وصفات من حراير مطبخ وش طيبتي اليوم

تارت من مطبخ lyzzabel
إضغط هنا لرؤية الصورة بحجمها الطبيعي.

روضة هاكي وصفة التارت
المول 36 على 26 سم
شوفي أنا ماكنتش دايرة باش نديرها يعني ما عولتش نديرها بكري واستعملت واش كان عندي فالدار
الجينواز درت 3 بيض و كأس مشي معمر سكر عادي م ص لافاني تاع الميزان وخلطه مليييييح بالباتور حتى طلع الخليط و رجع لونه ابيض زدت عليه 3 م ك زيت وكاس مشي معمر حليب و خلطت ومن بعد وجدت 2 كيسان و نص فرينة مغربلة مع م ص خميرة الحلويات و ضفتها على ثلاث دفعات و خلطت بالسباتولا من فوق لتحت حتى انسجمت المكونات و فرغتها في مول مستطيل فيه ورق الزبدة و إلى الفرن على 175 درجة ما لازمش الجينواز تحمر بزاف كي خرجتها خليته بردت شوية و قطعتها على نصفين متساويين
ومن جهة أخرى كنت موجدة شاربات بكاس ماء و نصف كأس سكر و قطرات من عصير الليمون و كي بردت الجينواز شربتها بالشربات
طلعت الشانتيي بحليب الشوكولا كانديا وحطيتها فالثلاجة ومين بردت الجينواز مليح بديت التزيين
وتاني درت جاناش ( ganache) بالشكولا والحليب او الكرام فراش انا ماكنتش عندي وتقدري ديري أي نوع شوكولا أنا كانو عندي هاذوك لي يشر وهم الأطفال على شكل حبات بيض هوما يبغو الألعاب لي فيهم برك وانا كنت نخبي الشوكولا فالثلاجة الى حين الاستعمال هههه موالفة ندير بيهم و يجو رووووعة
حطيت كمية من الشنتيي على النصف الأول تاع الجينواز و حطيت فوقها النصف الاخر و طليت كامل الوجه تاعها و رديها للثلاجة باش تحكم روحها مليح و منبعد فرغت عليها الجاناش من فوق و مالازمش تكون سخونة لانها راح تفسد الشانتيي ومنبعد زدت طليت الشانتيي فالجوانب و الديكور كانو عندي شكولا كيندر صغار شكل بيضوي و قاطو اوريو و حبيبات الشوكولا و الموز زينت بيهم تزيين بسيط كيما فالصورة و خلاااااص نتمنى نكون أفدتك حبيبة