فطاير اختي روعة

[هيام الريحان]

سلام ليوم جبتلكم فطاير اختي اول مرة تخدمهم وعجبوني بزاف جاو كيما تاع برا
المقادير
500 غ فرينة (استخدمت لابال)+ ملعقة كبيرة خميرة فورية +ملح "عينك ميزانك" + ملعقة كبيرة سكر +حوالي كاسين ماء دافئ
الطريقة
اخلطي كل المقادير واضيفي الماء بالشوي تتحصلي على عجينة جارية لازم مش ناشفا اعجنيها بالخبط هزي واخبطي في القصعة ومبعد غطيه بورق الفيلم وخليه يخمر في مكان دافئ لمدة ساعة كي تشوفيه خمر ديريه كويرات وحطيه في بلاطو مدهون بالزيت وخليه يزيد يخمر كي تعودي رايحة تقليه
حطي زوج مقالي الاولى فيها حوالي خمس 5 ملاعق زيت والثانية حطي الزيت (كيما تعودي رايحة تقلي البطاطا)
هزي الكويرة وديريلها قعرة ( ثقبة) في النص وحطيها في المقلاة الاولى لازم تكون سخونة كي تشوفيها طلعت هزيها لازم من نفس الجهة يلي حطيتيها عليها في القلاة الاولى تحطيها عليها في المقلاة الثانية واقليه محمر
هاذي المقادير ديرلك 8 حبات برك
راهو يجي بنين وخفيف ومش معجن جربوه وماتندموش عليه ان شاء الله





في امان الله نستنى ردودكم وتقيييمكم سلام