مشاركتي في مسابقة كيكتي الأجمل

[nour inasse]

هذي أول مشاركة ليا في المسابقة انشاء الله ماتكونش الاخيرة واخترت كيكة بسييطة بالشوكولا والتوفي انشاء الله تعجبكم

نبدا بالمقادير والشرح في نفس الوقت ومبعدا نحط الصور

نحضر مقادير جينواز عادي استعملت 2 بيضات +60غ سكر عادي طلعتوا بالباتور مليح وزدتلهم 4 مغارف زيت كبار
ومن جهة في الميزان وزنت 60غ فرينة +1 ملعقة اكل كاكاو من النوع الجيد+1 مغرف صغيرة خميرة و قرصة ملح وفاني نغربلهم ونضيفهم للبيض ونحرك من الاسفل الى الأعلى برفق

نحطهم في صينية مغلفة بورق الالمنيوم ومدهونة بالزيت ومرشوشة بالفرينة انا استعملت لابوش باه تجيني مستوية السطح
نكرر العملية مرتين باه نتحصل على 3 قرصات جينواز بالكاكاو نخليهم يبردوا فوق مشبك ومبعدا نغلفهم ونحطهم في الثلاجة


نروح نحضر لكريمة مقادير بسيطة لازبدة لا بيض وخفيفة كيما لاموس
في كسرونة نضع 2 كيسان حليب +4 مغارف كبار سكر +ملعقة فاني+3 مغارف كبار مايزينة+3 مغارف كبار كاكاو نحرك نصفيهم ونحطهم فوق النار حتان تخثار لكريمة ومبعدا نغطيها بساشي ونضعها في الثلاجة حتان تبرد ملييييييح

ونروح نحضر الغاناش نحتاج علبة شوكولا امباسادور ومربع من شوكولا التغليف وكريمة ونحطهم في ميكرووند دقيقتين
ونذوب واحدة جيلاتين في ماء البارد ومبعدا نحطها فوق النار حتان ذوب ونصفيها ونضيفها للقاناش

نروح نجبد لكريمة اللي تكون بردت ونضيفلها 8 مغارف كبار كريم شانتي بودر ونطلعها بالباتور ملييييييييييح ومبعدا نضيفلها القاناش ونحرك برفق ونحطها في الثلاجة.


نحضر صلصة التوفي راهو تطبيقي لالهام جاتني هايلة انا استعملت عيني ميزاني وكمية صغيرة
في كسرونة نحط فنجان سكر وملعقة زبدة وفوق النار حتان يذوبو مليح ونزيدلهم الكريمة وعطر الكاراميل ونحطهم في بورت مونجي والى الثلاجة


نحضر الان السيرو اللي نسقي بيه بذوق الشوكولا والكاراميل مممممممم
نحط مغرف صغيرة نسكافيه و2 ملعقة صلصة التوفي و2 ملعقة كولي الكراميل ونخفف بشوي ماء حتان نتحصل على سيرو عاقد شوي نشربوا بيه الجينواز


نروحو للتركيب التارت نضع طبقة من الجينواز ونسقيها وكمية من صلصة التوفي ثم طبقة من الكريمة وهكذا حتان نكمل3 طبقات ونغلفهم بالكريمة ونحطهم في الثلاجة


لتغليف الكيكةnappage miroir chocolat نحضر الان
نحتاج حوالي 140 غ شوكولا اي نوع +100 غ كريم ليكيد كاملة الدسم ونحطهم في الميكرووند دقيقتين
ونزيد في صحن اخر 200 غ ناباج + ملعقة ماء ونحطهم في الميكرووند ومبعدا نخلط المزيجين رايحين نتحصلو على شوكولا تلمع نغلف بيها الكيكة ونحطها في الثلاجة


نروح للتزيين نذوب شوكولا ونعمل بيها الاشكال كما في الصور

ونزيد نخدم كراميل سكر + ماء فوق النار نخليهم يغلو 10 دقائق ومبعدا نجيب مغرف ونضعها في الكراميل ثم نضعها في الماء البارد اذا الكاراميل تصلب نحيها ونخدم بيها الاشكال اللي في الصور فوق ورق الطهي
ملاحظة كيما تيبس الكراميل رايحة تلصق في الورق اقلبيها وادهنيها بالماء بواسطة البانسو رايحة تتنحالك بسهولة ونزيين بيهم الكيكة

وهاهي الكيكة واجدة







لبنات كلمة شكر ودعوة في ظهر الغيب تكفيني انشاء الله نكون وفقت في الشرح واسمحولي اذا الموضوع طويل سلالالالالالام