بيبي مسكوتة من مطبخي بالشرح المفصل و الصور

[kakinova]

بسم الله الرحمن الرحيم

عملت بزاف مواضيع على طبخات بالقازوز باتيسري , كاب كايك , ميني كايك , لكن متاكدة بلي بزاف الأخوات مادخلت في راسهم العفسة نتاع القازوز فالقاطو , انا مرة عملت مسكوتة و جاتني يابسة و الحليب ما بقاليش , خممت نزيدلها الماء تجي صامطة , أمالا دبر عليا راسي زدتلها القازوز خخخخخخخخخخخخخ و من هداك النهار وليت نستعمل القازوز في المسكوتة نتاعي هكذا تجي كي لقطن

البارح عملت مسكوتة ساهلة بمقادير بسيطة جدا متوفرة في كل بيت و صورتها و جبتلكم الصور بالتفصيل الممل

نخليكم اولا مع المقادير ثم مع الصور

المقادير :

نصف كأس زيت الكاس لي ستعملتو ضيق من تحت لكن الكمية تقريبا نص كاس برك
كاس قازوز انا نستعمل فرحة ذوق ليمون ليم ذوقو امممممم
وحدة و نصف خميرة
علبة ياغورت أنا استعملت صغيرة نتاع ألف لي تحب تستعمل الكبيرة تستعملها عادي
3 مغارف كبار سكر
تقريبا 2 كيسان فرينة نستعمل كاس و نصف و اذا بقات جارية نزيد من النصف
كاس كوكاو نرحيه و نغربلو الرقيق نستعملو فالبداية و الخشن نضيفوه مع نصف كاس جوز الهند في الأخير
2 فاني نسيت ما صورتهمش
قرصة صغيرة ملح
3 بيضات
و كيما تشوفو في بلاصت الحليب انا نستعمل القازوز و الزيت نستعمل غير نص كاس حتى ما تجيش ثقيلة و مزيتة بزاف

و دركا مع الطريقة بالتفصيل الممل و الصور



نحط السكر و الياغورت و الفاني مع الملح و البيض و نخلط



نخلطو مليح حتى تتشكل فقاعات و اسهل طريقة نخلطو مرة لليمين و مرة لليسار خخخخخخخخخخخ هكذا ساهلة احسن من التحريك بشكل دائري



نضيفو الكوكاو الرطب و الخميرة و الزيت و نخلط مليح حتى يبياض المزيج





نضيفو القازوز و نخلط مليح






نضيفو الفرينة





هاذا المزيج بعد ما ضفنا الفرينة يبقى جاري شوية فقط



نضيفو الكوكاو و جوز الهند و نخليوه 3 دقائق



هنا بعد ما ضفناه و خلطناه مليح باش يتجانس




هنا بعد 3 دقائق الكوكاو و الفرينة و جوز الهند تشربو السوائل و تماسك المزيج اكثر



نحطوه في لي مول بملعقة و نحاول ما نمسخش الجوانب و لا نحطوه في ساشي و نثقبوها ثقبة متوسكة و نفرغو منها باه تجي العملية سهلة و سريعة

نفرغو المزيج في ليمول حتى للخط الدخلاني كاين واحد الخط فالمول ما نتعداوهش باش مع التخمار ما يفيضش العجين . نسخنو الفرن مليح و نشعلو غير من تحت فقط



نحطوه في فرن سخون مليح انا درت فالكويزنيار على 260 درجة مدة 5 دقائق علاش ؟ باه من فعل السخانة يطلع و الهواء السخون تم تم يعملو قشرة من بعد ما يزيدش يهبط حتى ولو حليتي الفرن مليون مرة
من بعد 5 دقائق ننزل الحرارة 160 او 150 درجة بمجرد ما نبداو نشمو ريحتو معناها طابت من تحت , خخخخخخخخخخخخ بالطبع ماشي ننساوه حتان تولي ريحت الحريق
و لي ما تعرفش تستعمل الضوء نتاع الكويزنيار أو ضواية تشوف بيها داخل الفرن , اذا شافت القاطو صفار شوية و انتفخ بعد تقريبا 10 دقئق و ريحتو بدات تجي معناها طاب من تحت تحل الفور و ما تخافش و تشوف الحواشي و الجناب لازم يحمارو غير شوية ماشي بزاف
طفي و تزيد تشعل من فوق 2 دقائق حتى يولي لونها ذهبي



هنا بعد ما خرج من الفرن لازم يطيب اصفر ذهبي لأنو كل مازادت المدة رح ينشف و يولي فيه شغل فتات من برا على الوجه التحتاني
نقلبوه فوق سارفيات ولا قطعة قماش نظيفة و نحيو المول الحديد و نخليوه يبرد مليح
ممكن نخليوه كيما هو ممكن ندهنوه بشوية عسل من فوق و نرش الكوكاو لخشين في كلتا الحالتين بنين









شوفو من داخل بيضا ماشي ميدمة و كي لقطن هشوشة







هادا صحن لحباباتي و للعضوات الكريمات