ملخص حول المدرسة التطبيقية للهندسة بجاية

[saidi_billel]

السلام عليكم
اليوم سوف اقترح عليكم بعض المعلومات التي جمعتها حول المدرسة التطبيقية للهندسة ببجاية والتي يجمع اغلب انها من احسن المدراس في الجزائر و معروفة ببجاية الجال و مرايا

المدرسة ببصراحة نظيفة ومصنفة من بين الاوائل على مستوى الجزائر مقابلها البحر والمطار وتقع في تيشي
كل صباح راح تصبحوا على البحر. اما المطار كل ما تكونوا رايحين الى المطعم راح تستمتعو بمناظر الطائرات
هكذا تنحيو شوي على بالكم

عند الدخول

تلقاو جماعة قاعدين باه يمركيو عدد الدخول وتعبيو استمارة خاصة بيكم فيها اسمك ولقبك واسم الوالدة والوالد وتاريخ الازدياد ...الخ وفيها رقمك
ومن بعد يديوكم وين تباتوا يقولك اطلع الفوق كشما تلقا بلاصة كي تطلع تشوكا تلقا الناس راقدة في الكيروار ومتصيبش وين تحط رجلك. فما تقول في نفسك واش جابني هنا
أما اذا كنت من الاوائل فسوف تحصل على سريرداخل غرفة فيها 8 او 9 اسرة تبقى فيها حتان يجيو الجماعة لي لبسوا وقبلوهم باش تنوض وتحول الى النوم في الارض

الطبيب

من بعدها تسنى دالتك باش تروح الى الطبيب وتكون دالتك بحسب الغاشي وتتراوح من يوم الى 4 ايام
ديروا في بالكم بلي الطبيب لايرحم اطلاقا
وراهو قبائلي من بجاية ونسيب الجنرال بن شادي لي حاكم بجاية

**** نحكيلكم قصة صرات في الدفعة تاع مارس 2014 . كاين واحد مداير باراسيون وقبلوا هذا الطبيب وكي بدا يتدرب تحلوا الجرح نتاعوا ودخلوا الهواء وقعد يطايش حتان قريب يموت باش داوه للسبيطار وبعد مدة توفي الله يرحموا. وكي جاو ماليه قالولهم بنكم كان عندوا سرطان حسبي الله ونعم الوكيل*****

وبعد مايقبلك الطبيب يعيطولكم في الساحة ومبعد يزيد يوقع فيها تغربيل من قبل القيادة لي حاكمكم (هذ السنا كابيتان) لكان راك قصير اوقف مع الطوال كشما ينوب ربي ولكان راك مريض ولا ماتشوفش وقبلك الطبيي ريكلامي بزاف بلاك مايقبلوكش

واللي يخيروهم ديركت للحلاق . فما الناس كلهم المورال طايح
تضربوا فيها بولا 1 وتكتبوا اساميكم باش من بعد 3 اشهر يعطيوكم 50.000 ههههههه

الاكل
فيما يخص الاكل
***الفطور راح يكون على الساعة 5.30
يعني النهوض يكون حوالي 5.00
الفطور تفطرو خبز + معجون وساعات زبدة
*** الغداء كل مرة كيفاه مرة على 12.00 ومرة على 13.30 ومرة على 14.00....المهم عيينا نفهمو الوقت الصحيح للغداء
كي يوصل الغداء ما تراطي والو المهم الحالة شبه مليحة في الغداء وساعات الدجاج المحمر وساعات البقري مع الكسكسي....الخ
***العشاء ماذابيك ما تعولش بزاف اكيد الكل يسمع ب السانك ساك
والعشاء يكون في حوالي
18.30

الهاتف
كي تدخلوا ينحيولكم الهاتف. مالا ادي معاك 2 واحد مدو والآخر خبيه في جسمك

التدريب

التدريب ليس بالشاق يعني عادي

الفائض في دفعة مارس 2014 كله مؤهل لايجند. واحتمال كبير يطبقوها في سبتمبر

معلومات اخرى

واش باغي نقولك اخي هادي تاع كيفاش يخرجو و شعال هل الاولين ولا الاخرين ماشي ثابتة لاني انا في وقتنا قالولي بلي يطلقو الاخرين و درت شوية روطار كي ركبت و دخلت طلقوا الي جاو الاوائل و طلقو لاننا كنا بزاف
يعني خلاصة القول مانقدرش نفصلك في هاد القضية لانها كل مرة وكيفاش لكن انت توكل على ربي و ان شاء الله ربي يوفقك
اما بخصوص المدرسة فهي من بين احسن المدارس على مستوى الوطن من حيت النظافة و حسن المعاملة و ظروف المعيشة الغرف 6-8 افراد في الغرفة الماء متوفر طول اليوم
تقع في مدينة تيشي و قريبة من ولاية بجاية ب 11 كلم و النقل متوفر طول اليوم وتقع امامها جامعة و المطار و منظر الميناء وجبال يماقورايا بالمقابل يعني شوية تفاجي عليك هديك المناظر كي تكون الداخل و يعني انت عادي تفوتها في مرحلة الصيفتروح تبحر شويةفي تيشي و تحوس فها ان شاء الله
اما من حيث كيفاش رايح تفوتها
نحكيلك عليها بالمراحل اخي العزيز
ا لمرحلة الولى...مرحلة التكوين (المدة 6 اشهر)

- عند الالتحاق بالمدرسة يخليوكم بالسيفيل و فيها تكون مرحلة الانتقاء و الفحص الطبي(ملاحظة هنايا الطبيب يعرف يفوت برك الا الحالات الباينة زائد اصحاب العرف) ممبعد يلبسوكم الكومبا و تدخلو في مرحلة تدريب شاق تتعلمو فيه مختلف الحركات العسكرية(الاستعداد -الاستراحة-التحية-المراوحة-السير العادي...زائد تتخللها بعض العقوبات.....هههه كيباداشي و وضعية البطة و الزحف و ....صدقني مالقري هد المرحلة صعيبة بزاف الا انها فيها دكريات جد رائعة ما تتنساش) و تدوم هده المرحلة مدة شهرين تقريبا 45 يوم بالطبع
-المرحلة الثانية تبداو فالدراسة في الاقسام على مختلف العلوم العسكرية(الاسلحة -القتال-تعليم الرمي-و مواد التخصص حسب المدرسة اللي راك فيها)و تتخللها حصص رمي بالاسلحة سيمينوف-كلاشينكوف-اف ام-البيا........ممبعد تديرو حفل التخرج و تولي ضابط في الجيش
ملاحظة بالطبع كي تكو ن عاد طالب في هد المرحلة تخدم كلشي الكورفي و القاريتا و جميع الخدمات منها نزع الحشيش بيدك و تنظيف محيط المدرسة و....مانحكيلكش خير ههههههههه)wc
الدفعة تاع مارس تسوفري شوية لانه تتدربو في فترة تاع سخانة و بالنسبة للكرفي تاع الحشيش حدث و لا حج و تكترو من "لورد سيري "لانه ديرو حفل تخرج في الاخير "la parade"
مالقري هد المرحلة صعيبة و فيها ضغط بزاف الا انها حلوة و فيهادكريات روعة صدقني

المرحلة التانية مرحلة الخدمة

وممبع فيها الميتاسيون هنا يوزعوكم على الوحدات و هنا انت و زهرك الا رسلوك للبلاسة شابة راك تفوتها بقدرك و الا بعتوك للمناطق الصحراوية النائية (تندوف-اليزي-ادرار-تمنراست.و لا بلايس تاع مكافحة الارهاب فالجبال راك تسوفري حبيبي.....و في الاخير هي مرحلة وتفوت مالغري السوفرونس تاعها تتعلم فيها امور و تتعرف فيها على ناس وتكتشف عقليات لمختلف مناطق بلادك و تتعرف على بعض الولايات اللي بعيدة عليك و صراحة تعاونك باش تكون شخصيتك المستقبلية لتحمل المسؤولية...
و في الاخير نصيحة ليك خويا العزيز الا عندك شي حل باش تديها يعني كفالة و لا سبب طبي ولا اي حل سواء كان بالطرق الشرعية اوالا شرعية غير اكتيفي على روحك و ادا ضاقت بيك الحلول اكتيفي و اتكل على الله و فوتها و قلعها من طريقك مادامك صغير