السلام عليكم و رحمة الله تعالى و بركاته
كيما وعدتكم جبتلكم اليوم الوصفة الجديدة تاع طمينة اللوز ، على بالكم بلي الوصفة التقليدية تأخذ الكثير من الوقت و الجهد ، وهذا الوصفة تعلمتها و جربتها راهي عندها نفس الذوق و كذلك راهي زاكية بلا ما نطول عليكم ، المقادير:
1kg لوز بيض مرحي رقيق + 1kg سكر رطب مغربل + 130g زبدة ستار + شوية فاني تاع الميزان + نصف كأس ماء ورد(لازم يكون مقطر ماشي صناعي)و نلمها بشوية حليب (أقل من نصف كأس) و طبعا عينك ميزانك.
نحط كلش في طاوة تكون ثقيلة و نحطها على النار و نخلط بمغرفة تاع العود على نار هادئة.
كي تتكور على الملعقة خلاص راه واجدة ( 5 دقائق تقريبا) ، نحطها مباشرة في كيس بلاستيكي وندخلها في بعضاها و نخليها حتى تبرد باه نشكلها.
بالنسبة للتشكيل ممكن ندير الشكل التقليدي و ممكن نلونها و نستعمل مول السيليكون أو أشكال أخرى منبعد رايحة نديرلكم موضوع على مختلف الأشكال الي نلقاوها في الأعراس ( خصوصا الأعراس القسنطينية)
شكرا لكن على الصبر الجميل و نوعدكم بلي كل مايكون عندي وقت رايحة نحطلكم وصفات لذيذة و مجربة باه تستفادوا كيما أنا استفدت من هذا المنتدى.
سلام