزعف لازم نضحك ؟؟؟
قد ما نحكي واش دارولي و مازالو يديرولي قليل نوكل عليهم ربي حسبي الله و نعم الوكيل ما خلاونيش نستغل بنتي تكبر في كرشي زعفوني بكاوني مرضوني عيشوني في التقلاق ربي وكيلهم لحقت العجوزة من شهري الأول هددتني بالطلاق علاجال زعفت من كلام قالتهولي رخستني بيه هكذاك و رحت أنا نطلب السماح منها قاتلي أنا وليدي نقولو موت يموت في الشوكة غير أنا ما نحبش الخسارة ؟؟؟ حسبي الله و نعم الوكيل، صدقوني مانيش نقدر نسامحا على تهديداتها هاذو عاودتها شحال من خطرة ، والله ماني قادرة ننساهم ولا نسامحها عليهم ؟؟؟ ما وليتش نحب نشوفها. المرأة كي تروح تزيد ما علابالهاش إذا راح تعيش ولا تموت بصح راني نخمم ندعي عليهم كي نكون راح نزيد حتى و إذا كان آخر كلامي حسبي الله و نعم الوكيل.