![السلام1](https://up.djelfa.info/uploads/13466273241.gif)
البسملة1
صباح الورد و الفل على أحلى عضوات بالمنتدى ليكم وحشة كبيرة حبيباتي
إن شاء الله راح نقدملكم حلوى قديمة بطريقة جديدة بنينة و شكلها جميل خاصة أنو عيد الأضحى المبارك على الأبواب بالمناسبة نتمنالكم عيد سعيد
أكيد تعرفو المشوك و ماكانش أسهل منو لأنو أصلا عبارة عن عجينة صابلي فقط مضاف إليها مكسرات مرحية ناعم
و مادام بيناتنا مبتدئات نحب دائما نقدم وصفاتي و مواضيعي بالتفصيل الممل
![](https://im31.gulfup.com/pErtp.jpg)
إليك أختي العزيزة الطريقة مفصلة
![](https://im31.gulfup.com/NdkNQ.jpg)
مقادير العجينة :
- 500غ مرغرين (نفضل صول لأنها ما تطلقش ليدام أثناء الطياب عكس لابال)
- كاس سكر رطب
- كاس لوز مرحي ناعم
- 4 صفار بيض (نحتفظو بالبياض نحتاجوه من بعد)
- 1 خميرة الحلوى
- فرينة للم العجينة
![](https://im31.gulfup.com/hZ98U.jpg)
مقادير التزيين:
-4 بياض بيض (اللي احتفظنا بيهم) فقط اخفقيهم بالشوكة قليلا لنزع التكتلات
- لوز إيفيلي أو شرائح اللوز (هنا استعملت حوالي 400 غ )
- كرز مصبر نحتاج علبة (فقط اقسمي الحبة على زوج طوليا )
- و نحتاج عسل لتعسيل الحلوى حوالي 500 إلى 600 غ مخففة بحوالي كاس نتاع أتاي ماء زهر
- و كذلك كيسات لطهي الحلوى و كيسات للتقديم (لأنو اللي راح نطهوهم فيها راح يتشربو شوية دهن و راح يخسرو لذلك أي كيسات عندك ما تحتاجيهمش استعمليهم لطهي الحلوى
![](https://im31.gulfup.com/e0Ys3.jpg)
للعجينة:
امحري بكف يدك المرغرين بحركات دائرية ثم ضفي السكر مع مواصلة المحر مدة 2 إلى 3 د ثم ضفي الصفار واحدة بواحدة ثم اللوز المرحي و خلطي مليح ثم ضفي الفرينة و الخميرة حتان تتحصلي على عجينة طرية كيما الصابلي العادية’
اعملي كويرات بحجم حبة الجوز (راح يتنفخوا لازم يكونو صغار شوية)
![](https://im31.gulfup.com/qNw0O.jpg)
غطسي الكويرات واحدة بواحدة في بياض البيض و ارفديها بالخف و رمديها مباشرة في اللوز إيفيلي
حاولي تلصقي أكبر عدد ممكن من شرائح اللوز على سطح الحلوى
ثم ثبتي نصف حبة كرز وسط الكويرة و اضغطي غير بالشوية باش تلصق
حطيها في كيسات اللي قلنا ما نحتاجوهمش و حطيها في فرن مسخن مسبقا على درجة حرارة 180° حتان تحمار من تحت
كي يخرجو عسليهم و هوما سخونين بعسيلة باردة و مخففة بماء الزهر (حكينا على مقاديرها مسبقا)
هام ليك غير كيما خرجو وعسلتهم
![](https://im31.gulfup.com/VxKn3.jpg)
![](https://im31.gulfup.com/oaBzY.jpg)
هذي صورة مقربة باش تشوفي الكيسات اللي طابت الحلوى فيها كيفاش تعمرت بالدهن
هذا سبب تغيير الكيسات
![](https://im31.gulfup.com/YrsGW.jpg)
و هذا الشكل النهائي أنا هنا رشيت من فوق شوية لماع وردي اللون
![](https://im31.gulfup.com/VrQPU.jpg)
رطل مرغرين عملتلي الكمية هذي حوالي 65 إلى 75 حبة حسب حجم الكويرات
![](https://im31.gulfup.com/Hci7e.jpg)
![](https://im40.gulfup.com/YxwFe.jpg)
![](https://im40.gulfup.com/bnKp2.jpg)
![](https://im40.gulfup.com/6B04l.jpg)
نتمنى تكون عجبتكم الحلوى لأنها فعلا رائعة في البنة و مقرمشة من برا يميمي
ما تنساونيش بدعوة بظهر الغيب لي و لأخواتي حبيباتي
بصحتكم و عيدكم مبارك