سلسلة حلويات مميزة .. موضوع يخص المبتدئات و حتّى المحترفات

[عماني نور]

الصامصة بالفواكه ~

اليوم جبتلكم وصفة ساااهلة ماااهلة تنفع لضياف الغفلة ،، و حتى للسهرات و القعدات الي تجمع العايلة كااامل

مفيدة ،، لأنو فيها فواكه لذيذة و غنية بالفيتامينات ،، و سهلة جدا لأنها ماتكلفش ،، لا وقت ،، لا جهد

الصامصة تع اليوم نديروها بالديول ~ و الي تحب تديرها بالعجينة هي حرة

عموما نبداو فالوصفة ،، و باش تعرفوا بلي نخمم فيكم ،، الناس تقرا و اتابع و انا نصورلكم

هاذي وصفة تعلمناها في معهد تعليم الحلويات
و انا حاولت نصورلكم كامل الخطوات ،، كاين الي فاتوني ،، الله غالب " ننشغل بالقصرة ساعات " هههههه
المهم اهم الخطوات جبتهملكم بالتفصيل ،، و الي مافهمتش حاجة تقولي نزيد نشرحلها

متفاهمين ؟؟

ياالله نبداو ،، بسم الله

المقادير :

- 2 باكيات ديول (( يعني تقريبا 24 ورقة تع الديول ))

- من 4 إلى 5 حبات تفاح .
- نفس الكمية بالنسبة للموز .
- 150 غ زبيب (( قيس 100 دج تقريبا ))
- ملعقة صغيرة فانيليا .
- سكر
- نصف كأس آتاي ماء (( يعني بالتقريب ربع كاس تع القازوز ))
- عسل + ماء الزهر (( في كل 1 كغ عسل نديرو كأس تع لاتاي ماء الزهر ))
- بيستاش للتزيين .

~ ~ ~

التحضير :
أول حاجة نديروها ،،
- نغسلو التفاح ،، نقشروه ،، و نقطعوه قطع صغييييرة .
- الزبيب أنقوه ،، نغسلوه ،، و نحطوه في طبسي أو علبة مملوءة بماء الزهر و نخلوه ،، يعني ننقعوه في ماء الزهر .

التفاح تاعنا الي قطعناه نحطوه في كاسرونة ،، نزيدولو السكر ( السكر هنا كيما نحبوه احنا ،، اذا حبيناه يجي حلو بزاااف نكثرولو السكر ،، اذا حبيناه ماشي حلو نديرو غييير شوية ،، يعني مقدار 3 ملاعق ماشي اكثر لأنو رايح يتعسل ممبعد
))
نزيدولو كأس تع لاتاي ماء الزهر

و نحطوه على نار متوسطة ،، بلا مانحركوه

حتى نشوفوه يغلي كيما فالصورة


نحركوه شوية بالملعقة ،، و نجربو نضغطو عليه بلعقل نشوفو اذا طاب ولاّ مازال

غير يذبال ،، يعني يتقسم عادي بالملعقة بلا جهد

نقشرو الموز ،، و نقطعوه قطع صغيرة و نزيدوهولو

نصفيو الزبيب من ماء الزهر ،، و تاني نزيدوه على خليط التفاح و البنان

نخلوه يغلي مدة 3 - 4 دقائق تقريبا و نطفيو .

شوفوا كيفاش يولي :


نخلوه يبرد مليح ،، أومبعد نزيدولو ملعقة تع فانيليا و نخلطو

و خلاص راهو جاهز للحشو

نبداو ظوكا الخطوات تع تشكيل الصامصة ،، و كلها موضحة بالصور

نجيبو ورقة الديول ،، نطووها بالتقريب على 2 ،، يعني نطووها على 2 أومبعد نجبدوها شوية ،، حتى توليلنا قطعة اكبر من قطعة ،، نزيدو نطووها حتى تجينا بالطول ،، شوفوا الصور
(( الي مافهمتش هاذ الخطوة تقولي نصورلها ورقة ))


هذا شكلها النهائي


و للممبتدئات كيما حالتنا ^^
باش تخرجلنا مثلثة الله الله

نديرو هاذ الخطوة

بالمقص ،، نقصها كيما راه موضح فالصورة باش يسهل علينا نخدمو ممبعد
(( هاذ الخطوة تخص المبتدئات ،، أمّا الي تقدر تشكل الصامصة بلا ما تديرها " تستغنى عنها " ))

ظوكا نحطو الحشو فالطرف ،، حوالي ملعقة كبيرة

و نبداو نطويو




و كي نطويو ،، نضغطو مليح بصباعتينا على الأطراف باش ماتتحلش ممبعد

و هذا شكلها النهائي ~


شوفوا هذا تطبيقي انا " صامصاتي الجميلة "

~ ~

باقي الخطوات باينة ،، نقلوها

نقطروها من الزيت

نعسلوها
و نذرو عليها البيستاش المطحون رقييييق

( ماتشحوش ،، كثرو البيستاش باش يجي شكلها هااايل ~ شوفوا الصورة ^^ )

ملالالالاحظة "

لاخاطرش ظوكا تلقيت صدمة من العيار الثقيل ... جات ماما ،، قاتلي واش راكي تديري ... وريتلها الموضوع ،، قاتلي هاذو يديك ؟؟!!

قرييييييييب جاتني ازمة نفسية

أنا في عمري 21 سنة يااااو

هاذو يدين المعلمة تاعنا ،، عمرها واقيلا 50 سنة " الله يبارك عليها "

يعني للتصحيح باش ماتشوكيونيش مام انتوما

ماشي يديا

~ ْ ~

أسرار الفشل نولي لعشيا نقولهوملكم ماعليش ؟؟ ^^

ظوكا عيطتلي صاحبتي قاتلي ارواحي ديريلي البريوش ~

غدوة ان شاء الله نعطيكم الوصفة و الكيفية

أرووووع من الروووعة

يا الله ،، لنا لقاء قؤيييب ان شاء الله


نتمنى تعجبكم الصامصة و تجربوها

كونوا بخير ~

نحبكم