مطلوع الغرب الجزائري

[نورة أسماء]

السّلام عليكم ورحمة الله وبركاته

كلنّا لايستغني عن الخبز ،وخاصة خبز الدّار

والمطلوع فيه أنواع كثيرة وهذا نوع من أنواع مطلوع الغرب الجزائري

المقادير :

يعني صراحة أنا عيني ميزاني

خذي 2كيلو فرينة ورطل سميد رقيق يعني الدّقيق واذا كان عندك دقيق القمح أحسن

4ملاعق صغار خمارة الخبز واذا كانت عندك الخميرة الطّبيعية عملي حفنة

ملح حسب الّذوق

أنا طريقتي أضع الماء الدّافئ أولاّ ونذوّب فيه الملح ونضيف الخماّرة والفرينة والدقيق نخلّط جيّدا ونخليّه يتشرّب ويرتاح مدة15د

من بعد نشمخ يديّ بالماء وندلكو شوية 5د ونخلّيه يرتاح 10د من بعد نطّلقو يعني ندلك بشوي ونضيف الماء ونلطخو مليح ونخليه يشرب الماء ونعاود نفس الطّريقة للمرّة الثانية

لازم يكون مرخوف بزّاف ونخليوه يخمر ...ومين يطلع مليح نقطعوه خبيزات صغار نوضعوهم في الدقيق ونخليوهم يخمروا ثاني 15د نسخنوا الفرن مليح وطواجن وهو يطيب على ثلاث مراحل أولا نضع الخبزة في الطّجين سخون وبمجرد ماتشد روحها ندخهلوها للكوشة سخونة ونارها تكون قوية ...باه الخبزة نتاعنا نتجي خفيفة وبها فراغات من الداخل ..ومن بعد نطلعوها الفوق باه تتحمرّ ...وأنا نخدم باثنين طواجن وبسرعة نكمل لخبيز ......

أتمنّى أن تكنّ قد فهمتّن الطّريقة الموضّحة بالصّور .

تحيّاتي حبيباتي