الدورة الثامنة "الرقي بمدبرة منزل مثالية "

[meriem hanin]

السلام عليكم كيف الاحوال توحشتكم ياالغاليات

واللي خابة تدخل كرشها تسيق بيديها وتنحني انا هادي المعلومة اعطاتهالي الطبيبة

الله يبااااارك على بنت قسنطينة كيفك كيف النحلة شاااطرة ما شاء الله
ربي يباركلك في نشاطاتك و يعينك على ادارة البيت و يحفظلك وليداتك راكي عاجبني يا وفاء سعاد نتمنى تواصلي على هاذ الطريق و فرحت اكثر لما شفت انو التقرير كتبتيه في هاذاك الوقت الباكرو زيد غسلتي الصوف و سيقتي و رايحة تعاوني الوليدات في تغليف الكتابات و الله ماخليتيني ما نقول خموس خموس خموس عليك عجبتني المعلومة الي مديتيهالنا لاول مرة نسمع بيها و هاذي نوصي بيها ماما زيادة على التمارين الي مدتهملنا الاخت ميمي ههه تحياتي الحاااارة ليك و لكل ناس قسنطينة العالية
شهرزاد ما شاء الله عليك راكي كتبتيلنا كاما التقريرات نتاوعك و الله شوقتيني باش نشوف الكوزينة كيفاش ولات ان شاء الله ربي يعينك على حفظ سورة البقرة و انا كذلك تحفزت لهاذ الامر و باذن الله رايحة نبدا معاك ابتداء من يوم الخميس و نديرو منافسة واش رايك
بالنسبة لحلقك نقولك لاباس عليك حبيبتي و جربي العسل مع الليمون طعمها روووعة و تفيدك كثييير انا مداريا نديرها
بوسيلي الكتكوتة دعاء و ربي يحفظلك وليداتك و زوجك ياااارب

Lili rose اختي الغالية عجبتني الوقفة الي كتبتيها خاصة مين قلتي قيمة الحياة هي فيما نعمل وننجز ،،، حتى لو كانت نسبه النجاح 1 %

هاذي هي الفكرة الي لازم نركزو عليها و هي انو مهما كانت نسبة النجاح و لو قليلة فهي التي تصنع الفرق مع مرور الزمن يعني حنا رانا نسعاو باش نغيرو من انفسنا و من حياتنا نحو الافضل بالتدريج
فبارك الله فيك
علابالي بلي كنتى مشاركة في دورة للكروشي و شفت بعض تطبيقات مااااشاء الله زيدي قولينا على هاذ القاطو باش نسييوه و ندعولك كاااامل بالخير
المنظفات الي ذكرتيهم جاو في وقتهم كنت نحوس عليهم شكرا جزيلا ليك
سلمي على الوالدة الكريمة و قوليلها بصحتها القندورة
ميمي بنت الجزائر الغالية

البنات واش رايكم كل أسبوع نحيو سنة من سنن الرسول عليه أفضل الصلاة و السلاة و هكذاك نمشيو عليها أسبوع كامل حتى نتعودوا و من بعد نبدو في سنة جديدة
اللي موافقين يرفعوا أصابعهم
كذلك نطوروا من أنفسنا مثلا نتعلموا لغات أو مهنة يدوية نشغلوا بيها فراغنا و طبعا لا ننسى حفظ القرآن و لو آية

بارك الله فيك حبيبتي الغالية يسقسي عليك الخير ان شاء الله كنت مشغولة اليوم بالتسجيلات الجامعية
تعجبوني بزاااف كي تمدو افكار كيما هاذو و بما اننا نحكيو على صلاة الفجر فتحدي هاذ الاسبوع و الاسبوع الجاي هو صلاة الفجر و لازم كل وحدة كي تكتب تطبيقها تاكدلنا بالخط الاحمر انها قامت لصلاة الفجر -الا للعذر الشرعي طبعا- و بعدها نقترحو سنة اخرى و نداومو عليها طيلة الاسبوع (ارجو منكن مناقشة الفكرة) جزاك الله خيرا و جعل تحفيزك لنا في ميزان حسناتك