الخبز الصيني مني مليحة العرب بعدسة كاميرتي زوروني

[مليحة العرب]

واش راكم اخواتي؟؟
نتمنى تكونو على أحسن ما يرام
اليوم جبتلكم وصفة شعبية بما أني نموت على المعجنات و نبحث عليهم بزاف طحت ف هاد الخبز اللذيذ اللي مقاديره متوفرة ف أي بيت مهما كانت امكانياتكم احبّتي و بلا ما نطوّل عليكم كرهنا من المطبخ التركي .. بالرغم من ان كل المطبخ التركي نلقوه في المطبخ الشامي اختلفت الاسامي و الوصفات هي هي مع تغيير طفيف نعود الى موضوعنا



نحتاج الى:
250غ فرينة -150ملل ماء-5غ خميرة الخبز -20غ سكر-1 بيض-رشة ملح

طريقة التحضير

نحطو كل المكونات الجافة و نخلطو مليح

نزيدو الماء دافي و نخلطو بالخلاط

نضيفو البيضة اللي نكونو خفقناها شوية

حتى نتحصلو على هاد الكثافة نغطوها و نخلوها تخمر شوية وحد 15 دقيقة نزلوها غير بالشوية غادي تكون جارية شوية و تتلصق ف اليد غير ساعفو و زيدولها شوية فرينة و غير لمو الاطراف و جيبوها للنص ما نقدرش نصورلكم هاد الوضعية سامحوني كي نلمّوها نعاودو نردوها تخمر 15 دقيقة بمكان دافي

هنا بعد ما خمرت للمرة الثانية

نحلّها طوليا و نقطها بالسكين او بقاطعة العجين لشرائط متساوية بسمك واحد سنتيمترحتى لواحد و نص و غادي تلاحظو باللي العجينة خفيفة بزاف

نجيبو شريط من العجين نمسحوه مسحة خفيفة من الماء

و نحطو من فوق منو شريط ثاني و نجيب سيخ خشبي و نضغط من الوسط باش نتحصلو على هاد الشكل

نرفدوه و مباشرة الى المقلاة اللي نكونو مسخنينها من قبل ما تاخدش وقت بزاف مجرد دقيقة على الاكثر و نقلبوها على الجهة الثانية على نار متوسطة

و ها هو الخبز تاعنا راه واجد

ملاحظة:
هاد الخبز حلاوته خفيفة تقدرو ترمدوه في السكر الناعم و تشربو بيه قهوة ولا شاي
و تقدرو تخلوه هاكا و تتغدو بيه ممتاز للتغماس قد ما تاكلو منه ما تبشعو و راه خفيف من الداخل و خاوي عجزت باش نصوره
نتمنى تجربوه و يعجبكم وراه حاجة جديدة و انا اعشق ما هو جديد و غريب نوعا ما
أراكم باذن الله
تحـــــــــــــــــــــــــــــــياتي مليحة العرب
.