معاناة تلاميذ البكالوريا

[sara fifi]

السلام عليكم
موضوع هذا خارج عن الدراسة مي نحكيو وش كان في قلوبنا على قرايا و وش رانا نعانيو
في الليسي تاعنا رانا نعانيو بزاف خاصة من الاستاذة مراهم يشرحوا والو كارثة رحنا فيها صح صح
تاع العلوم منين تدخل وهي غير اكتبوا اكتبوا والله تبان حصة املاء و متشرحش تقرالنا من الكتاب و كي نسقسيوها تروح تقرا وتحوس باه تجاوبنا وساعات حنا لي نجاوبوها ونعطيوها الحل وساعات نصحولها المشكل ماشي جديدة راهي قديمة و متعرفش تقري وقولنالها رانا نكتبوا بزاف ومنفهموش مداتهاش فينا كامل رانا معولين على الدروس الخصوصية مي لوكتاه ؟؟؟؟
تاع الرياضيات منين يدخل وهو انا و انا وانا كي كنت قدكم كنت ندير و ندير و هو مايشرح والوا والله سعات يحلنا تمرين غالط مبعد غدوة هاديك يجي يقولنا صحوا ومرة عطانا تمرين راح حلو مع استاذ واحد اخر وجاء حلوا معانا وهو تاني قديم شوي
تاع الاجتماعيات حتى هيا منين ندخلوا وحنا نكتبوا وتخلينا نحكيو حنا مع نبداو نحكيو هيا تقولنا منشرحش نتوما لي بغيتوا ديروا الفوضى وهي كل يوم تعاودلنا نفس القالب و اكتبوا وحدكم المصطلحات حوسوا عليهم نتوما و الشخصيات
تاع العربية حدث ولا حرج قاتلهم ارقدوا جابوها جديدة تخيلوا واش قاتلنا عرفوا الاعراب في حياتي كامل جامي سمعت هذا السؤال
و الباقي منقولش ملاح نقول صافا ملاح يقريو تاع 1 مي ماهمش استاذة لي يقريو جماعة الباك
والليسي بصفة عامة ميتحملش نقراو فيه فوق قلب تاع محتمة هذا مكان لامراقبين يصلحوا لا معلمين والووووووووووووووووووو
ومنحكيلكمش على البرنامج راهو معمر بزاف ديما 8-5 مكانش خلاص ساعة فراغ و برنامج يعيف ويعيي
واش راح نقول غير ربي يكون معانا وينجحنا كامل علابالي كامل راكم تعانيو من الاساتذة
سمحولي طولت عليكم انشاء الله كامل تشاركوا بمعناتكم