كروكي الهام 07
6 بيضات
2 كيسان سكر أحرش ( كاس متوسط )
2 كيسان متوسطين زيت ماشي معمرين مليح
3 خميرة
فاني أو زاست أنا أفضل الزاست ونكثر منو سواء كان نتاع ليمون أو برتقال أو مندرين اللي عندك
فرينة
طبعا تضربي البيض مليح مع السكر حتى يذوب ويطلع مليح والباقي باين
المهم العفسة أنك تخليه جاري شوية وغطيه وخليه يريحرايح العجين يتشرب ويتماسك المهم لازم تكون عجينة طرييييية وجارية شوية وتلصق في اليد
الباقي باين في الطياب نتاعو
المهم كي تحبيه طري ماشي مقرمش بمجرد ماتخرجي الصينية من الفرن وهو سخون قطعيه ومباشرة حطيه في علبة وأغلقي عليه
اما كي تحبيه مقرمش خليه يبرد مليح في كسكاس وخبيه
شوفي أهم حاجةالعجينة خليها طرية وجارية رايح يجيك خفيف كي الريشة أنا ديما يسألوني على الوصفة مع أنها عادية فقط
وكثري الزاست جيك ريحتو تهبل
حقة نسيت نقولك كي تدهني بالبيض وترشي سكر ماتكثريش باش مايشققش انا نزيد نرش جلجلان ثاني
وكاين اللي يدهن بالبيض فقط ومن بعد يدهن بمعجون ويرش كاوكاو محمص أنت حرة في التزيين
هذي هي الوصفة الأساسية والباقي أنت حرة والله يجي خفيف كي الريشة